Home / Tag Archives: saaz-shayari

Tag Archives: saaz-shayari

Poochha Kisi Ne Haal Kisi Ka Toh Ro Diye..

Poochha kisi ne haal kisi ka toh ro diye,
paani mein aqs chaand ka dekha toh ro diye.

Naghma kisi ne saaz pe chheda toh ro diye,
ghuncha kisi ne shaakh se toda toh ro diye.

Udta hua ghubaar sar-e-raah dekh kar,
anjaam hum ne ishq ka socha toh ro diye.

Baadal fiza mein aap ki tasweer ban gaye,
saaya koi khyaal se guzra toh ro diye.

Rang-e-shafaq se aag shagufon mein lag gayi,
saghar’ humare haath se chhalka toh ro diye. !!

Saghar Siddiqui

Duniya Ke Sitam Yaad Na Apni Hi Wafa Yaad..

Duniya ke sitam yaad na apni hi wafa yaad,
ab mujh ko nahin kuchh bhi mohabbat ke siwa yaad.

Main shikwa ba-lab tha mujhe ye bhi na raha yaad,
shayad ki mere bhoolne waale ne kiya yaad.

Chheda tha jise pahle-pahal teri nazar se,
ab tak hai woh ek naghma-e-be-saaz-o-sadaa yaad.

Jab koi haseen hota hai sargarm-e-nawaazish,
uss waqt woh kuchh aur bhi aate hain siwa yaad.

Kya jaaniye kya ho gaya arbaab-e-junoon ko,
marne ki adaa yaad na jeene ki adaa yaad.

Muddat hui ek haadsa-e-ishq ko lekin,
ab tak hai tere dil ke dhadakne ki sadaa yaad.

Haan haan tujhe kya kaam mere shiddat-e-ghum se,
haan haan nahin mujh ko tere daaman ki hawaa yaad.

Main tark-e-raah-o-rasm-e-junoon kar hi chuka tha,
kyon aa gayi aise mein teri lagazish-e-paa yaad

Kya lutf ki main apana pata aap bataaun,
keeje koi bhooli hui khaas apni adaa yaad. !!

Jigar Moradabadi

Kitni Be-saakhta Khata Hun Main..

Kitni be-saakhta khata hun main,
aap ki raghbat-o-razaa hun main.

Maine jab saaz chhedna chaaha,
khaamoshi cheekh uthi sadaa hun main.

Hashr ki subah tak toh jaagunga,
raat ka aakhiri diya hun main.

Aap ne mujh ko khoob pehchaana,
waaqayi sakht bewafaa hun main.

Maine samjha tha main mohabbat hun,
maine samjha tha mudda hun main.

Kaash mujh ko koi bataaye ‘adam
kis pariwash ki baddua hun main. !!

Abdul Hamid Adam

Maikhana-e Hasti Mein Aksar Hum Apna Thikaana Bhool Gaye..

Maikhana-e hasti mein aksar hum apna thikaana bhool gaye,
ya hosh mein jaana bhool gaye ya hosh mein aana bhool gaye.

Asbaab toh ban jaate hain taqdeer ki zidd ko kya kahiye,
ek jaam lo pahuncha tha hum tak hum jaam uthana bhool gaye.

Aaye the bikhere zulfon ko ek roz humaare marqad par,
do ashk toh tapke aankhon se, do phool chadhaana bhool gaye.

Chaaha tha ki un ki aankhon se kuchh rang-e-bahaaran leeje,
taqreeb toh achchhi thi lekin do aankh milaana bhool gaye.

Maloom nahin aaine mein chupke se hansaa tha kaun ‘adam
hum jaam uthaana bhool gaye, woh saaz bajaana bhool gaye. !!

Abdul Hamid Adam

Har Qadam Kehta Hai Tu Aaya Hai Jaane Ke Liye..

Har qadam kehta hai tu aaya hai jaane ke liye,
manzil-e hasti nahin hai dil lagaane ke liye.

Kya mujhe khush aaye ye hairat-sara-e-be-sabaat,
hosh udne ke liye hain jaan jaane ke liye.

Dil ne dekha hai bisaat-e-quwwat-e-idraak ko,
kya badhe iss bazm mein aankhen uthaane ke liye.

Khoob umeedein bandhi lekin hui hirmaan naseeb,
badliyaan uthi magar bijli giraane ke liye.

Saans ki tarkeeb par mitti ko pyaar aa hi gaya,
khud hui qaid uss ko seene se lagaane ke liye.

Jab keha maine bhula do ghair ko hans kar keha,
yaad phir mujh ko dilaana bhool jaane ke liye.

Deeda-baazi woh kahan aankhen raha karti hain band,
jaan hi baaqi nahin ab dil lagaane ke liye.

Mujh ko khush aayi hai masti shekh jii ko farbahi,
main hun peene ke liye aur woh hain khaane ke liye.

Allaah allaah ke siwa aakhir raha kuchh bhi na yaad,
jo kiya tha yaad sab tha bhool jaane ke liye.

Sur kahan ke saaz kaisa, kaisi bazm-e-saameen
josh-e-dil kaafi hai ‘akbar taan udaane ke liye. !!

Akbar Allahabadi

Usey Waapas Bula Lena..

woh ladki

Meri basti ke logon ne sitaare tooTte dekhe,
toh rabb se ye dua maangi..
khudaya ab ke saawan mein bhaley barsaat kam dena,
koi soughaat mat dena,
magar itna karam karna..
usey waapas bula lena..

Ki jis ke qehqahe banjar nighaahen shaad karti thi,
ki jis ke lams dhadkan ko naya ek saaz dete the !

Usey maloom tha choupaal par baithe,
buzurgon ki kahaani mein..
kahan par muskurana hai.. kahan par sar jhukana hai !

Usey ehsaas tha,
udti patang ki dor toote toh,
zameen se dekhti hasarat bhari aankhen,
bahut afsoorda hoti hain,
hawa ko dosh deti hain !

Na woh koi patang sa tha,
ki jis ki dor tooti thi,
na woh choupaal pe baithe buzurgon ki kahaani tha !

Woh jo bhi tha,
usey basti ka har chehra
musalsal yaad karta hai..
sitaare jab bhi tooTte hain,
yahi fariyaad karta hai..
usey waapas bula lena,
usey waapas bula lena …!!