Home / Tag Archives: phool-shayari

Tag Archives: phool-shayari

Sar Se Chaadar Badan Se Qabaa Le Gayi..

Sar se chaadar badan se qabaa le gayi,
zindagi hum faqeeron se kya kya le gayi.

Meri mutthi mein sookhe hue phool hain,
khusbuon ko udaa kar hawaa le gayi.

Main samundar ke seene mein chattaan tha,
raat ek mauj aayi baha le gayi.

Hum jo kaaghaz the ashqon se bheege hue,
kyon chiraaghon ki lau tak hawaa le gayi.

Chaand ne raat mujh ko jaga kar keha,
ek ladki tumhara pata le gayi.

Meri shoharat siyaasat se mahfoos hai,
ye tawaayaf bhi ismat bacha le gayi. !!

Bashir Badr

Raat Aankhon Mein Dhali Palkon Pe Jugnu Aaye..

Shahrukh_Khan_srk_anushka_sharma_romantic_sad_in_jab_tak_hai_jaan_shayari_poetry_bashir_badr

Raat aankhon mein dhali palkon pe jugnu aaye,
hum hawaaon ki tarah jaa ke usey chhoo aaye.

Bas gayi hai mere ehsaas mein ye kaisi mehak,
koi khushboo main lagaaun teri khushboo aaye.

Mera aaina bhi ab meri tarah paagal hai,
aaina dekhne jaaun toh nazar tu aaye.

Kis taklluf se gale milne ka mausam aaya,
kuchh kaaghaz ke phool liye kaanch ke baazu aaye.

Uss ka dil, dil nahin patthar ka kaleja hoga
jis ko phoolon ka hunar, aansoo ka jaadoo aaye.

Uss ne chhoo kar mujhe patthar se phir insaan kiya,
muddaton baad meri aankhon mein aansoo aaye.

Un faqeeron ko ghazal apni sunaate rahiyo,
jin ki aawaaz mein darghaahon ki khushboo aaye. !!

Bashir Badr

Main Kab Kehta Hun Woh Acchha Bahut Hai..

Main kab kehta hun woh acchha bahut hai,
magar uss ne mujhe chaaha bahut hai.

Khuda iss shehar ko mehfooz rakhe,
ye bachchon ki tarah hansta bahut hai.

Main tujh se roz milna chaahta hun,
magar iss raah mein khatra bahut hai.

Mera dil baarishon mein phool jaisa,
ye bachcha raat mein rota bahut hai.

Isey aansoo ka ek qatra na samjho,
kuaan hai aur ye gehra bahut hai.

Usey shohrat ne tanha kar diya hai
Samandar hai magar pyaasa bahut hai

Main ek lamhe mein sadiyaan dekhta hun,
tumhaare saath ek lamha bahut hai.

Mera hansna zaroori ho gaya hai,
yahan har shakhs sanjeeda bahut hai. !!

Bashir Badr

Khush Rahe Ya Bahut Udaas Rahe..

Khush rahe ya bahut udaas rahe,
zindagi tere aas – paas rahe.

Woh nahin hai toh uski aas rahe,
ek jaaye toh ek paas rahe.

Jab bhi kasne laga utaar diya,
iss badan par kayi 1ibaas rahe.

Ghul gaye apni badnaseebi mein,
woh sitaare jo apne paas rahe.

Aaj hum sab ke saath khoob hanse,
aur phir der tak udaas rahe.

Dono ek dusre ka munh dekhen,
aaina aaine ke paas rahe. !!

—————————————————

—————————————————

Khush rahe ya bahut udaas rahe,
zindagi tere aas – paas rahe.

Chaand in badliyon se niklega,
koi aayega dil ko aas rahe.

Hum muhabbat ke phool hain shayad,
koi kanta bhi aas – paas rahe.

Mere seene mein iss tarah bas jaa,
meri saanson mein teri baas rahe.

Aaj hum sab ke saath khoob hanse,
aur phir der tak udaas rahe. !!

Bashir Badr

Aankhon Mein Raha Dil Mein Utar Kar Nahin Dekha..

Aankhon mein raha dil mein utar kar nahin dekha,
kashti ke musaafir ne samandar nahin dekha.

Bewaqt agar jaaunga sab chonk padenge,
ek umar hui din mein kabhi ghar nahin dekha.

