Home / Tag Archives: raah

Tag Archives: raah

Zindagi Jab Bhi Teri Bazm Mein Laati Hai Humen..

Shahryar Poetry

Zindagi jab bhi teri bazm mein laati hai humen,
ye zameen chaand se behtar nazar aati hai humen.

Soorkh phoolon se mehak uthti hain dil ki raahen,
din dhale yun teri aawaaz bulaati hai humen.

Yaad teri kabhi dastak kabhi sargoshi se,
raat ke pichhle pehar roz jagaati hai humen.

Har mulaaqaat kaa anjaam judaai kyon hai,
ab toh har waqt yehi baat sataati hai humen. !!

Shahryar Poetry Collection

Subscribe us for shahryar ghazals, poems, shayari, nazms, shair, urdu poets. 

Aaj Chandni Bhi Meri Tarah Jaag Rahi Hai..

Bashir Badr Poetry

Aaj chaandani bhi meri tarah jaag rahi hai,
palakon pe sitaroon ko liye raat khadi hai.

Ye baat ki soorat ke bhale dil ke bure hon,
allaah kare jhooth ho bahuton se suni hai.

Woh maathe ka matlaa ho ki honthon ke do misre,
bachpan ki ghazal hi meri mehboob rahi hai.

Ghazlon ne wahin zulfon ke phailaa diye saaye,
jin raahon pe dekha hai bahut dhoop kadi hai.

Hum dilli bhi ho aaye hain lahore bhi ghume,
aey  yaar magar teri gali, teri gali hai. !!

Bashir Badr Poetry Collection

Subscribe Us For Bashir Badr Shayari, Urdu Poetry, Ghazals, Urdu Legend Poets, Nazms, Shair-o-shairy.

Hai Bas-ki Har Ek Un Ke Ishaare Mein Nishaan Aur..

Mirza Ghalib Poetry

Hai bas-ki har ek un ke ishaare mein nishaan aur,
karte hain mohabbat toh guzarta hai gumaan aur.

Ya rab woh na samjhe hain na samjhenge meri baat,
de aur dil un ko jo naa de mujh ko zubaan aur.

Abru se hai kya uss nigaah-e-naaz ko paivand,
hai teer muqarrar magar iss ki hai kamaan aur.

Tum shehar mein ho toh humein kya ghum jab uthenge,
le aayenge baazaar se ja kar dil-o-jaan aur.

Har-chand subuk-dast hue but-shikani mein,
hum hain toh abhi raah mein hai sang-e-giraan aur.

Hai khoon-e-jigar josh mein dil khol ke rota,
hote kayi deeda-e-khun-naaba-fishaan aur.

Marta hun iss aawaaz pe har chand sar ud jaaye,
jallaad ko lekin woh kahe jaayen ki haan aur.

logon ko hai khurshid-e-jahan-taab ka dhoka,
har roz dikhaata hun main ek daagh-e-nihaan aur.

Leta na agar dil tumhen deta koi dum chain,
karta jo na marta koi din aah-o-fughaan aur.

Paate nahin jab raah to chadh jaate hain naale,
rukti hai meri taba toh hoti hai rawaan aur.

Hain aur bhi duniya mein sukhan-war bahut achchhe,
kehte hain ki ‘ghalib’ ka hai andaaz-e-bayaan aur. !!

– Click here for Mirza Ghalib Poetry collection

Dil Hi Toh Hai Na Sang o Khisht Dard Se Bhar Na Aaye Kyon..

Mirza Ghalib Poetry

Dil hi toh hai na sang-o-khisht dard se bhar na aaye kyon,
royenge hum hazaar baar koi humein sataaye kyon.

Dair nahin haram nahin dar nahin aastaan nahin,
baithe hain rahguzar pe hum ghair humein uthaaye kyon.

Jab woh jamaal-e-dilfaroz soorat-e-mehr-e-neemroz,
aap hi ho nazaara-soz parde mein munh chhupaaye kyon.

Dashna-e-ghamza jaan-sataan naawak-e-naaz bepanaah,
tera hi aks-e-rukh sahi saamane tere aaye kyon.

Qaid-e-hayaat-o-band-e-ghum asal mein donon ek hain,
maut se pehle aadmi ghum se najaat paaye kyon.

Husn aur uss pe husn-e-zan reh gayi bul-hawas ki sharm,
apne pe etimaad hai ghair ko aazmaaye kyon.

Waan woh ghuroor-e-izz-o-naaz yaan ye hijaab-e-paas-e-waza.a,
raah mein hum milen kahan bazm mein woh bulaaye kyon.

Haan woh nahin khuda-parast jaao woh bewafa sahi,
jis ko ho deen-o-dil azeez uss ki gali mein jaaye kyon.

‘Ghalib-e-khasta ke baghair kaun se kaam band hain,
roiye zaar zaar kya keejiye haaye haaye kyon. !!

Ghalib Poetry Collection

Kaise Kahen Ki Yaad-e-Yaar Raat Ja Chuki Bahut..

Habib Jalib Poetry

Kaise kahen ki yaad-e-yaar raat jaa chuki bahut,
raat bhi apne saath saath aansoo baha chuki bahut.

Chaand bhi hai thaka thaka taare bhi hain bujhe bujhe,
tere milan ki aas phir deep jala chuki bahut.

Aane lagi hai ye sadaa door nahin hai shehar-e-gul,
duniya humari raah mein kaante bichha chuki bahut.

