Home / Tag Archives: pareshaan-shayari

Tag Archives: pareshaan-shayari

Main Talkhi-e-Hayat Se Ghabra Ke Pee Gaya..

Main talkhi-e-hayat se ghabra ke pee gaya,
ghum ki siyaah raat se ghabra ke pee gaya.

Itni daqeeq shai koi kaise samajh sake,
yazdaan ke waaqiyaat se ghabra ke pee gaya.

Chhalke hue the jaam pareshaan thi zulf-e-yaar,
kuchh aise haadsaat se ghabra ke pee gaya.

Main aadmi hun koi farishta nahin huzoor,
Main aaj apni zaat se ghabra ke pee gaya.

Duniya-e-haadsaat hai ek dardnaak geet,
duniya-e-haadsaat se ghabra ke pee gaya.

Kaante toh khair kaante hain iss ka gila hi kya,
phoolon ki waardaat se ghabra ke pee gaya.

Saghar’ woh keh rahe the pee lijiye huzoor,
un ki guzaarishaat se ghabra ke pee gaya. !!

Saghar Siddiqui

Ye Aankh Kyon Hai Ye Haath Kya Hai..

Ye aankh kyon hai ye haath kya hai,
ye din hai kya cheez raat kya hai.

Firaaq-e-khursheed-o-maah kyon hai,
ye un ka aur mera saath kya hai.

Gumaan hai kya iss sanam-kade par,
khyaal-e-marg-o-hayaat kya hai.

Fughaan hai kis ke liye dilon mein,
khrosh-e-dariya-e-zaat kya hai.

Falak hai kyon qaid-e-mustaqil mein,
zameen pe harf-e-najaat kya hai.

Hai kaun kis ke liye pareshaan,
pata toh de asal baat kya hai.

Hai lams kyon raigaan humesha,
fanaa mein khauf-e-sibaat kya hai.

Munir’ iss shehar-e-ghumzada par,
tera ye sehar-e-nashaat kya hai. !!

Munir Niazi

Tum Aaye Ho Tumhe Bhi Aazmaa Kar Dekh Leta Hun..

sad man

Tum aaye ho tumhe bhi aazmaa kar dekh leta hun,
tumhare saath bhi kuchh door jaa kar dekh leta hun.

Hawaayen jin ki andhi khidkiyon par sar patakti hain,
main unn kamron mein phir shamayen jala kar dekh leta hun.

Ajab kya iss qareene se koi soorat nikal aaye,
teri baaton ko khwaabon se mila kar dekh leta hun.

Sehar dum kirchiyan toote hue khwaabon ki milti hain,
toh bistar jhaad kar chaadar hata kar dekh leta hun.

Bahut dil ko dukhata hai jab *dard-e-mahjoori
teri yaadon ki jaanib muskura ke dekh leta hun.

Udaa kar rang kuchh honthon se, kuchh aankhon se, kuchh dil se
gaye lamhon ko tasweeren bana kar dekh leta hun.

Nahin ho tum bhi woh ab mujh se yaaro kya chhupaoge,
hawa ki simt ko mitti udaa kar dekh leta hun.

Suna hai be-niyaazi hi ilaaz-e naumeedi hai,
ye nuskha bhi koi din aazmaa kar dekh leta hun.

Mohabbat mar gayi ‘Mushtaaq’ lekin tum na maanoge,
main ye afwaah bhi tum ko suna kar dekh leta hun. !!

*[ dard-e-mahjoori=pain of sepration ]