Home / Tag Archives: shajar-shayari

Tag Archives: shajar-shayari

Makaan Mein Qaid-e-Sada Ki Dahshat..

Makaan mein qaid-e-sadaa ki dahshat,
makaan se baahar khalaa ki dahshat.

Hawa hai khauf-e-khuda se khaali,
hai iss nagar mein balaa ki dahshat.

Ghira hua hun main har taraf se,
hai aaine mein hawaa ki dahshat.

Zameen pe har simt had-e-aakhir,
falak pe la-intiha ki dahshat.

Shajar ke saaye mein maut dekho,
samar mein uss ke fanaa ki dahshat. !!

Munir Niazi

Manzar Tumhare Husn Ka Sab Ki Nazar Mein Hai..

Manzar tumhare husn ka sab ki nazar mein hai,
ab mere aitbaar ki kashti bhanwar mein hai.

Tanha mujhe kabhi na samajhna mere hareef,
ek bhai mar chuka hai magar ek ghar mein hai.

Woh toh likha ke laayi hai qismat mein jaagna,
maa kaise so sakegi ki beta safar mein hai.

Suni padi hui hain behan ki hatheliyan,
phal pak chuka hai aur abhi tak shajar mein hai.

Pardesh se watan ka safar bhi ajeeb hai,
main ghar pahunch gaya hun badan rahguzar mein hai.

Kal uss ke dil pe kis ka ho qabza khabar nahin,
ab tak toh ye ilaaqa humaare asar mein hai. !!

Munawwar Rana

Suna Hai Log Usey Aankh Bhar Ke Dekhte Hain..

Painting of beautiful women- ahmad faraz shayari- poetry picture- beautiful painting

Suna hai log usey aankh bhar ke dekhte hain,
so uss ke shehar mein kuchh din thehar ke dekhte hain.

Suna hai rabt hai uss ko kharaab haalon se,
so apne aap ko barbaad kar ke dekhte hain.

Suna hai dard ki gaahak hai chashm-e naaz uss ki,
so hum bhi uss ki gali se guzar ke dekhte hain.

Suna hai uss ko bhi hai sher-o shayari se shaghaf,
so hum bhi mojzey apne hunar ke dekhte hain.

Suna hai bole toh baaton se phool jhadte hain,
ye baat hai toh chalo baat kar ke dekhte hain.

Suna hai raat usey chaand takta rehta hai,
sitaare baam-e falak se utar ke dekhte hain.

Suna hai din ko usey titliyan staati hain,
suna hai raat ko jugnu thehar ke dekhte hain.

Suna hai hashr hain uss ki ghazaal si aankhein,
suna hai uss ko hiran dasht bhar ke dekhte hain.

Suna hai raat se badh kar hain kaakulen uss ki,
suna hai shaam ko saaye guzar ke dekhte hain.

Suna hai uss ki siyaah chashmagi qayamat hai,
so uss ko surma-farosh aah bhar ke dekhte hain.

Suna hai uss ke labbon se ghulaab jalte hain,
so hum bahaar pe ilzaam dhar ke dekhte hain.

Suna hai aaina timsaal hai jabeen uss ki,
jo saada dil hain usey ban sanwar ke dekhte hain.

Suna hai jab se hamaail hai uski gardan mein,
mizaaj aur hi laal-o gouhar ke dekhte hain.

Suna hai chashm-e tasawwur se dasht-e imkaan mein,
palang zaaviye uss ki kamar ke dekhte hain.

Suna hai uss ke badan ki taraash aisi hai,
ki phool apni qabaayen katar ke dekhte hain.

Woh sarv-qadd hai magar be-gul-e-muraad nahin,
ki uss shajar pe shagoofe samar ke dekhte hain.

Bas ek nigaah se lut,ta hai qaafila dil ka,
so raah-rawan-e-tamanna bhi dar ke dekhte hain.

Suna hai uss ke shabistaan se mutassil hai bahisht,
makeen udhar ke bhi jalwe idhar ke dekhte hain.

Ruke toh gardishein uska tawaaf karti hain,
chale toh uss ko zamaane thehar ke dekhte hain.

Kise naseeb ki be-pairhan usey dekhe,
kabhi kabhi dar-o deewar ghar ke dekhte hain.

Kahaniyan hi sahi sab mubalghe hi sahi,
agar woh khwaab hai tabeer kar ke dekhte hain.

Ab uss ke shehar mein thehrein ki kooch kar jayen,
Faraz aao sitaare safar ke dekhte hain. !!

Farishte Aa Ke Unke Jism Par Khushbu Lagaate Hain..

Farishte aa ke unke jism par khushbu lagaate hain,
Woh bacche rail ke dibbon mein jo jhaadu lagaate hain.

Andheri raat mein aksar sunehari mashaalen le kar,
Parindon ki musibat ka pata jugnu lagaate hain.

Dilon ka haal aasaani se kab maloom hota hai,
Ki peshaani pe chandan toh sabhi saadhu lagaate hain.

Ye mana aapko sholay bujhaane mein mahaarat hai,
Magar woh aag jo mazloom ke aansu lagaate hain.

Kisi ke paaon ki aahat se dil aisa uchhalta hai,
Chhalaange junglon mein jis tarah aahu lagaate hain.

Bahut mumkin hai ab mera chaman veeraan ho jaye,
Siyaasat ke shajar par ghonsle ulloo lagaate hain. !!