Home / Tag Archives: saleeqa-shayari

Tag Archives: saleeqa-shayari

Haath Khaali Hain Tere Shehar Se Jaate Jaate..

Haath khaali hain tere shehar se jaate jaate,
jaan hoti toh meri jaan lutaate jaate.

Ab toh har haath ka patthar humen pehchaanta hai,
umar guzri hai tere shehar mein aate jaate.

Ab ke mayoos hua yaaron ko rukhsat kar ke,
jaa rahe the toh koi zakhm lagaate jaate.

Rengne ki bhi ijaazat nahin hum ko warna,
hum jidhar jaate naye phool khilaate jaate.

Main toh jalte hue sehraaon ka ek patthar tha,
tum toh dariya the meri pyaas bujhaate jaate.

Mujh ko rone ka saleeqa bhi nahin hai shayad,
log hanste hain mujhe dekh ke aate jaate.

Hum se pehle bhi musaafir kayi guzre honge,
kam se kam raah ke patthar toh hataate jaate. !!

Rahat Indori

Ye Ehtraam Toh Karna Zaroor Padta Hai..

Ye ehtraam toh karna zaroor padta hai,
jo tu khareede toh bikna zaroor padta hai.

Bade saleeqe se yeh keh ke zindagi guzri,
har ek shakhs ko marna zaroor padta hai.

Woh dosti ho  mohabbat ho chaahe sona ho,
kasauti pe parakhna zaroor padta hai.

Kabhi jawaani se pehle  kabhi budhaape mein,
khuda ke saamne jhukna zaroor padta hai.

Ho chaahe jitni bhi puraani dushmani lekin,
koi pukare toh rukna zaroor padta hai.

Sharaab pee ke behakne se kaun rokega,
sharaab pee ke behakna zaroor padta hai.

Wafa ki raah pe chaliye magar ye dhyaan rahe,
ki darmiyaan mein sehra zaroor padta hai. !!

Munawwar Rana

Meri Nazar Ke Saleeqe Mein Kya Nahin Aata..

Meri nazar ke saleeqe mein kya nahin aata,
bas ek teri hi taraf dekhna nahin aata.

Akele chalna toh mera naseeb tha ki mujhe,
kisi ke saath safar baantna nahin aata.

Udhar toh jaate hain raaste tamaam hone ko,
idhar se ho ke koi raasta nahin aata.

Jagaana aata hai uss ko kayi tareeqon se,
gharon pe dastaken dene khuda nahin aata.

Yahan pe tum hi nahin aas paas aur bhi hain,
par uss tarah se tumhe sochna nahin aata.

Pade raho yun hi sahme hue diyon ki tarah,
agar hawaaon ke par baandhna nahin aata. !!

Wasim Barelvi

Khul Ke Milne Ka Saleeqa Aap Ko Aata Nahin..

Khul ke milne ka saleeqa aap ko aata nahin,
aur mere paas koi chor darwaaza nahin.

Woh samajhta tha usey paa kar hi main reh jaaunga,
uss ko meri pyaas ki shiddat ka andaaza nahin.

Ja! dikha duniya ko.. mujh ko kya dikhata hai ghuroor,
tu samandar hai toh ho, main toh magar pyasaa nahin.

Koi bhi dastak kare.. aahat ho ya aawaaz de,
mere haathon mein mera ghar toh hai, darwaaza nahin.

Apno ko apna keha.. chaahe kisi darje ke hon,
aur ab aisa kiya maine, toh sharmaya nahin.

Uski mehfil mein unhi ki roshani, jinke charaagh
main bhi kuchh hota toh mera bhi diya hota nahin.

Tujh se kya bichhda meri saari haqeeqat khul gayi,
ab koi mausam mile toh mujh se sharmaata nahin. !!

Wasim Barelvi

Kaun Si Baat Kahan Kaise Kahi Jaati Hai..

Kaun si baat kahan kaise kahi jaati hai,
ye saleeqa ho toh har baat suni jaati hai.

Ek bigdi hui aulaad bhala kya jaane,
kaise maa-baap ke honthon se hansi jaati hai.

Qatra ab ehtizaaz kare bhi toh kya mile,
dariya jo lag rahe the samandar se ja mile.

Har shakhs daudta hai yahan bheed ki taraf,
phir ye bhi chaahta hai usey raasta mile.

Iss daur-e munsaafi mein zaroori nahin ‘waseem
jis shakhs ki khata ho ussi ko saza mile. !!

Wasim Barelvi

Tumhari Raah Mein Mitti Ke Ghar Nahin Aate..

Tumhari raah mein mitti ke ghar nahin aate,
iss liye toh tumhe hum nazar nahin aate.

Mohabbaton ke dino ki yehi kharaabi hai,
ye rooth jaayen toh laut kar nahin aate.

Jinhe saleeqa hai tehzeeb-e ghum samajhne ka,
unhi ke rone mein aansoo nazar nahin aate.

Khushi ki aankh mein aansoo ki bhi jagah rakhna,
bure zamaane kabhi poochh kar nahin aate. !!

Wasim Barelvi

Usoolon Pe Jahan Aanch Aaye Takraana Zaroori Hai..

Usoolon pe jahan aanch aaye takraana zaroori hai,
jo zinda ho toh phir zinda nazar aana zaroori hai.

Nayi umaron ki khud-mukhtaariyon ko kaun samjhaaye,
kahan se bach ke chalna hai kahan jaana zaroori hai.

Thake haare parinde jab basere ke liye laute,
saleeqa-mand shaakhon ka lachak jaana zaroori hai.

Bahut bebaak aankhon mein taalluq tik nahin paata,
mohabbat mein kashish rakhne ko sharmaana zaroori hai.

Saleeqa hi nahin shayad usey mehsoos karne ka,
jo kehta hai khuda hai toh nazar aana zaroori hai.

Mere honthon pe apni pyaas rakh do aur phir socho,
ki iss ke baad bhi duniya mein kuchh paana zaroori hai. !!

Wasim Barelvi