Home / Tag Archives: nigaah-shayari

Tag Archives: nigaah-shayari

Khula Hai Dar Magar Tera Intezaar Jata Raha..

Khula hai dar magar tera intezaar jaata raha,
pyaar toh hai magar aitbaar jata raha.

Kisi ki aankh mein masti toh aaj bhi hai wahi,
magar kabhi jo humein tha khumaar jaata raha.

Kabhi jo seene mein ek aag thi woh sard hui,
kabhi nigaah mein jo tha sharaar jaata raha.

Ajab sa chain tha hum ko ki jab the hum bechain,
qaraar aaya toh jaise qaraar jaata raha.

Kabhi toh meri bhi sunwaayi hogi mehfil mein,
main ye umeed liye baar baar jaata raha. !!

Javed Akhtar

Itna Toh Zindagi Mein Kisi Ke Khalal Pade..

Itna toh zindagi mein kisi ke khalal pade,
hanse se ho sukoon na rone se kal pade.

Jis tarah hans raha hun main pee pee ke ashk-e-ghum,
yun doosra hanse toh kaleja nikal pade.

Ek tum ki tum ko fikr-e nasheb-o faraz hai,
ek hum ki chal pade toh behar-haal chal pade.

Saaqi sabhi ko hai ghum-e tishna-labi magar,
mayy hai ussi ke naam pe jis ke ubal pade.

Muddat ke baad uss ne jo ki lutf ki nigaah,
jee khush toh ho gaya magar aansoo nikal pade. !!

Kaifi Azmi

Mere Ashkon Ne Kayi Aankhon Mein Jal Thal Kar Diya..

Mere ashkon ne kayi aankhon mein jal thal kar diya,
ek paagal ne bahut logon ko paagal kar diya.

Apni palkon par sajaa kar mere aansoo aap ne,
raaste ki dhool ko aankhon ka kaajal kar diya.

Maine dil de kar usey ki thi wafa ki ibtida,
uss ne dhokha de ke ye qissa mukammal kar diya.

Ye hawaayen kab nigaahen pher lein kis ko khabar,
shohraton ka takht jab toota toh paidal kar diya.

Devtaaon aur khudaaon ki lagaayi aag ne,
dekhte hi dekhte basti ko jungle kar diya.

Zakhm ki soorat nazar aate hain chehron ke nuqoosh,
hum ne aainon ko tehzeebon ka maqtal kar diya.

Shehar mein charcha hai aakhir aisi ladki kaun hai,
jis ne achchhe-khaase ek shaayar ko paagal kar diya. !!

Rahat Indori

Uthi Nigaah Toh Apne Hi Ru-ba-ru Hum The..

Uthi nigaah toh apne hi ru-ba-ru hum the,
zameen aaina-khana thi chaar soo hum the.

Dinon ke baad achaanak tumhara dhyan aaya,
khuda ka shukr ki uss waqt ba-vazu hum the.

Woh aaina toh nahin tha par aaine sa tha,
woh hum nahin the magar yaar hu-ba-hu hum the.

Zameen pe ladte hue aasmaan ke narge mein,
kabhi kabhi koi dushman kabhu kabhu hum the.

Humara zikr bhi ab jurm ho gaya hai wahan,
dinon ki baat hai mehfil ki aabroo hum the.

Khyaal tha ki ye pathraav rok dein chal kar,
jo hosh aaya toh dekha lahoo lahoo hum the. !!

Rahat Indori

Koi Had Nahin Hai Kamaal Ki..

Koi had nahin hai kamaal ki,
koi had nahin hai jamaal ki.

Wahi qurb-o door ki manzilen,
wahi shaam khwaab-o khyaal ki.

Na mujhe hi uss ka pata koi,
na usey khabar mere haal ki.

Ye jawaab meri sadaa ka hai,
ki sadaa hai uss ke sawaal ki.

Ye namaaz-e asr ka waqt hai,
ye ghadi hai din ke zawaal ki.

Woh qayaamaten jo guzar gayi,
thi amaanaten kai saal ki.

Hai ‘munir teri nigaah mein,
koi baat gehre malaal ki

Hai ‘munir subah-e safar nayi,
gayi baat shab ke malaal ki .!!

Munir Niazi

Saaqi Ki Har Nigaah Pe Bal Kha Ke Pee Gaya..

Saaqi ki har nigaah pe bal kha ke pee gaya,
leharon se khelta hua lehra ke pee gaya.

Bekaifiyon ke kaif se ghabra ke pee gaya,
tauba ko tod taad ke tharra ke pee gaya.

Zahid ye meri shokhi-e-rindana dekhna,
rahmat ko baaton baaton mein behla ke pee gaya.

Sarmasti-e-azal mujhe jab yaad aa gayi,
duniya-e-aitbaar ko thukra ke pee gaya.

Aye rahmat-e-tamaam meri har khata muaaf,
main inteha-e-shauq mein ghabra ke pee gaya.

Peeta baghair izan ye kab thi meri majaal,
dar-parda chashm-e-yaar ki sheh pa ke pee gaya.

Uss jaan-e-maikada ki qasam baarha ‘Jigar
kul alam-e-bisaat pe main chhaa ke pee gaya. !!

Jigar Moradabadi

Dil Mein Kisi Ke Raah Kiye Jaa Raha Hun Main..

Dil mein kisi ke raah kiye jaa raha hun main,
kitna haseen gunaah kiye jaa raha hun main.

Duniya-e-dil tabaah kiye jaa raha hun main,
sarf-e-nigaah-o-aah kiye jaa raha hun main.

Fard-e-amal siyaah kiye jaa raha hun main,
rahmat ko bepanaah kiye jaa raha hun main.

Aisi bhi ek nigaah kiye jaa raha hun main,
zarron ko mehr-o-maah kiye jaa raha hun main.

Mujh se lage hain ishq ki azmat ko chaar chaand,
khud husn ko gawaah kiye jaa raha hun main.

Daftar hai ek maani-e-be-lafz-o-saut ka,
saada si jo nigaah kiye ja raha hun main.

Aage qadam badhaayen jinhen sujhta nahin,
raushan charaagh-e-raah kiye jaa raha hun main.

Maasoomi-e-jamaal ko bhi jis pe rashk ho,
aise bhi kuchh gunaah kiye jaa raha hun main.

Tanqeed-e-husn maslahat-e-khaas-e-ishq hai,
ye jurm gaah gaah kiye jaa raha hun main.

Gulshan-parast hun mujhe gul hi nahin azeez,
kaanton se bhi nibaah kiye jaa raha hun main.

Yun zindagi guzaar raha hun tere baghair,
jaise koi gunaah kiye jaa raha hun main.

Mujh se adaa hua hai ‘jigar justjoo ka haq,
har zarre ko gawaah kiye jaa raha hun main. !!

Jigar Moradabadi