Home / Tag Archives: Shohrat Shayari

Tag Archives: Shohrat Shayari

Ek Aazaar Hui Jaati Hai Shohrat Hum Ko..

Ek aazaar hui jaati hai shohrat hum ko,
khud se milne ki bhi milti nahin fursat hum ko.

Roshni ka ye musaafir hai raah-e-jaan ka nahin,
apne saaye se bhi hone lagi wehshat hum ko.

Aankh ab kis se tahayyur ka tamasha maange,
apne hone pe bhi hoti nahin hairat hum ko.

Ab ke ummeed ke shole se bhi aankhen na jali,
jaane kis mod pe le aayi mohabbat hum ko.

Kaun si rut hai zamaane humen kya maloom,
apne daaman mein liye phirti hai hasrat hum ko.

Zakhm ye wasl ke marham se bhi shayad na bhare,
hijr mein aisi mili ab ke masaafat hum ko.

Daagh-e-isyaan toh kisi taur na chhupte ‘amjad
dhaanp leti na agar chaadar-e-rahmat hum ko. !!

Amjad Islam Amjad

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Ye Chandani Bhi Jin Ko Chhoote Hue Darti Hai..

Ye chandani bhi jin ko chhoote hue darti hai,
duniya unhin phoolon ko pairon se masalti hai.

Shoharat ki bulandi bhi pal bhar ka tamaasha hai,
jis daal pe baithe ho woh toot bhi sakti hai.

Lobaan mein chingaari jaise koi rakh de,
yun yaad teri shab bhar seene mein sulagti hai.

Aa jaata hai khud khinch kar dil seene se patari par,
jab raat ki sarhad se ek rail guzarti hai.

Aansoo kabhi palkon par ta-der nahin rukte,
udd jaate hain ye panchhi jab shaakh lachakti hai.

Khush rang parindon ke laut aane ke din aaye,
bichhade hue milte hain jab barf pighalti hai. !!

Bashir Badr