Khulne ko hai qafas ka dar paane ko hai sukoon nazar,
aey dil-e-nazar shaam-e-ghum hum ko rula chuki bahut.

Apni qayaadaton mein ab dhoondenge log manzilen,
raahzanon ki rahbari raah dikha chuki bahut. !!

– Click Here For Habib Jalib Poetry, Poems  Collection

Firaq Ek Nayi Soorat Nikal Toh Sakti Hai..

Firaq Gorakhpuri Poetry

Firaq ek nayi soorat nikal toh sakti hai,
ba-qaul uss aankh ke duniya badal toh sakti hai.

Tere khyaal ko kuchh chup si lag gayi warna,
kahaaniyon se shab-e-ghum behal toh sakti hai.

Ab itni band nahin ghum-kadon ki bhi raahen,
hawa-e-koocha-e-mahboob chal toh sakti hai.

Badalta jaaye ghum-e-rozgaar ka markaz,
ye chaal gardish-e-ayyaam chal toh sakti hai.

Teri nigaah sahara na de toh baat hai aur,
ki girte girte bhi duniya sambhal toh sakti hai.

Na bhoolna ye hai taakhir husn ki taakhir,
firaq‘aayi hui maut tal toh sakti hai. !!

–  Click Here For Firaq Gorakhpuri Poetry Collection

Tanha Tanha Dukh Jhelenge Mehfil Mehfil Gaayenge..

Tanha tanha dukh jhelenge mehfil mehfil gaayenge,
jab tak aansoo paas rahenge tab tak geet sunaayenge.

Tum jo socho woh tum jaano hum toh apni kehte hain,
der na karna ghar aane mein warna ghar kho jaayenge.

Bachchon ke chhote haathon ko chaand sitaare chhoone do,
chaar kitaaben padh kar ye bhi hum jaise ho jaayenge.

Achchhi soorat waale saare patthar dil hon mumkin hai,
hum toh uss din raaye denge jis din dhokha khaayenge.

Kin raahon se safar hai aasaan kaun sa rasta mushkil hai,
hum bhi jab thak kar baithenge auron ko samjhaayenge. !!

Nida Fazli

Benaam Sa Ye Dard Thehar Kyon Nahin Jaata..

Benaam sa ye dard thehar kyon nahin jaata,
jo beet gaya hai woh guzar kyon nahin jaata.

Sab kuchh toh hai kya dhoondhti rehti hain nigaahen,
kya baat hai main waqt pe ghar kyon nahin jaata.

Woh ek hi chehra toh nahin saare jahaan mein,
jo door hai woh dil se utar kyon nahin jaata.

Main apni hi uljhi hui raahon ka tamaasha,
jaate hain jidhar sab main udhar kyon nahin jaata.

Woh khwaab jo barson se na chehra na badan hai,
woh khwaab hawaaon mein bikhar kyon nahin jaata. !!

Nida Fazli

Ye Raah Bahut Aasaan Nahin Jis Raah Pe..

Ye raah bahut aasaan nahin jis raah pe,
haath chhuda kar tum yun tanha chal nikli ho..

Iss khauf se, shayad raah bhatak jaao na kahin,
har mod pe maine nazm khadi kar rakhi hai..

Thak jaao agar aur zaroorat pad jaaye,
ek nazm ki ungli thaam ke waapas aa jaana. !!

Gulzar

Woh Khushboo Bheja Karti Thi, Main Nazamein Likhta Rehta Tha..

Lovers first meeting

Woh khushboo bheja karti thi main nazamein likhta rehta tha,
Woh hans ke ujaala karti thi, main subahein likha karta tha.

Geeli rett pe saahil ki doobte sooraj ki humraah,
Woh chup si chalti rehti thi, main sochein likhta rehta tha.

Deep wafa ke hote the ya shayad do taare the,
Woh mujh ko dekha karti thi, main aankhein likhta rehta tha.

Tapati dhoop ka rang bhi toh phoolon sa ho jata tha,
Woh zulfein khola karti thi, main shaamein likhta rehta tha.

Toot kar aksar chaahat mein, rooth kar yun hi ulfat mein..
Woh mujh ko jeeta karti thi, main maatein likhta rehta tha.

Misl-e khoon woh rugg rugg mein ban ke zist hi behti thi,
Mere jeene ki woh wazah thi, main saansein likhta rehta tha.

Dono ki pehli chaahat thi, dono toot ke milte the..
Woh waade karti rehti thi, main kasamein likhta rehta tha.

Rasm-e duniya ne aakhir hum ko bhatka dena tha,
Woh manzil dhoonda karti thi, main raahein likhta rehta tha.

Chand din jab aa thehre the uski meri judaai mein,
Main uske haath pe pehron phir lakeerein likhta rehta tha.

Jaan se pyaare se shikwa khud ko rushwa karna tha,
Main apne honthon pe chup ki bas moharein likhta rehta tha.

Din mein dard ki shiddat ko hans kar main seh jata tha,
Par bin uske jo kat’ti thi woh raatein likhta rehta tha.

Guzri yaad ke sab lamhe dil ko cheer ke rakhte the,
Main gumnaami ke sehraa mein haan ghaatein likhta rehta tha.

Uss bin mann ka aangan phir khaali khaali rehta tha,
Main tanhaai ke haathon par aah maatein likhta rehta tha.

Dasht-e wafa mein basne ka dekh haasil aye Sehranaward,
Main yaadein likhta rehta hun, main yaadein likhta rehta tha …!