Home / Tag Archives: sharaab-shayari

Tag Archives: sharaab-shayari

Baahar Na Aao Ghar Mein Raho Tum Nashe Mein Ho..

Baahar na aao ghar mein raho tum nashe mein ho,
so jaao din ko raat karo tum nashe mein ho.

Dariya se ikhtelaaf ka anzaam soch lo,
lehron ke saath saath baho tum nashe mein ho.

Behad shareef logon se kuchh faasla rakho,
pee lo magar kabhi na keho tum nashe mein ho.

Kaaghaz ka ye libaas chiraaghon ke shehar mein,
zara sambhal sambhal ke chalo tum nashe mein ho.

Kya dosto ne tum ko pilaayi hai raat bhar,
ab dushmano ke saath raho tum nashe mein ho. !!

Bashir Badr

Log Toot Jaate Hain Ek Ghar Banaane Mein..

Log toot jaate hain ek ghar banaane mein,
tum taras nahin khaate bastiyaan jalaane mein.

Aur jaam tootenge iss sharaabkhaane mein,
mausmon ke aane mein, mausmon ke jaane mein.

Har dhadakte patthar ko log dil samajhte hain,
umar beet jaati hai, dil ko dil banaane mein.

Faakhta ki majboori ye bhi keh nahin sakti,
kaun saanp rakhta hai, uske aashiyaane mein.

Doosri koi ladki zindagi mein aayegi,
kitni der lagti hai, usko bhool jaane mein. !!

Bashir Badr

Aaye Kuchh Abr Kuchh Sharaab Aaye..

Aaye kuchh abr kuchh sharaab aaye,
uss ke baad aaye jo azaab aaye.

Baam-e meena se mahtaab utre,
dasht-e saaqi mein aaftaab aaye.

Har ragg-e khoon mein phir charaagan ho,
saamne phir woh behisaab aaye.

Umar ke har waraq pe dil ki nazar,
teri mehr-o wafa ke baab aaye.

Kar raha tha ghum-e jahan ka hisaab,
aaj tum yaad behisaab aaye.

Na gayi tere ghum ki sardaari,
dil mein yun roz inqilaab aaye.

Jal uthe bazm-e ghair ke dar-o baam,
jab bhi hum khanumaan-kharaab aaye.

Iss tarah apni khamoshi goonji,
goya har samt se jawaab aaye.

Faiz’ thi raah sar-ba-sar manzil,
hum jahan pahunche kaamyaab aaye. !!

:  Faiz Ahmed Faiz

Baithe The Log Pehlu-ba Pehlu Piye Hue..

Baithe the log pehlu-ba pehlu piye hue,
ek hum the teri mehfil mein aansoo piye hue.

Dekha jise bhi uss ki mohabbat mein mast tha,
jaise tamaam shehar ho daaru piye hue.

Taqraar besabab toh na thi rind-o shaikh mein,
karte bhi kya sharaab the har do piye hue.

Phir kya ajab ki log bana lein kahaniyan,
kuchh main nashe mein choor tha kuchh tu piye hue.

Yun un labbon ke mas se moattar hun jis tarah,
woh naubahaar-e-naaz tha khushboo piye hue.

Yun ho agar ‘faraz toh tasweer kya bane,
ek shaam uss ke saath labb-e-joo piye hue. !!