Home / Tag Archives: saaya-shayari

Tag Archives: saaya-shayari

Kuchh Iss Tarah Woh Meri Zindagi Mein Aaya Tha..

Kuchh iss tarah woh meri zindagi mein aaya tha,
ki mera hote hue bhi, bas ek saaya tha.

Hawaa mein udne ki dhun ne ye din dikhaaya tha,
udaan meri thi, lekin safar paraaya tha.

Ye kaun raah dikha kar chala gaya mujh ko,
main zindagi mein bhala kis ke kaam aaya tha.

Main apne waade pe qaayam na rah saka warna,
woh thodi door ja kar toh laut aaya tha.

Na ab woh ghar hai, na uske log yaad ‘wasim
na jaane uss ne kahan se mujhe churaaya tha. !!

Wasim Barelvi

Apne Saaye Ko Itna Samjha De..

Apne saaye ko itna samjha de,
mujhe mere hisse ki dhoop aane de.

Ek nazar mein kayi zamaane dekhe tu,
boorhi aankhon ki tasweer banaane de.

Baba duniya jeet ke main dikha dunga,
apni nazar se door toh mujh ko jaane de.

Main bhi toh iss baagh ka ek parinda hun,
meri hi aawaaz mein mujh ko gaane de.

Phir toh ye ooncha hi hota jaayega,
bachpan ke haathon mein chaand aa jaane de. !!

Wasim Barelvi

Zehan Mein Paani Ke Baadal Agar Aaye Hote..

Zehan mein paani ke baadal agar aaye hote,
maine mitti ke gharonde na banaaye hote.

Dhoop ke ek hi mausam ne jinhen tod diya,
itne naazuk bhi ye rishte na banaaye hote.

Doobte shehar mein mitti ka makaan girta hi,
tum ye sab soch ke meri taraf aaye hote.

Dhoop ke shehar mein ek umar na jalna padta,
hum bhi aye kaash kisi pedd ke saaye hote.

Phal padosi ke darakhton pe na pakte toh ‘waseem
mere aangan mein ye patther bhi na aaye hote. !!

Wasim Barelvi

Aise Chup Hain Ki Ye Manzil Bhi Kadi Ho Jaise..

alone-sad-boy-man-sitting-thinking-depressed-ahmad-faraz-poetry-shayari

Aise chup hain ki ye manzil bhi kadi ho jaise,
tera milna bhi judaai ki ghadi ho jaise.

Apne hi saaye se gaam laraz jata hun,
raaste mein koi deewar khadi ho jaise.

Kitne nadaan hain tere bhulne wale ki tujhe,
yaad karne ke liye umar padi ho jaise.

Tere maathe ki shikan pehle bhi dekhi thi magar,
ye girah ab ke mere dil mein padi ho jaise.

Manzilen door bhi hain manzilen nazdeek bhi hain,
apne hi paaon mein zanjeer padi ho jaise.

Aaj dil khol ke roye hain toh yun khush hain faraz,
chand lamhon ki ye raahat bhi badi ho jaise. !!

Suna Hai Log Usey Aankh Bhar Ke Dekhte Hain..

Painting of beautiful women- ahmad faraz shayari- poetry picture- beautiful painting

Suna hai log usey aankh bhar ke dekhte hain,
so uss ke shehar mein kuchh din thehar ke dekhte hain.

Suna hai rabt hai uss ko kharaab haalon se,
so apne aap ko barbaad kar ke dekhte hain.

Suna hai dard ki gaahak hai chashm-e naaz uss ki,
so hum bhi uss ki gali se guzar ke dekhte hain.

Suna hai uss ko bhi hai sher-o shayari se shaghaf,
so hum bhi mojzey apne hunar ke dekhte hain.

Suna hai bole toh baaton se phool jhadte hain,
ye baat hai toh chalo baat kar ke dekhte hain.

Suna hai raat usey chaand takta rehta hai,
sitaare baam-e falak se utar ke dekhte hain.

Suna hai din ko usey titliyan staati hain,
suna hai raat ko jugnu thehar ke dekhte hain.

Suna hai hashr hain uss ki ghazaal si aankhein,
suna hai uss ko hiran dasht bhar ke dekhte hain.

Suna hai raat se badh kar hain kaakulen uss ki,
suna hai shaam ko saaye guzar ke dekhte hain.

Suna hai uss ki siyaah chashmagi qayamat hai,
so uss ko surma-farosh aah bhar ke dekhte hain.

Suna hai uss ke labbon se ghulaab jalte hain,
so hum bahaar pe ilzaam dhar ke dekhte hain.

Suna hai aaina timsaal hai jabeen uss ki,
jo saada dil hain usey ban sanwar ke dekhte hain.

Suna hai jab se hamaail hai uski gardan mein,
mizaaj aur hi laal-o gouhar ke dekhte hain.

Suna hai chashm-e tasawwur se dasht-e imkaan mein,
palang zaaviye uss ki kamar ke dekhte hain.

Suna hai uss ke badan ki taraash aisi hai,
ki phool apni qabaayen katar ke dekhte hain.

Woh sarv-qadd hai magar be-gul-e-muraad nahin,
ki uss shajar pe shagoofe samar ke dekhte hain.

Bas ek nigaah se lut,ta hai qaafila dil ka,
so raah-rawan-e-tamanna bhi dar ke dekhte hain.

Suna hai uss ke shabistaan se mutassil hai bahisht,
makeen udhar ke bhi jalwe idhar ke dekhte hain.

Ruke toh gardishein uska tawaaf karti hain,
chale toh uss ko zamaane thehar ke dekhte hain.

Kise naseeb ki be-pairhan usey dekhe,
kabhi kabhi dar-o deewar ghar ke dekhte hain.

Kahaniyan hi sahi sab mubalghe hi sahi,
agar woh khwaab hai tabeer kar ke dekhte hain.

Ab uss ke shehar mein thehrein ki kooch kar jayen,
Faraz aao sitaare safar ke dekhte hain. !!

Jab Kabhi Dhoop Ki Shiddat Ne Sataya Mujh Ko..

Sad man- walking man- sad man in evening-man in memories

Jab kabhi dhoop ki shiddat ne sataya mujh ko,
Yaad aaya bahut ek pedd ka saaya mujh ko.

Ab bhi roshan hai teri yaad se ghar ke kamre,
Roshani deta hai ab tak tera saaya mujh ko.

Meri khwaahish thi ki main roshani baantu sab ko,
Zindagi tune bahut jald bujhaya mujh ko.

Chahne walon ne koshish toh bahut ki lekin,
Kho gaya main toh koi dhoond na paya mujh ko.

Sakht hairat mein padi mout ye jumla sun kar,
Aa, adaa karna hai saanson ka kiraya mujh ko.

Shukriya tera adaa karta hun jaate jaate,
Zindagi tune bahut roz bachaya mujh ko. !!