Home / Tag Archives: Qayamat Shayari

Tag Archives: Qayamat Shayari

Hoti Hai Tere Naam Se Wehshat Kabhi Kabhi..

Hoti hai tere naam se wehshat kabhi kabhi,
barham hui hai yun bhi tabiyat kabhi kabhi.

Aye dil kise naseeb ye taufeeq-e-iztiraab,
milti hai zindagi mein ye raahat kabhi kabhi.

Tere karam se hai aye alam-e-husn-aafreen,
dil ban gaya hai dost ki khalwat kabhi kabhi.

Josh-e-junoon mein dard ki tughyaniyon ke saath,
ashkon mein dhal gayi teri soorat kabhi kabhi.

Tere qareeb reh ke bhi dil mutmain na tha,
guzri hai mujh pe ye bhi qayaamat kabhi kabhi.

Kuchh apna hosh tha na tumhara khyal tha,
yun bhi guzar gayi shab-e-furqat kabhi kabhi.

Aye dost hum ne tark-e-mohabbat ke bawajood,
mehsoos ki hai teri zaroorat kabhi kabhi. !!

Nasir Kazmi

Hoti Hai Tere Naam Se Wehshat Kabhi Kabhi..
5 (100%) 1 vote

Koi Had Nahin Hai Kamaal Ki..

Koi had nahin hai kamaal ki,
koi had nahin hai jamaal ki.

Wahi qurb-o door ki manzilen,
wahi shaam khwaab-o khyaal ki.

Na mujhe hi uss ka pata koi,
na usey khabar mere haal ki.

Ye jawaab meri sadaa ka hai,
ki sadaa hai uss ke sawaal ki.

Ye namaaz-e asr ka waqt hai,
ye ghadi hai din ke zawaal ki.

Woh qayaamaten jo guzar gayi,
thi amaanaten kai saal ki.

Hai ‘munir teri nigaah mein,
koi baat gehre malaal ki

Hai ‘munir subah-e safar nayi,
gayi baat shab ke malaal ki .!!

Munir Niazi

Koi Had Nahin Hai Kamaal Ki..
5 (100%) 3 votes

Daastaan-e-Ghum-e-Dil Un Ko Sunaayi Na Gayi..

Daastaan-e-ghum-e-dil un ko sunaayi na gayi,
baat bigadi thi kuchh aisi ki banaayi na gayi.

Sab ko hum bhool gaye josh-e-junoon mein lekin,
ek teri yaad thi aisi jo bhulaayi na gayi.

Ishq par kuchh na chala deeda-e-tar ka qaaboo,
uss ne jo aag laga di woh bujhaayi na gayi.

Pad gaya husn-e-rukh-e-yaar ka partav jis par,
khaak mein mil ke bhi iss dil ki safaayi na gayi.

Kya uthaayegi saba khaak meri uss dar se,
ye qayaamat toh khud un se bhi uthaayi na gayi. !!

Jigar Moradabadi

Daastaan-e-Ghum-e-Dil Un Ko Sunaayi Na Gayi..
5 (100%) 2 votes

Ab Apni Anaa Se Mujhe Dar Lagne Laga Hai..

Ab apni anaa se mujhe dar lagne laga hai,
sehra mein na jaane kahin sar lagne laga hai.

Aage ka safar sirf meri rooh karegi,
ab jism bhi samaan-e safar karne laga hai.

Lagta hai ki dehleez par aa pahunchi qayaamat,
ek bhai ko ek bhai se dar lagne laga hai.

Waise toh koi cheez nahin badli hai lekin,
tum jab se gaye ho mujhe dar lagne laga hai.

Aye sehra-navardi mujhe aabadi se le chal,
kuchh roz se zindaan mujhe ghar lagne laga hai.

Unko nahin maloom ki ghar hote hain kaise,
bachchon ko toh footpath hi ghar lagne laga hai. !!

Munawwar Rana

Ab Apni Anaa Se Mujhe Dar Lagne Laga Hai..
5 (100%) 1 vote