Home / Tag Archives: qismat

Tag Archives: qismat

Dekhna Qismat Ki Aap Apne Pe Rashk Aa Jaaye Hai..

Mirza Ghalib Poetry

Dekhna qismat ki aap apne pe rashk aa jaaye hai,
main usey dekhun bhala kab mujh se dekha jaaye hai.

Haath dho dil se yehi garmi gar andeshe mein hai,
aabgina tundi-e-sahaba se pighala jaaye hai.

Ghair ko ya rab woh kyon kar mana-e-gustaakhi kare,
gar hayaa bhi uss ko aati hai toh sharma jaaye hai.

Shauq ko ye lat ki har dum naala kheenche jaaiye,
dil ki woh haalat ki dum lene se ghabra jaaye hai.

Door chashm-e-bad teri bazm-e-tarab se waah waah,
naghma ho jaata hai waan gar naala mera jaaye hai.

Garche hai tarz-e-taghaful parda-daar-e-raaz-e-ishq,
par hum aise khoye jaate hain ki woh pa jaaye hai.

Uss ki bazm-aaraaiyaan sun kar dil-e-ranjur yaan,
misl-e-naqsh-e-mudda-e-ghair baitha jaaye hai.

Ho ke aashiq woh pari-rukh aur naazuk ban gaya,
rang khulta jaaye hai jitna ki udta jaaye hai.

Naqsh ko uss ke musawwir par bhi kya kya naaz hain,
kheenchta hai jis qadar utna hi khinchta jaaye hai.

Saaya mera mujh se misl-e-dood bhaage hai ‘asad’
paas mujh aatish-ba-jaan ki kis se thehra jaaye hai. !!

– Click here for Mirza Ghalib Poetry collection

Ye Na Thi Humari Qismat Ki Wisaal e Yaar Hota..

Mirza Ghalib Poetry

Ye na thi humari qismat ki wisaal-e-yaar hota,
agar aur jeete rahte yehi intezaar hota.

Tere waade par jeeye hum toh ye jaan jhooth jaana,
ki khushi se mar na jaate agar aitbaar hota.

Teri naazuki se jaana ki bandha tha ahd boda,
kabhi tu naa tod sakta agar ustuwaar hota.

Koi mere dil se poochhe tere teer-e-neem-kash ko,
ye khalish kahan se hoti jo jigar ke paar hota.

Ye kahan ki dosti hai ki bane hain dost naaseh,
koi chaarasaaz hota koi ghumgusaar hota.

Rag-e-sang se tapakta woh lahoo ki phir na thamta,
jise ghum samajh rahe ho ye agar sharaar hota.

Kahun kis se main ki kya hai shab-e-ghum buri bala hai,
mujhe kya bura tha marna agar ek baar hota.

Hue mar ke hum jo ruswa hue kyon na gharq-e-dariya,
na kabhi janaaza uthta na kahin mazaar hota.

Usey kaun dekh sakta ki yagaana hai woh yakta,
jo dui ki boo bhi hoti toh kahin do-chaar hota.

Ye masaail-e-tasawwuf ye tera bayaan ‘ghalib
tujhe hum wali samajhte jo na baada-khwaar hota. !!

–  Click here for Mirza Ghalib Poetry collection

Aainon Mein Aks Na Hon Toh Hairat Rehti Hai..

Aainon mein aks na hon toh hairat rehti hai,
jaise khaali aankhon mein bhi wehshat rehti hai.

Har dum duniya ke hungaame ghere rakhte the,
jab se tere dhyaan lage hain fursat rehti hai.

Karni hai toh khul ke karo inkaar-e-wafa ki baat,
baat adhoori reh jaaye toh hasrat rehti hai.

Shehar-e sukhan mein aisa kuchh kar izzat ban jaaye,
sab kuchh mitti ho jaata hai izzat rehti hai.

Bante bante dheh jaati hai dil ki har taameer,
khwaahish ke behroop mein shayad qismat rehti hai.

Saaye larazte rehte hain shehron ki galyion mein,
rehte the insaan jahan ab dehshat rehti hai.

Mausam koi khushboo le kar aate jaate hain,
kya kaya hum ko raat gaye tak wehshat rehti hai.

Dhyaan mein mela sa lagta hai beeti yaadon ka,
aksar uss ke ghum se dil ki sohbat rehti hai.

Phoolon ki takhti par jaise rangon ki tehreer,
lauh-e-sukhan par aise ‘amjad’ shohrat rehti hai. !!

Amjad Islam Amjad 

Zakhm Kya Kya Na Zindagi Se Mile..

Rude girl with her lover

Zakhm kya kya na zindagi se mile,
Khwaab palkon se berukhi se mile.

Aap ko mil gaye hain qismat se,
Hum zamaane mein kab kisi ko mile ?

Aise khushbu se mil raha hai gulaab,
Jis tarah raat, roshani se mile.

Hum faqeeron se dosti hai magar,
Uss se kehna ki saadagi se mile.

Dil mein rakhte hain ehtiyaat se hum,
Zakhm jo jo bhi jis kisi se mile.

Zindagi se gale mile toh laga,
Ajnabi jaise ajnabi se mile.

Uss ke seene mein dil nahin tha ‘Batool
Hum ne socha tha aadmi se mile. !!

Jab Bhi Hansne Ke Zamaane Aaye..

Jab bhi hansne ke zamaane aaye,
Zakham phir yaad puraane aaye.

Baarha unko manaaya toh humein,
Rooth jaane ke bahaane aaye.

Phir mujhe toot ke chaha uss ne,
Phir bichhadne ke zamaane aaye.

Muskura kar humein milnae waale,
Zindagi bhar ko rulaane aaye.

Kitni mehroom thi neendein unki,
Khwaab bhi jin ko jagaane aaye.

Teri chahat ne thehrne na diya,
Raah mein kitne thikaane aaye.

Tu nahi hai toh hawa ka jhaunka,
Ghar ki zanjeer hilaane aaye.

Dil bujha hai na jale hain khemey,
Aap kyon jashn manaane aaye.?

Raas aaya jinhe sehra ‘Mohsin
Unki qismat mein khazaane aaye. !!

Aye Ishq Humein Barbaad Na Kar..

waiting girl, restless girl in love

 

Aye Ishq Na Chhed Aa Aa Ke Humein,
Hum Bhoole Huon Ko Yaad Na Kar.

Pehle Hi Bahut Nashad Hain Hum,
Tu Aur Humein Nashad Na Kar.

Qismat Ka Sitam Hi Kaafi Hai..
Ye Taza Sitam Ijaad Na Kar,
Yun Zulm Na Kar, Bedaad Na Kar.

Raaton Ko Uth Uth Kar Rote Hain,
Ro Ro Ke Dua’en Karte Hain.

Aankhon Mein Tasawwur, Dil Mein Khalish
Sar Dhunte Hain, Aahein Bharte Hain.

Aye Ishq Ye Kaisa Rog Laga?
Jeete Hain Na Zalim Marte Hain,
Inn Khwaabon Se Yun Aazaad Na Kar.

Jis Din Se Bandha Hai Dhyaan Tera
Ghabraaye Hue Se Rehte Hain..

Har Waqt Tasawwur Kar Kar Ke,
Sharmaaye Huye Se Rehte Hain.

Kumhlaaye Hue Phoolon Ki Tarah..
Kumhlaaye Hue Se Rehte Hain,
Pamaal Na Kar, Bedaad Na Kar.

Aye Ishq Humein Barbaad Na Kar..
Aye Ishq Humein Barbaad Na Kar…!!