Home / Tag Archives: safar

Tag Archives: safar

Bichhde Hue Yaaron Ki Sada Kyon Nahi Aati..

Mohsin Naqvi Poetry 


Bichhde hue yaaron ki sada kyon nahin aati,
ab roozan-e zindaan se hawa kyon nahin aati .! 

Tu ab bhi salaamat hai safar mein toh musaafir,
tere liye honthon pe duaa kyon nahin aati .!

Patthar ho toh kyon khauf-e shab-e ghum se ho larzaan,
insaan ho toh jeene ki adaa kyon nahin aati .!

Ek pedd ke saaye se hawa poochh rahi hai,
ab dasht mein makhlooq-e Khuda kyon nahin aati .!

Chehron pe woh sarson ki dhanak kya hui yaaro,
haath’on se woh khushbu-e hina kyon nahin aati .!

Basti ke sabhi log salaamat hain toh ‘Mohsin
aawaaz koi apne siwa kyon nahin aati .!!

Kahan Toh Tay Tha Chiragan Har Ek Ghar Ke Liye..

Dushyant Kumar Poetry

Kahan to tay tha chiragan har ek ghar ke liye,
kahan chirag mayassar nahin shehar ke liye.

Yahan darakhton ke saaye mein dhoop lagti hai,
chalo yahan se chalen aur umar bhar ke liye.

Na ho kameez toh ghutnon se pet dhak lenge,
ye log kitne munaasib hain iss safar ke liye.

Khuda nahin na sahi, aadmi ka khwaab sahi
koi haseen nazara toh hai nazar ke liye.

Ve mutmaeen hain ki ptthar pighal nahin sakta,
main beqraar hun aawaaz mein asar ke liye.

Tera nizaam hai sil de zabaan-e shayar ko,
ye ehtiyaat zaroori hai iss bahar ke liye.

Jiyen toh apne bagheeche mein gulmohar ke taley,
maren toh ghair ki galiyon mein gulmohar ke liye. !!

Dushyant Kumar Poetry Collection

Subscribe us for Dushyant Kumar Poems. Urdu Poetry, Shayari, Ghazals.

Aise Hijr Ke Mausam Kab Kab Aate Hain..

Shahryar Poetry

Aise hijr ke mausam kab kab aate hain,
tere alaawa yaad humein sab aate hain.

Jaagti aankhon se bhi dekho duniya ko,
khwaabon ka kya hai woh har shab aate hain.

Jazb kare kyon ret humari ashkon ko,
tera daaman tar karne ab aate hain.

Ab woh safar ki taab nahin baaqi warna,
hum ko bulaawe dasht se jab tab aate hain.

Kaaghaz ki kashti mein dariya paar kiya,
dekho hum ko kya kya kartab aate hain. !!

Shahryar Poetry Collection

Subscribe us for all types Urdu Poetry. Urdu Legend Poets Poetry, Sad, Life, Love, Shayari, Poems

Ibadaton Ki Tarah Main Ye Kaam Karta Hun – Bashir Badr

Bashir Badr Poetry

Ibaadaton ki tarah main ye kaam karta hun,
mera usool hai pehle salaam karta hun.

Mukhaalifat se meri shakhsiyat sanwarti hai,
main dushmanon ka bada ehtaraam karta hun.

Main apni jeb mein apna pata nahin rakhta,
Safar mein sirf yahi ehtemaam karta hun.

Main dar gaya hun bahut sayadaar pedon se,
zara si dhoop bichha kar qayaam karta hun.

Mujhe khuda ne ghazal ka dayyar bakhsha hai,
ye saltanat main mohabbat ke naam karta hun. !!

Bashir Badr Poetry Collection

Subscribe us for Bashir badr & all urdu  legend poet’s poetry, Ghazals, poems, nazms, shayaries.

Ye Chiragh Benazar Hai Ye Sitara Bezuban Hai – Bashir Badr

Bashir Badr Poetry

Ye chiraagh benazar hai ye sitaara bezubaan hai,
abhi tujh se milta julta koi dusra kahan hai.

Wahi shakhs jis pe apne dil-o-jaan nisaar kar dun,
woh agar khafa nahin hai toh zaroor badgumaan hai.

Kabhi paa ke tujh ko khona kabhi kho ke tujh ko paana,
ye janam janam ka rishta tere mere darmiyaan hai.

Mere saath chalne waale tujhe kya mila safar mein,
wahi dukh bhari zameen hai wahi ghum ka aasmaan hai.

Main issi gumaan mein barson mutmain raha hun,
tera jism betgaiyyur hai mera pyaar zaavidaan hai.

Unhi raaston ne jis par kabhi tum the saath mere,
mujhe rok rok poochha tera humsafar kahan hai. !!

Bashir Badr Poetry Collection

Subscribe us for Bashir badr & all urdu legend’s poetry, Ghazals, poems, nazms, shayaries.

Ye Shab Ye Khyaal O Khwab Tere..

Nasir Kazmi Poetry

Ye shab ye khyaal-o-khwaab tere,
kya phool khile hain munh-andhere.

Shole mein hai ek rang tera,
baaqi hain tamaam rang mere.

Aankhon mein chhupaaye phir reha hun,
yaadon ke bujhe hue sawere.

Dete hain suraagh fasl-e-gul ka,
shaakhon pe jale hue basere.

Manzil na mili toh qaafilon ne,
raste mein jama liye hain dere.

Jangal mein hui hai shaam hum ko,
basti se chale the munh-andhere.

Rudaad-e-safar na chhed ‘nasir’
phir ashk na tham sakenge mere. !!

– Click here for  Nasir Kazmi Poetry collection

Aaye Hain Meer Kaafir Ho Kar Khuda Ke Ghar Mein..

Meer Taqi Meer Poetry

Aaye hain ‘meer’ kaafir ho kar khuda ke ghar mein,
peshaani par hai qashqa zunnaar hai kamar mein.

Naazuk badan hai kitna woh shokh-chashm dilbar,
jaan uss ke tan ke aage aati nahin nazar mein.

Seene mein teer uss ke toote hain be-nihaayat,
suraakh pad gaye hain saare mere jigar mein.

Aainda shaam ko hum roya kudha karenge,
mutlaq asar na dekha naalidan-e-sehar mein.

Be-sudh pada rahun hun uss mast-e-naaz bin main,
aata hai hosh mujh ko ab toh pehar pehar mein.

Seerat se guftugu hai kya motabar hai soorat,
hai ek sookhi lakdi jo bu na ho agar mein.

Hum-saaya-e-mughaan mein muddat se hun chunaanche,
ek sheera-khaane ki hai deewar mere ghar mein.

Ab subh-o-shaam shaayad girye pe rang aave,
rehta hai kuchh jhamakta khunaab chashm-e-tar mein.

Aalam mein aab-o-gil ke kyonkar nibaah hoga,
asbaab gir pada hai saara mera safar mein. !!

Click here for Meer Taqi Meer poetry collection