Home / Tag Archives: sitam-shayari

Tag Archives: sitam-shayari

Raat Itni Jaa Chuki Hai Aur Sona Hai Abhi..

Raat itni jaa chuki hai aur sona hai abhi,
iss nagar mein ek khushi ka khwaab bona hai abhi.

Kyon diya dil uss buut-e kamsin ko aise waqt mein,
dil si shayy jis ke liye bas ek khilona hai abhi.

Aisi yaadon mein ghire hain jin se kuchh haasil nahin,
aur kitna waqt un yaadon mein khona hai abhi.

Jo hua hona hi tha so ho gaya hai dosto,
daagh iss ehd-e sitam ka dil se dhona hai abhi.

Hum ne khilte dekhna hai phir khayabaan-e bahaar,
shehar ke ataraf ki mitti mein sona hai abhi.

Baith jaayen saaya-e-daamaan-e-ahmad mein ‘munir
aur phir sochen woh baaten jin ko hona hai abhi. !!

Munir Niazi

Ishq Ko Be-naqaab Hona Tha..

Ishq ko be-naqaab hona tha,
aap apna jawaab hona tha.

Mast-e-jaam-e-sharaab hona tha,
bekhud-e-iztiraab hona tha.

Teri aankhon ka kuchh qusoor nahin,
haan mujhi ko kharaab hona tha.

Aao mil jaao muskura ke gale,
ho chuka jo itaab hona tha.

Koocha-e-ishq mein nikal aaya,
jis ko khana-kharaab hona tha.

Mast-e-jaam-e-sharaab khaak hote,
garq-e-jaam-e-sharaab hona tha.

Dil ki jis par hain naqsh-e-ranga-rang
uss ko saada kitaab hona tha.

Hum ne nakaamiyon ko dhoond liya,
aakhirash kaamyaab hona tha.

Haaye woh lamha-e-sukoon ki jise,
mahshar-e-iztiraab hona tha.

Nigaah-e-yaar khud tadap uthti,
shart-e-awwal kharaab hona tha.

Kyon na hota sitam bhi bepaayan,
karam-e-behisaab hona tha.

Kyon nazar hairaton mein doob gayi,
mauj-e-sad-iztiraab hona tha.

Ho chuka roz-e-awwali hi ‘jigar
jis ko jitna kharaab hona tha. !!

Jigar Moradabadi

Duniya Ke Sitam Yaad Na Apni Hi Wafa Yaad..

Duniya ke sitam yaad na apni hi wafa yaad,
ab mujh ko nahin kuchh bhi mohabbat ke siwa yaad.

Main shikwa ba-lab tha mujhe ye bhi na raha yaad,
shayad ki mere bhoolne waale ne kiya yaad.

Chheda tha jise pahle-pahal teri nazar se,
ab tak hai woh ek naghma-e-be-saaz-o-sadaa yaad.

Jab koi haseen hota hai sargarm-e-nawaazish,
uss waqt woh kuchh aur bhi aate hain siwa yaad.

Kya jaaniye kya ho gaya arbaab-e-junoon ko,
marne ki adaa yaad na jeene ki adaa yaad.

Muddat hui ek haadsa-e-ishq ko lekin,
ab tak hai tere dil ke dhadakne ki sadaa yaad.

Haan haan tujhe kya kaam mere shiddat-e-ghum se,
haan haan nahin mujh ko tere daaman ki hawaa yaad.

Main tark-e-raah-o-rasm-e-junoon kar hi chuka tha,
kyon aa gayi aise mein teri lagazish-e-paa yaad

Kya lutf ki main apana pata aap bataaun,
keeje koi bhooli hui khaas apni adaa yaad. !!

Jigar Moradabadi

Aadmi Aadmi Se Milta Hai..

Aadmi aadmi se milta hai,
dil magar kam kisi se milta hai.

Bhool jata hun main sitam uss ke,
woh kuchh iss saadagi se milta hai.

Aaj kya baat hai ki phoolon ka,
rang teri hansi se milta hai.

Silsila fitna-e-qayaamat ka,
teri khush-qaamati se milta hai.

Mil ke bhi jo kabhi nahin milta,
toot kar dil ussi se milta hai.

Kaarobaar-e-jahan sanwarte hain,
hosh jab bekhudi se milta hai.

Rooh ko bhi mazaa mohabbat ka,
dil ki hum-saaegi se milta hai. !!

Jigar Moradabadi

Bas Iss Qadar Hai Khulaasa Meri Kahaani Ka..

Bas iss qadar hai khulaasa meri kahaani ka,
ki ban ke toot gaya ek habaab paani ka.

Mila hai saaqi toh raushan hua hai ye mujh par,
ki hazf tha koi tukda meri kahaani ka.

Mujhe bhi chehre pe raunaq dikhaayi deti hai,
ye mojaza hai tabeebon ki khush-bayaani ka.

Hai dil mein ek hi khwaahish woh doob jaane ki,
koi shabaab koi husn hai rawaani ka.

Libaas-e hashr mein kuchh ho toh aur kya hoga,
bujha sa ek chhanaaka teri jawaani ka.

Karam ke rang nihaayat ajeeb hote hain,
sitam bhi ek tareeqa hai meharbaani ka.

Adam’ bahaar ke mausam ne khudkushi kar li,
khula jo rang kisi jism-e argawaani ka. !!

Abdul Hamid Adam

Mohabbat Mein Tumhe Aansoo Bahaana Nahin Aaya..

Mohabbat mein tumhe aansoo bahaana nahin aaya,
banaaras mein rahe aur paan khana nahin aaya.

Na jaane log kaise mom kar dete hain patthar ko,
humein toh aap ko bhi gudgudana nahin aaya.

Shikaari kuchh bhi ho itna sitam achchha nahin hota,
abhi toh chonch mein chidiya ke daana tak nahin aaya.

Ye kaise raaste se le ke tum mujh ko chale aaye,
kahan ka maikada, ek chaaikhana tak nahin aaya. !!

Munawwar Rana

Kiya Hai Pyaar Jise Hum Ne Zindagi Ki Tarah..

Art Picture- girl and boy- rude lovers- qateel shifai poetry- poetry-shayari

Kiya hai pyaar jise hum ne zindagi ki tarah,
woh aashna bhi mila hum se ajnabi ki tarah.

Badha ke pyaas meri usne haath chhod diya,
woh kar raha tha murawwat bhi dillagi ki tarah.

Kise khabar thi badhegi kuchh aur taareeki,
chhupega woh kisi badli mein chaandani ki tarah.

Kabhi na socha tha hum ne ‘Qateel uske liye,
karega hum pe sitam woh bhi har kisi ki tarah. !!