Home / Tag Archives: Sitare-shayari

Tag Archives: Sitare-shayari

Hai Dua Yaad Magar Harf-e-Dua Yaad Nahin..

Hai dua yaad magar harf-e-dua yaad nahin,
mere naghmaat ko andaaz-e-nawa yaad nahin.

Maine palakon se dar-e-yaar pe dastak di hai,
main woh saail hun jise koi sadaa yaad nahin.

Maine jin ke liye raahon mein bichhaaya tha lahoo,
hum se kehte hain wahi ahad-e-wafa yaad nahin.

Kaise bhar aayi sar-e-shaam kisi ki aankhen,
kaise tharraai charaaghon ki ziya yaad nahin.

Sirf dhundhlaaye sitaaron ki chamak dekhi hai,
kab hua kaun hua kis se khafa yaad nahin.

Zindagi jabr-e-musalsal ki tarah kaati hai,
jaane kis jurm ki paayi hai saza yaad nahin.

Aao ek sajda karen aalam-e-madHoshi mein,
log kehte hain ki ‘saghar ko khuda yaad nahin. !!

Saghar Siddiqui

Kahin Se Laut Ke Hum Ladkhadaaye Hain Kya Kya..

Kahin se laut ke hum ladkhadaaye hain kya kya,
sitaare zer-e-kadam raat aaye hain kya kya.

Nasheb-e-hasti se afsos hum ubhar na sake,
faraaz-e-daar se paigaam aaye hain kya kya.

Jab uss ne haar ke khanjar zameen pe phenk diya,
tamaam zakhm-e-jigar muskuraaye hain kya kya.

Chhataa jahaan se uss aawaz ka ghana baadal,
wahin se dhoop ne talve jalaaye hain kya kya.

Utha ke sar mujhe itna do dekh lene de,
Ki qatl-gaah mein deewane aaye hain kya kya.

Kahin andhere se maanoos ho na jaaye adab,
charaagh tez hawa ne bujhaaye hain kya kya. !!

Kaifi Azmi

Chamakte Lafz Sitaaron Se Chheen Laaye Hain..

Chamakte lafz sitaaron se chheen laaye hain,
hum aasmaan se ghazal ki zameen laaye hain.

Woh aur honge jo khanjar chhupaa ke laate hain,
hum apne saath phati aasteen laaye hain.

Humari baat ki gehraayi khaak samjhenge,
jo parbaton ke liye khurdbeen laaye hain.

Hanso na hum pe ki hum badnaseeb banjaare,
saron pe rakh ke watan ki zameen laaye hain.

Mere qabeele ke bachchon ke khel bhi hain ajeeb,
kisi sipaahi ki talwaar chheen laaye hain. !!

Rahat Indori

Main Laakh Keh Dun Ki Aakash Hun Zameen Hun Main..

Main laakh keh dun ki aakash hun zameen hun main,
magar usey toh khabar hai ki kuchh nahin hun main.

Ajeeb log hain meri talaash mein mujh ko,
wahan dhoond rahe hain jahan nahin hun main.

Main aainon se toh mayoos laut aaya tha,
magar kisi ne bataya bahut haseen hun main.

Woh zarre zarre mein mauzood hai magar main bhi,
kahin nahin hun kahan hun kahin nahin hun main.

Woh ek kitaab jo mansoob tere naam se hai,
ussi kitaab ke andar kahin kahin hun main.

Sitaaro aao meri raah mein bikhar jaao,
ye mera hukum hai halaanki kuchh nahin hun main.

Yahin husain bhi guzre yahin yazeed bhi tha,
hazaar rang mein doobi hui zameen hun main.

Ye boorhi qabaren tumhen kuchh nahin bataayengi,
mujhe talaash karo dosto yahin hun main. !!

Rahat Indori

Safar Ki Had Hai Wahan Tak Ki Kuchh Nishaan Rahe..

Safar ki had hai wahan tak ki kuchh nishaan rahe,
chale chalo ki jahan tak ye aasmaan rahe.

Ye kya uthaaye qadam aur aa gayi manzil,
maza toh jab hai ki pairon mein kuchh thakaan rahe.

Woh shakhs mujh ko koi jaalsaaz lagta hai,
tum uss ko dost samajhte ho phir bhi dhyan rahe.

Mujhe zameen ki gehraaiyon ne daab liya,
main chaahta tha mere sar pe aasmaan rahe.

Ab apne beech marasim nahin adaawat hai,
magar ye baat humare hi darmiyaan rahe.

Magar sitaaron ki faslen uga saka na koi,
meri zameen pe kitne hi aasmaan rahe.

Woh ek sawaal hai phir uss ka saamna hoga,
dua karo ki salaamat meri zabaan rahe. !!

Rahat Indori

Usey Waapas Bula Lena..

woh ladki

Meri basti ke logon ne sitaare tooTte dekhe,
toh rabb se ye dua maangi..
khudaya ab ke saawan mein bhaley barsaat kam dena,
koi soughaat mat dena,
magar itna karam karna..
usey waapas bula lena..

Ki jis ke qehqahe banjar nighaahen shaad karti thi,
ki jis ke lams dhadkan ko naya ek saaz dete the !

Usey maloom tha choupaal par baithe,
buzurgon ki kahaani mein..
kahan par muskurana hai.. kahan par sar jhukana hai !

Usey ehsaas tha,
udti patang ki dor toote toh,
zameen se dekhti hasarat bhari aankhen,
bahut afsoorda hoti hain,
hawa ko dosh deti hain !

Na woh koi patang sa tha,
ki jis ki dor tooti thi,
na woh choupaal pe baithe buzurgon ki kahaani tha !

Woh jo bhi tha,
usey basti ka har chehra
musalsal yaad karta hai..
sitaare jab bhi tooTte hain,
yahi fariyaad karta hai..
usey waapas bula lena,
usey waapas bula lena …!!