Home / Tag Archives: roshani-shayari

Tag Archives: roshani-shayari

Aansuon Se Dhuli Khushki Ki Tarah..

Aansuon se dhuli khushki ki tarah,
rishte hote hain shayari ki tarah.

Hum khuda ban ke aayenge warna,
hum se mil jaao aadmi ki tarah.

Barf seene ki jaise jaise gali,
aankh khulti gayi kali ki tarah.

Jab kabhi baadlon mein ghirta hai,
chaand lagta hai aadmi ki tarah.

Kisi rozan kisi dareeche se,
saamne aao roshani ki tarah.

Sab nazar ka fareb hai warna,
koi hota nahin kisi ki tarah.

Khubsoorat udaas Khaufzada,
woh bhi hai beeswin sadi ki tarah.

Jaanta hun ki ek din mujh ko,
woh badal dega diary ki tarah. !!

Bashir Badr

Sab Ne Milaya Haath Yahan Teergi Ke Saath..

Sab ne milaya haath yahan teergi ke saath,
kitna bada mazaak hua roshani ke saath.

Sharten lagaayi jati nahin dosti ke saath,
kijiye mujhe qubool meri har kami ke saath.

Tera khyaal, teri talab, teri aarzoo
Gujri hai saari umar kisi roshani ke saath.

Kis kaam ki rahi ye dikhaawe ki zindagi,
waade kiye kisi se, gujaari kisi ke saath.

Duniya ko bewaafai ka ilzaam kaun de?
apni hi nibh saki na bahut din kisi ke saath. !!

Wasim Barelvi

Khul Ke Milne Ka Saleeqa Aap Ko Aata Nahin..

Khul ke milne ka saleeqa aap ko aata nahin,
aur mere paas koi chor darwaaza nahin.

Woh samajhta tha usey paa kar hi main reh jaaunga,
uss ko meri pyaas ki shiddat ka andaaza nahin.

Ja! dikha duniya ko.. mujh ko kya dikhata hai ghuroor,
tu samandar hai toh ho, main toh magar pyasaa nahin.

Koi bhi dastak kare.. aahat ho ya aawaaz de,
mere haathon mein mera ghar toh hai, darwaaza nahin.

Apno ko apna keha.. chaahe kisi darje ke hon,
aur ab aisa kiya maine, toh sharmaya nahin.

Uski mehfil mein unhi ki roshani, jinke charaagh
main bhi kuchh hota toh mera bhi diya hota nahin.

Tujh se kya bichhda meri saari haqeeqat khul gayi,
ab koi mausam mile toh mujh se sharmaata nahin. !!

Wasim Barelvi

Lahoo Na Ho Toh Qalam Tarjumaan Nahin Hota..

Lahoo na ho toh qalam tarjumaan nahin hota,
humare daur mein aansoo zubaan nahin hota.

Jahan rahega wahin roshani lutaayega,
kisi charaagh ka apna makaan nahin hota.

Ye kis maqaam pe laayi hai meri tanhaayi,
ki mujh se aaj koi badgumaan nahin hota.

Main uss ko bhool gaya hun ye kaun maanega,
kisi charaagh ke bas mein dhuaan nahin hota.

‘Waseem sadiyon ki aankhon se dekhiye mujh ko,
woh lafz hun jo kabhi daastaan nahin hota. !!

Wasim Barelvi

Kya Bataaun Kaise Khud Ko Dar-ba Dar Maine Kiya..

Kya bataaun kaise khud ko dar-ba dar maine kiya,
umar bhar kis kis ke hissey ka safar maine kiya.

Tu to nafarat bhi na kar paayega itni shiddat ke saath,
jis bala ka pyaar tujh se be-khabar maine kiya.

Kaise bacchon ko bataaun raaston ke pech-o kham,
zindagi bhar toh kitaabon ka safar maine kiya.

Shoharton ki nazar kar di shair ki masoomiyat,
ss diye ki roshani ko dar-ba dar maine kiya.

Chand jazbaaton se rishton ke bachaane ko ‘waseem
kaisa kaisa zabr apne aap par maine kiya. !!

Wasim Barelvi

Dil Tha Ki Khush Khyaal Tujhe Dekh Kar Hua..

Dil tha ki khush khyaal tujhe dekh kar hua,
ye shehar be-misaal tujhe dekh kar hua.

Apne khilaaf shehar ke andhe huzoom mein,
dil ko bahut malaal tujhe dekh kar hua.

Tool-e shab-e firaaq teri khair ho ki dil,
amaada-e visaal tujhe dekh kar hua.

Ye hum hu jaante hain judaai ke mod par,
iss dil ka jo bhi haal tujhe dekh kar hua.

Aayi na thi kabhi mere lafzon mein roshani,
aur mujh se ye kamaal tujhe dekh kar hua.

Bichhde toh jaise zehan muattal sa ho gaya,
shehar-e sukhan bahaal tujhe dekh kar hua.

Phir log aa gaye mera maazi kuredne,
phir mujh se ek sawaal tujhe dekh kar hua. !!

Noshi Gilani

Ye Naam Mumkin Nahin Rahega, Muqaam Mumkin Nahin Rahega..

Dhanush_Sonam_Kapoor_Raanjhanaa_rude_lovers_couples_Noshi_gilani_shayari_Poetry

Ye naam mumkin nahin rahega, muqaam mumkin nahin rahega,
ghuroor lehje mein aa gaya toh kalaam mumkin nahin rahega.

Ye barf mausam jo shehar-e jaan mein kuchh aur lamhe thehar gaya toh,
lahoo ka dil ki kisi gali mein muqaam mumkin nahin rahega.

Tum apni saanson se meri saansein alag toh karne lage ho lekin,
jo kaam aasaan samajh rahe ho woh kaam mumkin nahin rahega.

Wafa ka kaaghaz toh bheeg jaayega badgumaani ki baarishon mein,
khaton ki baaten toh khwaab hongi payaam mumkin nahin rahega.

Main jaanti hun mujhe yaqeen hai agar kabhi tu mujhe bhula de,
toh teri aanhkon mein roshni ka qayaam mumkin nahin rahega.

Ye hum mohabbat mein la’taalluq se ho rahe hain toh dekh lena,
duaayen toh khair kaun dega salaam mumkin nahin rahega . !!

-> Noshi Gilani