Home / Tag Archives: zulm

Tag Archives: zulm

Shaam ka Mausam Khyaal- O Khwaab Hua..

Sukh ka mausam khayaal-o khwaab hua
saans lena bhi ab azaab hua.

Aankhon-aankhon padha karo jazbe
chehra-chehra khuli kitaab hua.

Kaun maujon mein gholta hai lahoo
surkh’roo kis liye chanaab hua.

Roshni uske aks ki dekho
aaina shab ko aaftaab hua.

Ek falak’naaz ki mohabbat mein
main hawaaon ka hum-rakaab hua.

Adl-parwar kbhi hisaab toh kar
zulm kis kis pe be-hisaab hua.

Kiske sar par sinaa ko rashk aaya
kaun maqtal mein kaamyaab hua.

Ab ke hijraan ki dhoop mein ‘Mohsin
rang uska bhi kuchh kharaab hua .!!

Mohsin Naqvi Shayari Collection

Har Bezaban Ko Sholanawa Keh Liya Karo..

Har bezaban ko shola-nawa keh liya karo,
yaaro sukoot hi ko sadaa keh liya karo.

Khud ko fareb do ki na ho talkh zindagi,
har sang-dil ko jaan-e-wafa keh liya karo.

Gar chaahte ho khush rahen kuchh bandagaan-e-khaas,
jitne sanam hain un ko khuda keh liya karo.

Yaaro ye daur zof-e-basaarat ka daur hai,
aandhi uthe toh uss ko ghataa keh liya karo.

Insaan ka agar qad-o-qaamat na badh sake,
tum iss ko nuqs-e-aab-o-hawa keh liya karo.

Apne liye ab ek hi raah-e-najaat hai,
har zulm ko razaa-e-khuda keh liya karo.

Le de ke ab yahi hai nishaan-e-ziya ‘qateel
jab dil jale toh iss ko diya keh liya karo. !!

Qateel Shifai

Main Zinda Hun Ye Mushtahar Kijiye..

Main zinda hun ye mushtahar kijiye,
mere qaatilon ko khabar kijiye.

Zameen sakht hai aasmaan door hai,
basar ho sake toh basar kijiye.

Sitam ke bahut se hain radd-e-amal,
zaroori nahin chashm tar kijiye.

Wahi zulm baar-e-digar hai toh phir,
wahi jurm baar-e-digar kijiye.

Qafas todna baad ki baat hai,
abhi khwaahish-e-baal-o-par kijiye. !!

Sahir Ludhianvi

Haan Ijaazat Hai Agar Koi Kahaani Aur Hai..

Haan ijaazat hai agar koi kahaani aur hai,
inn qatron mein abhi thoda sa paani aur hai.

Mazhabi majdoor sab baithe hain inn ko kaam do,
ek imaarat shehar mein kaafi puraani aur hai.

Khamoshi kab cheekh ban jaye kise maloom hai,
zulm kar lo jab talak ye be’zubaani aur hai.

Khushk patte aankh mein chubhte hain kaanto ki tarah,
dasht mein phirna alag hai, baaghwaani aur hai.

Phir wahi ukataahten hongi badan choupaal mein,
umar ke qisse mein thodi si jawaani aur hai.

Bas issi ehsaas ki shiddat ne budha kar diya,
toote phoote ghar mein ek ladki sayaani aur hai..!!

Aye Ishq Humein Barbaad Na Kar..

waiting girl, restless girl in love

 

Aye Ishq Na Chhed Aa Aa Ke Humein,
Hum Bhoole Huon Ko Yaad Na Kar.

Pehle Hi Bahut Nashad Hain Hum,
Tu Aur Humein Nashad Na Kar.

Qismat Ka Sitam Hi Kaafi Hai..
Ye Taza Sitam Ijaad Na Kar,
Yun Zulm Na Kar, Bedaad Na Kar.

Raaton Ko Uth Uth Kar Rote Hain,
Ro Ro Ke Dua’en Karte Hain.

Aankhon Mein Tasawwur, Dil Mein Khalish
Sar Dhunte Hain, Aahein Bharte Hain.

Aye Ishq Ye Kaisa Rog Laga?
Jeete Hain Na Zalim Marte Hain,
Inn Khwaabon Se Yun Aazaad Na Kar.

Jis Din Se Bandha Hai Dhyaan Tera
Ghabraaye Hue Se Rehte Hain..

Har Waqt Tasawwur Kar Kar Ke,
Sharmaaye Huye Se Rehte Hain.

Kumhlaaye Hue Phoolon Ki Tarah..
Kumhlaaye Hue Se Rehte Hain,
Pamaal Na Kar, Bedaad Na Kar.

Aye Ishq Humein Barbaad Na Kar..
Aye Ishq Humein Barbaad Na Kar…!!