Home / Tag Archives: tasweer

Tag Archives: tasweer

Yun Tere Husn Ki Tasweer Ghazal Mein Aaye..

Nasir Kazmi Poetry

Yun tere husn ki tasweer ghazal mein aaye,
jaise bilqis sulemaan ke mehal mein aaye.

Jabr se ek hua zaayeqa-e-hijr-o-visaal,
ab kahan se woh maza sabr ke phal mein aaye.

Ye bhi aaraaish-e-hasti ka taqaza tha ki hum,
halqa-e-fikr se maidaan-e-amal mein aaye.

Har qadam dast-o-garebaan hai yahan khair se shar,
hum bhi kis marka-e-jung-o-jadal mein aaye.

Zindagi jin ke tasawwur se jila paati thi,
haaye kya log the jo dum-e-ajal mein aaye. !!

Click here for  Nasir Kazmi Poetry collection

Please Rate this poetry!

Sakhtiyaan Karta Hun Dil Par Ghair Se Ghaafil Hun Main..

Allama Iqbal Poetry

Sakhtiyaan karta hun dil par ghair se ghaafil hun main,
haaye kya achchhi kahi zaalim hun main jaahil hun main.

Main jabhi tak tha ki teri jalwa-pairaai na thi,
jo numood-e-haq se mit jaata hai woh baatil hun main.

Ilm ke dariya se nikle ghota-zan gauhar-ba-dast,
waaye mahroomi khazaf chain lab saahil hun main.

Hai meri zillat hi kuchh meri sharaafat ki daleel,
jis ki ghaflat ko malak rote hain woh ghaafil hun main.

Bazm-e-hasti apni aaraaish pe toh naazaan na ho,
tu toh ek tasweer hai mehfil ki aur mehfil hun main.

Dhoondhta phirta hun aey ‘iqbal’ apne aap ko,
aap hi goya musaafir aap hi manzil hun main. !!

– Click here for Allama Iqbal Poetry collection

Please Rate this poetry!

Ishq Ko Fariyaad Laazim Thi So Woh Bhi Ho Chuki..

Allama Iqbal Poetry

Ishq ko fariyaad laazim thi so woh bhi ho chuki,
ab zara dil thaam kar fariyaad ki taaseer dekh.

Aam hariyat ka jo dekha tha khwaab islaam ne,
aey musalmaan aaj tu uss khwaab ki taabeer dekh.

Apni khastar samandar ko hai samaan-e-wajood,
mar ke phir hota hai paida ye jahaan peer dekh.

Khol kar aankhen mere aaina guftaar mein,
aane waale daur ki dhundhli si ek tasweer dekh.

Aazmoodha fitna hai ek aur bhi girdon ke paas,
saamne taqdeer ke ruswaai-e-tadbeer dekh. !!

– Click here for Allama Iqbal Poetry collection

Ishq Ko Fariyaad Laazim Thi So Woh Bhi Ho Chuki..
5 (100%) 1 vote[s]

Din Saleeqe Se Ugaa Raat Thikaane Se Rahi..

Din saleeqe se ugaa raat thikaane se rahi,
dosti apni bhi kuchh roz zamaane se rahi.

Chand lamhon ko hi banti hain musawwir aankhen,
zindagi roz toh tasweer banaane se rahi.

Iss andhere mein toh thokar hi ujaala degi,
raat jungal mein koi shama jalaane se rahi.

Faasla chaand bana deta hai har patthar ko,
door ki raushni nazdeek toh aane se rahi.

Shehar mein sab ko kahan milti hai rone ki jagah,
apni izzat bhi yahan hansne hansaane se rahi. !!

Nida Fazli

Please Rate this poetry!

Jab Bhi Kisi Ne Khud Ko Sada Di..

Jab bhi kisi ne khud ko sadaa di,
sannaaton mein aag laga di.

Mitti uss ki paani uss ka,
jaisi chaahi shakl bana di.

Chhota lagta tha afsaana,
maine teri baat badha di.

Jab bhi socha uss ka chehra,
apni hi tasweer bana di.

Tujh ko tujh mein dhoond ke hum ne,
duniya teri shaan badha di. !!

Nida Fazli

Please Rate this poetry!

Haath Chhuten Bhi Toh Rishte Nahin Chhoda Karte..

Poetry

Haath chhuten bhi toh rishte nahin chhoda karte,
Waqt ki shaakh se lamhe nahin toda karte.

Jis ki aawaaz mein silwat ho, nighaahon mein shikan
Aisi tasweer ke tukde nahin joda karte.

Lag ke saahil se jo behta hai usey behne do,
Aise dariya ka kabhi rukh nahin moda karte.

Jaagne par bhi nahin aankh se girti kirchen,
Iss tarah khwaabon se aankhein nahin phoda karte.

Shehad jeene ka mila karta hai thoda thoda,
Jaane walon ke liye dil nahin thoda karte.

Jaa ke *kohsaar se sar maaro ki aawaaz toh ho,
Khasta deewaaron se maatha nahin phoda karte. !!

*[ Kohsaar=Mountain ]

Haath Chhuten Bhi Toh Rishte Nahin Chhoda Karte..
4.9 (97.78%) 9 vote[s]

Aap Ki Yaad Aati Rahi Raat Bhar..

Aap ki yaad aati rahi raat bhar,
chandani dil dukhati rahi raat bhar.

Gaah jalti hui gaah bujhti hui,
shaam-e ghum jhilmilaati rahi raat bhar.

Koi khushbu badalti rahi pairahan,
koi tasweer gaati rahi raat bhar.

Phir saba saaya-e shaakh-e gul ke taley,
koi qissa sunaati rahi raat bhar.

Jo na aaya usey koi zanzeer-e dar,
har sadaa par bulati rahi raat bhar.

Ek umeed se dil behalta raha,
ek tammanna sataati rahi raat bhar. !!

-> Faiz Ahmed Faiz

Aap Ki Yaad Aati Rahi Raat Bhar..
4.8 (96.67%) 6 vote[s]