Home / Tag Archives: Zameen Shayari

Tag Archives: Zameen Shayari

Nikal Ke Halqa-e-Shaam-o-Sehar Se Jaayen Kahin..

Nikal ke halqa-e-shaam-o-sehar se jaayen kahin,
zameen ke saath na mil jaayen ye khalaayen kahin.

Safar ki raat hai pichhli kahaniyaan na kaho,
ruton ke saath palaTti hain kab hawaayen kahin.

Fazaa mein tairte rahte hain naqsh se kya kya,
mujhe talaash na karti hon ye balaayen kahin.

Hawa hai tez charaag-e-wafa ka zikr toh kiya,
tanaaben khema-e-jaan ki na toot jaayen kahin.

Main oss ban ke gul-e-harf par chamakta hun,
nikalne wala hai sooraj mujhe chhupaayen kahin.

Mere wajood pe utri hain lafz ki soorat,
bhatak rahi thi khalaayon mein ye sadaayen kahin.

Hawa ka lams hai paanv mein bediyon ki tarah,
shafaq ki aanch se aankhen pighal na jaayen kahin.

Ruka hua hai sitaaron ka kaarwaan ‘amjad’
charaagh apne lahoo se hi ab jalaayen kahin. !!

Amjad Islam Amjad

Main Zinda Hun Ye Mushtahar Kijiye..

Main zinda hun ye mushtahar kijiye,
mere qaatilon ko khabar kijiye.

Zameen sakht hai aasmaan door hai,
basar ho sake toh basar kijiye.

Sitam ke bahut se hain radd-e-amal,
zaroori nahin chashm tar kijiye.

Wahi zulm baar-e-digar hai toh phir,
wahi jurm baar-e-digar kijiye.

Qafas todna baad ki baat hai,
abhi khwaahish-e-baal-o-par kijiye. !!

Sahir Ludhianvi

Munawwar Rana – Maa – Part 2

Iss chehre mein posheeda hai ek qaum ka chehra,
chehre ka utar jaana munaasib nahin hoga.

Ab bhi chalti hai jab aandhi kabhi ghum ki ‘rana
maa ki mamta mujhe baahon mein chhupa leti hai.

Museebat ke dinon mein humesha saath rahti hai,
payambar kya pareshaani mein ummat chhod sakta hai?

Puraana ped buzurgon ki tarah hota hai,
yehi bahut hai ki taaza hawayen deta hai.

Kisi ke paas aate hain toh dariya sookh jaate hain,
kisi ke ediyon se ret ka chashma nikalta hai.

Jab tak raha hun dhoop mein chaadar bana raha,
main apni maa ka aakhiri zevar bana raha.

Dekh le zaalim shikaari ! maa ki mamata dekh le,
dekh le chidiya tere daane talak toh aa gayi.

Mujhe bhi uss ki judaai sataate rehti hai,
usey bhi khwaab mein beta dikhaayi deta hai.

Muflisi ghar mein theharne nahin deti uss ko,
aur parades mein beta nahin rahne deta.

Agar school mein bachche hon ghar achchha nahin lagta,
parindon ke na hone par shajar achchha nahin lagta. !!

Munawwar Rana

Makaan – Poem by Kaifi Azmi

Aaj ki raat bahut garm hawa chalti hai
aaj ki raat na footpath pe neend aayegi
sab utho, main bi uthun tum bhi utho, tum bhi utho
koi khidki issi deewar mein khul jaayegi. !

Ye zameen tab bhi nigal lene pe aamaada thi
paanv jab tootTi shaakhon se utaare hum ne
un makaanon ko khabar hai na makeenon ko khabar
un dinon ki jo gufaaon mein guzaare hum ne. !

Haath dhalte gaye saanche mein toh thakte kaise
naqsh ke baad naye naqsh nikhaare hum ne
kii ye deewar buland, aur buland, aur buland
baam-o-dar aur, zara aur sanwaare hum ne. !

Aandhiyaan tod liya karti thi shamaaon ki laven
jad diye iss liye bijli ke sitaare hum ne
ban gaya qasr toh pehre pe koi baith gaya
so rahe khaak pe hum shorish-e-taameer liye. !

Apni nas nas mein liye mehnat-e-paiham ki thakan
band aankhon mein ussi qasr ki tasweer liye
din phighalta hai ussi tarah saron par ab tak
raat aankhon mein khatakti hai siyaah teer liye. !

Aaj ki raat bahut garm hawa chalti hai
aaj ki raat na footpath pe neend aayegi
sab utho, main bi uthun tum bhi utho, tum bhi utho
koi khidki issi deewar mein khul jaayegi. !!

Kaifi Azmi

Main Dhoondta Hun Jise Woh Jahaan Nahin Milta..

Main dhoondta hun jise woh jahaan nahin milta,
nayi zameen naya aasmaan nahin milta.

Nayi zameen naya aasmaan mil bhi jaaye,
naye bashar ka kahin kuchh nishaan nahin milta.

Woh tegh mil gayi jis se hua hai qatl mera,
kisi ke haath ka uss par nishaan nahin milta.

Woh mera gaaon hai woh mere gaaon ke chulhe,
ki jin mein sholay toh sholay dhuaan nahin milta.

Jo ek khuda nahi milta toh itna maatam kyon,
yahan toh koi mera hum-zubaan nahin milta.

Khada hun kab se main chehron ke ek jungle mein,
tumhare chehre ka kuchh bhi yahan nahin milta. !!

Kaifi Azmi

Kahin Se Laut Ke Hum Ladkhadaaye Hain Kya Kya..

Kahin se laut ke hum ladkhadaaye hain kya kya,
sitaare zer-e-kadam raat aaye hain kya kya.

Nasheb-e-hasti se afsos hum ubhar na sake,
faraaz-e-daar se paigaam aaye hain kya kya.

Jab uss ne haar ke khanjar zameen pe phenk diya,
tamaam zakhm-e-jigar muskuraaye hain kya kya.

Chhataa jahaan se uss aawaz ka ghana baadal,
wahin se dhoop ne talve jalaaye hain kya kya.

Utha ke sar mujhe itna do dekh lene de,
Ki qatl-gaah mein deewane aaye hain kya kya.

Kahin andhere se maanoos ho na jaaye adab,
charaagh tez hawa ne bujhaaye hain kya kya. !!

Kaifi Azmi

Patthar Ke Khuda Wahan Bhi Paaye..

Patthar ke khuda wahan bhi paaye,
hum chaand se aaj laut aaye.

Deewaaren toh har taraf khadi hain,
kya ho gaye meharabaan saaye.

Jungal ki hawaayen aa rahi hain,
kaaghaz ka ye shehar ud na jaaye.

Laila ne naya janam liya hai,
hai qais koi jo dil lagaaye.

Hai aaj zameen ka gusal-e-sehat,
jis dil mein ho jitna khoon laaye.

Sehra sehra lahoo ke kheme,
phir pyaase lab-e-furaat aaye. !!

Kaifi Azmi