Home / Tag Archives: ruswaai

Tag Archives: ruswaai

Ho Jaayegi Jab Tum Se Shanasai Zara Aur..

Aanis Moeen 

Ho jaayegi jab tum se shanasaai zara aur,
badh jaayegi shayad meri tanhaai zara aur.

Kyon khul gaye logon pe meri zaat ke asraar,
aey kaash ki hoti meri gehraai zara aur.

Phir haath pe zakhmon ke nishaan gin na sakoge,
ye uljhi hui dor jo suljhaai zara aur.

Tardeed toh kar sakta tha phailegi magar baat,
iss taur bhi hogi teri ruswaai zara aur.

Kyon tark-e-taalluq bhi kiya laut bhi aaya?
achchha tha ki hota jo woh harjaai zara aur.

Hai deep teri yaad ka raushan abhi dil mein,
ye khauf hai lekin jo hawa aayi zara aur.

Ladna wahin dushman se jahan gher sako tum,
jeetoge tabhi hogi jo paspaai zara aur.

Badh jaayenge kuchh aur lahoo bechne waale,
ho jaaye agar shehar mein mehngaai zara aur.

Ek doobti dhadkan ki sadaa log na sun lein,
kuchh der ko bajne do ye shehnaai zara aur. !!

Aanis Moeen Poetry Collection

Ishq Ko Fariyaad Laazim Thi So Woh Bhi Ho Chuki..

Allama Iqbal Poetry

Ishq ko fariyaad laazim thi so woh bhi ho chuki,
ab zara dil thaam kar fariyaad ki taaseer dekh.

Aam hariyat ka jo dekha tha khwaab islaam ne,
aey musalmaan aaj tu uss khwaab ki taabeer dekh.

Apni khastar samandar ko hai samaan-e-wajood,
mar ke phir hota hai paida ye jahaan peer dekh.

Khol kar aankhen mere aaina guftaar mein,
aane waale daur ki dhundhli si ek tasweer dekh.

Aazmoodha fitna hai ek aur bhi girdon ke paas,
saamne taqdeer ke ruswaai-e-tadbeer dekh. !!

– Click here for Allama Iqbal Poetry collection

Ishq Mujh Ko Nahin Wehshat Hi Sahi..

Mirza Ghalib Poetry

Ishq mujh ko nahin wehshat hi sahi,
meri wehshat teri shohrat hi sahi.

Qat.a keejiye na taalluq hum se,
kuchh nahin hai toh adaawat hi sahi.

Mere hone mein hai kya ruswaai,
ye woh majlis nahin khalwat hi sahi.

Hum bhi dushman toh nahin hain apne,
ghair ko tujh se mohabbat hi sahi.

Apni hasti hi se ho jo kuchh ho,
aagahi gar nahin ghaflat hi sahi.

Umar har-chand ki hai barq-e-khiraam,
dil ke khoon karne ki fursat hi sahi.

Hum koi tark-e-wafa karte hain,
na sahi ishq museebat hi sahi.

Kuchh toh de aey falak-e-naa-insaaf,
aah-o-fariyaad ki rukhsat hi sahi.

Hum bhi tasleem ki khoo daalenge,
be–niyaazi teri aadat hi sahi.

Yaar se chhed chali jaaye ‘asad’
gar nahin wasl toh hasrat hi sahi. !!

– Click here for Mirza Ghalib Poetry collection

Kya Ishq Tha Jo Baais-e Ruswai Ban Gaya..

Qateel Shifai Poetry

Kya ishq tha jo baais-e-ruswaayi ban gaya,
yaaro tamaam shehar tamaashaayi ban gaya.

Bin maange mil gaye meri aankhon ko ratjage,
main jab se ek chaand ka shaidaayi ban gaya.

Dekha jo uss ka dast-e-hinaai qareeb se,
ehsaas goonjti hui shehnaayi ban gaya.

Barham hua tha meri kisi baat par koi,
woh haadsa hi wajah-e-shanasaai ban gaya.

Paaya na jab kisi mein bhi aawaargi ka shauq,
sehra simat ke gosha-e-tanhaai ban gaya.

Tha be-qaraar woh mere aane se pesh-tar,
dekha mujhe toh paikar-e-daanaai ban gaya.

Karta reha jo roz mujhe uss se bad-gumaan,
woh shakhs bhi ab uss ka tamanaai ban gaya.

Woh teri bhi toh pehli mohabbat na thi ‘qateel
phir kya hua agar koi harjaai ban gaya. !!

– Click Here For Qateel Shifai Poetry, Poems Collection

Kisne Sang-e Khaamoshi Pheinka Bhare Bazaar Par..

Kis ne sang-e khaamoshi pheinka bhare bazaar par,
Ek sukoot-e-marg* taari hai darr-o deewaar par.

Tune apne zulf ke saaye mein afsaane kahe,
Mujh ko zanjeeren mili hain jurrat-izhaar par.

Shaakh-e uriyaan par khila ek phool iss andaaz se,
Jis tarah taaza lahoo chamke nayi talwaar par.

Sangdil ahbaab ke daaman mein ruswaai ke phool,
Maine dekha hai naya manzar faraaz-e-daar* par.

Ab koi tohmat bhi wajah-e karb-e ruswaai nahi,
Zindagi ek umar se chup hai tere israar par.

Main sar-e maqtal hadees zindagi kehta raha,
Ungliyan uthti rahi ‘mohsin mere kirdaar par. !!

*[ Sukoot-e-marg=silence of death,
Faraaz-e-daar=elevated ]

Mohsin Naqvi

Aap Ki Aankh Se Gehra Hai Meri Rooh Ka Zakhm..

Aap ki aankh se gehra hai meri rooh ka zakhm,
aap kya soch sakenge meri tanhai ko.

Main toh dum tod raha tha magar afsurda-hayaat,
khud chali aayi meri housla-afzaai ko.

Lazzat-e ghum ke siwa teri nighaahon ke baghair,
kaun samjha hai mere zakhm ki gehraai ko.

Main badhaunga teri shohrat-e khushbu ka nikhaar,
tu dua de mere afsaana-e ruswaai ko.

Woh toh yun kahiye ki ek qaus-e quzah* phail gayi,
warna main bhool gaya tha teri angdaai ko. !!

* [ qaus-e quzah = Rainbow

Angdaai Par Angdaai Leti Hai Raat Judaai Ki..

Angdaai par angdaai leti hai raat judaai ki,
tum kya samjho tum kya jaano baat meri tanhaai ki.

Kaun siyaahi ghol raha tha waqt  ke bahte dariya mein?
maine aankh jhuki dekhi hai aaj kisi harjaai ki.

Toot gaye sayyaal nagine, phoot bahe rukhsaaron par
dekho mera saath na dena baat hai ye ruswaai ki.

Wasl ki raat na jaane kyon israar tha un ko jaane par,
waqt se pahle doob gaye taaron ne badi daanaai ki.

Udte udte aas ka panchhi door uffuq mein doob gaya,
rote rote baith gayi aawaaz kisi saudaai ki. !!

Qateel Shifai