Home / Tag Archives: saaqi-shayari

Tag Archives: saaqi-shayari

Khush Hun Ki Zindagi Ne Koi Kaam Kar Diya..

Khush hun ki zindagi ne koi kaam kar diya,
mujh ko supurd-e gardish-e ayaam kar diya.

Saaqi siyaah-khana-e-hasti mein dekhna,
roshan charaagh kis ne sar-e shaam kar diya.

Pehle mere khuloos ko dete rahe fareb,
aakhir mere khuloos ko badnaam kar diya.

Kitni duaayen dun teri zulf-e daraaz ko,
kitna waseea silsila-e daam kar diya.

Woh chashm-e mast kitni khabardaar thi ‘adam
khud hosh mein rahi, humein badnaam kar diya. !!

Abdul Hamid Adam

Bas Iss Qadar Hai Khulaasa Meri Kahaani Ka..

Bas iss qadar hai khulaasa meri kahaani ka,
ki ban ke toot gaya ek habaab paani ka.

Mila hai saaqi toh raushan hua hai ye mujh par,
ki hazf tha koi tukda meri kahaani ka.

Mujhe bhi chehre pe raunaq dikhaayi deti hai,
ye mojaza hai tabeebon ki khush-bayaani ka.

Hai dil mein ek hi khwaahish woh doob jaane ki,
koi shabaab koi husn hai rawaani ka.

Libaas-e hashr mein kuchh ho toh aur kya hoga,
bujha sa ek chhanaaka teri jawaani ka.

Karam ke rang nihaayat ajeeb hote hain,
sitam bhi ek tareeqa hai meharbaani ka.

Adam’ bahaar ke mausam ne khudkushi kar li,
khula jo rang kisi jism-e argawaani ka. !!

Abdul Hamid Adam

Aaye Kuchh Abr Kuchh Sharaab Aaye..

Aaye kuchh abr kuchh sharaab aaye,
uss ke baad aaye jo azaab aaye.

Baam-e meena se mahtaab utre,
dasht-e saaqi mein aaftaab aaye.

Har ragg-e khoon mein phir charaagan ho,
saamne phir woh behisaab aaye.

Umar ke har waraq pe dil ki nazar,
teri mehr-o wafa ke baab aaye.

Kar raha tha ghum-e jahan ka hisaab,
aaj tum yaad behisaab aaye.

Na gayi tere ghum ki sardaari,
dil mein yun roz inqilaab aaye.

Jal uthe bazm-e ghair ke dar-o baam,
jab bhi hum khanumaan-kharaab aaye.

Iss tarah apni khamoshi goonji,
goya har samt se jawaab aaye.

Faiz’ thi raah sar-ba-sar manzil,
hum jahan pahunche kaamyaab aaye. !!

:  Faiz Ahmed Faiz

Intezamat Naye Sire Se Sambhaale Jaayen..

Intezamaat naye sire se sambhaale jaayen,
Jitne kamzarf hain mehfil se nikaale jaayen.

Mera ghar aag ki lapaton mein chhupa hai lekin,
Jab mazaa hai tere aangan mein ujaale jaayen.

Ghum salaamat hain toh peete hi rahenge lekin,
Pehle mayykhane ki haalat sambhaali jaayen.

Khaali waqton mein kahin baith ke ro lein yaaro,
Fursatein hain toh samandar hi khangaale jaayen.

Khaaq mein yun na mila zabt ki tauheen na kar,
Ye woh aansu hain jo duniya ko baha le jaayen.

Hum bhi pyaase hain ye ehasaas toh ho saaqi ko,
Khaali sheeshe hi hawaaon mein uchhale jaayen.

Aao shehar mein naye dost banayen ‘Rahat
Aasteeno mein chalo saanp hi paale jaayen. !!