Jis din se chala hun meri manzil pe nazar hai,
aankon ne kabhi meel ka patthar nahin dekha.

Ye phool mujhe koi wiraasat mein mile hain,
tum ne mera kaanton bhara bistar nahin dekha.

Patthar mujhe kehta hai mera chaahne wala,
main mom hun uss ne mujhe chhu kar nahin dekha. !!

Bashir Badr

Khoobsoorat Jheel Mein Hansta Kanwal Bhi Chahiye..

Khoobsoorat jheel mein hansta kanwal bhi chahiye,
hai galaa acchha toh phir acchhi ghazal bhi chahiye.

Uth ke iss hansti hui duniya se jaa sakta hun main,
ahl-e mehfil ko magar mera badal bhi chahiye.

Sirf phoolon se sajaawat pedd ki mumkin nahin,
meri shaakhon ko naye mausam mein phal bhi chahiye.

Aye meri khaak-e watan tera sagaa beta hun main,
kyon rahun footpaath par mujh ko mahal bhi chahiye.

Dhoop waadon ki buri lagne lagi hai ab humein,
sirf taareefen nahin urdu ka hal bhi chahiye.

Tune saari baaziyan jeeti hain mujh par baith kar,
ab main burha ho raha hun astbal bhi chahiye. !!

Suna Hai Log Usey Aankh Bhar Ke Dekhte Hain..

Painting of beautiful women- ahmad faraz shayari- poetry picture- beautiful painting

Suna hai log usey aankh bhar ke dekhte hain,
so uss ke shehar mein kuchh din thehar ke dekhte hain.

Suna hai rabt hai uss ko kharaab haalon se,
so apne aap ko barbaad kar ke dekhte hain.

Suna hai dard ki gaahak hai chashm-e naaz uss ki,
so hum bhi uss ki gali se guzar ke dekhte hain.

Suna hai uss ko bhi hai sher-o shayari se shaghaf,
so hum bhi mojzey apne hunar ke dekhte hain.

Suna hai bole toh baaton se phool jhadte hain,
ye baat hai toh chalo baat kar ke dekhte hain.

Suna hai raat usey chaand takta rehta hai,
sitaare baam-e falak se utar ke dekhte hain.

Suna hai din ko usey titliyan staati hain,
suna hai raat ko jugnu thehar ke dekhte hain.

Suna hai hashr hain uss ki ghazaal si aankhein,
suna hai uss ko hiran dasht bhar ke dekhte hain.

Suna hai raat se badh kar hain kaakulen uss ki,
suna hai shaam ko saaye guzar ke dekhte hain.

Suna hai uss ki siyaah chashmagi qayamat hai,
so uss ko surma-farosh aah bhar ke dekhte hain.

Suna hai uss ke labbon se ghulaab jalte hain,
so hum bahaar pe ilzaam dhar ke dekhte hain.

Suna hai aaina timsaal hai jabeen uss ki,
jo saada dil hain usey ban sanwar ke dekhte hain.

Suna hai jab se hamaail hai uski gardan mein,
mizaaj aur hi laal-o gouhar ke dekhte hain.

Suna hai chashm-e tasawwur se dasht-e imkaan mein,
palang zaaviye uss ki kamar ke dekhte hain.

Suna hai uss ke badan ki taraash aisi hai,
ki phool apni qabaayen katar ke dekhte hain.

Woh sarv-qadd hai magar be-gul-e-muraad nahin,
ki uss shajar pe shagoofe samar ke dekhte hain.

Bas ek nigaah se lut,ta hai qaafila dil ka,
so raah-rawan-e-tamanna bhi dar ke dekhte hain.

Suna hai uss ke shabistaan se mutassil hai bahisht,
makeen udhar ke bhi jalwe idhar ke dekhte hain.

Ruke toh gardishein uska tawaaf karti hain,
chale toh uss ko zamaane thehar ke dekhte hain.

Kise naseeb ki be-pairhan usey dekhe,
kabhi kabhi dar-o deewar ghar ke dekhte hain.

Kahaniyan hi sahi sab mubalghe hi sahi,
agar woh khwaab hai tabeer kar ke dekhte hain.

Ab uss ke shehar mein thehrein ki kooch kar jayen,
Faraz aao sitaare safar ke dekhte hain. !!