Home / Tag Archives: shohrat

Tag Archives: shohrat

Ishq Mujh Ko Nahin Wehshat Hi Sahi..

Mirza Ghalib Poetry

Ishq mujh ko nahin wehshat hi sahi,
meri wehshat teri shohrat hi sahi.

Qat.a keejiye na taalluq hum se,
kuchh nahin hai toh adaawat hi sahi.

Mere hone mein hai kya ruswaai,
ye woh majlis nahin khalwat hi sahi.

Hum bhi dushman toh nahin hain apne,
ghair ko tujh se mohabbat hi sahi.

Apni hasti hi se ho jo kuchh ho,
aagahi gar nahin ghaflat hi sahi.

Umar har-chand ki hai barq-e-khiraam,
dil ke khoon karne ki fursat hi sahi.

Hum koi tark-e-wafa karte hain,
na sahi ishq museebat hi sahi.

Kuchh toh de aey falak-e-naa-insaaf,
aah-o-fariyaad ki rukhsat hi sahi.

Hum bhi tasleem ki khoo daalenge,
be–niyaazi teri aadat hi sahi.

Yaar se chhed chali jaaye ‘asad’
gar nahin wasl toh hasrat hi sahi. !!

– Click here for Mirza Ghalib Poetry collection

Kuchh Tabiyat Hi Mili Thi Aisi Chain Se Jeene Ki Soorat Na Hui..

Kuchh tabiyat hi mili thi aisi chain se jeene ki soorat na hui,
jis ko chaha usey apna na sake jo mila uss se mohabbat na hui.

Jis se jab tak mile dil hi se mile dil jo badla toh fasaana badla,
rasm-e-duniya ko nibhaane ke liye hum se rishton ki tijaarat na hui.

Door se tha woh kayi chehron mein paas se koi bhi waisa na laga,
bewafaai bhi usi ka tha chalan phir kisi se ye shikaayat na hui.

Chhod kar ghar ko kahin jaane se ghar mein rehne ki ibaadat thi badi,
jhooth mash.hoor hua raja ka sach ki sansaar mein shohrat na hui.

Waqt rootha reha bachche ki tarah raah mein koi khilauna na mila,
dosti ki toh nibhaayi na gayi dushmani mein bhi adaawat na hui. !!

Nida Fazli

Aainon Mein Aks Na Hon Toh Hairat Rehti Hai..

Aainon mein aks na hon toh hairat rehti hai,
jaise khaali aankhon mein bhi wehshat rehti hai.

Har dum duniya ke hungaame ghere rakhte the,
jab se tere dhyaan lage hain fursat rehti hai.

Karni hai toh khul ke karo inkaar-e-wafa ki baat,
baat adhoori reh jaaye toh hasrat rehti hai.

Shehar-e sukhan mein aisa kuchh kar izzat ban jaaye,
sab kuchh mitti ho jaata hai izzat rehti hai.

Bante bante dheh jaati hai dil ki har taameer,
khwaahish ke behroop mein shayad qismat rehti hai.

Saaye larazte rehte hain shehron ki galyion mein,
rehte the insaan jahan ab dehshat rehti hai.

Mausam koi khushboo le kar aate jaate hain,
kya kaya hum ko raat gaye tak wehshat rehti hai.

Dhyaan mein mela sa lagta hai beeti yaadon ka,
aksar uss ke ghum se dil ki sohbat rehti hai.

Phoolon ki takhti par jaise rangon ki tehreer,
lauh-e-sukhan par aise ‘amjad’ shohrat rehti hai. !!

Amjad Islam Amjad 

Aap Ki Aankh Se Gehra Hai Meri Rooh Ka Zakhm..

Aap ki aankh se gehra hai meri rooh ka zakhm,
aap kya soch sakenge meri tanhai ko.

Main toh dum tod raha tha magar afsurda-hayaat,
khud chali aayi meri housla-afzaai ko.

Lazzat-e ghum ke siwa teri nighaahon ke baghair,
kaun samjha hai mere zakhm ki gehraai ko.

Main badhaunga teri shohrat-e khushbu ka nikhaar,
tu dua de mere afsaana-e ruswaai ko.

Woh toh yun kahiye ki ek qaus-e quzah* phail gayi,
warna main bhool gaya tha teri angdaai ko. !!

* [ qaus-e quzah = Rainbow