Home / Tag Archives: neend

Tag Archives: neend

Koi Ummeed Bar Nahin Aati..

Mirza Ghalib Poetry

Koi ummeed bar nahin aati,
koi soorat nazar nahin aati.

Maut ka ek din mu.ayyan hai,
neend kyon raat bhar nahin aati.

Aage aati thi haal-e-dil pe hansi,
ab kisi baat par nahin aati.

Jaanta hun sawaab-e-taa.at-o-zohd,
par tabeeyat idhar nahin aati.

Hai kuchh aisi hi baat jo chup hun,
warna kya baat kar nahin aati.

Kyon na cheekhun ki yaad karte hain,
meri aawaaz gar nahin aati.

Daagh-e-dil gar nazar nahin aata,
boo bhi aey chaaraagar nahin aati.

Hum wahan hain jahan se hum ko bhi,
kuchh humaari khabar nahin aati.

Marte hain aarzoo mein marne ki,
maut aati hai par nahin aati.

Kaaba kis munh se jaaoge ‘ghalib’
sharm tum ko magar nahin aati. !!

–  Click here for Mirza Ghalib Poetry collection

Ek Khwaab Musalsal Aata Hai, Tera Chehra Roop Sajaata Hai..

Sleeping Beutiful Girl

Ek khwaab musalsal aata hai,
Tera chehra roop sajata hai. !
Phoolon pe bhanwre ki maanind,
Mere dil ko woh behlaata hai. !
Aankhon ke surmai rangon se,
Mere mann ko raah dikhata hai. !
Apne lams ki bheeni khushbo se,
Mere ehsaas ko woh mehkaata hai. !
Dhadkano ke sur aur sargam se,
Woh mujh ko geet sunaata hai. !
Chaand se le kar husn ki sougaat,
Mujhe neend se woh jagaata hai. !
Apni saanson ki dheemi aanch pe,
Mere tann ko woh sulgaata hai. !
Ek khwaab musalsal aata hai,
Tera chehra roop sajaata hai …!!

Umar Ki Saari Thakan Laad Ke Ghar Jaata Hun..

Umar ki saari thakan laad ke ghar jaata hun,
raat bistar pe main sota nahin mar jaata hun.

Aksar auqaat bhare shehar ke sannate mein,
iss qadar zor se hansta hun ki dar jaata hun.

Mere aane ki khabar sirf diya rakhta hai,
main hawaaon ki tarah aa ke guzar jaata hun.

Dil thehar jaata hai bhooli hui manzil mein kahin,
main kisi doosre raste se guzar jaata hun.

Simta rehta hun bahut halka-e-ehbaab mein main,
chaar-diwari mein aate hi bikhar jaata hun.

Maine apne khilaaf khud hi gawaahi di hai ‘tahir
agar woh tere haq mein nahin hai toh mukar jaata hun. !!

 

Beqaraari Si Beqaraari Hai..

Beqaraari si beqaraari hai,
Wasl hai aur firaaq taari hai.

Jo guzaari na ja saki hum se,
hum ne woh zindagi guzaari hai.

Uss se kahiyo ki dil ki galiyon mein,
raat din teri intezaari hai.

Ek mehak samt-e jaan se aayi thi,
main ye samjha teri sawaari hai.

Haadson ka hisaab hai apna,
warna har aan sab ki baari hai.

Bin tumhaare kabhi nahi aayi,
kya meri neend bhi tumhaari hai?

nighaah-baan kya hue ki logon par,
apna saaya bhi ab toh bhari hai.

Khush rahe tu ki zindagi apni,
umar bhar ki ummeed’wari hai.

Aap mein kaise aaun main tujh bin?
saans jo chal rahi hai aari hai.

Hijar ho ya wisaal ho kuchh ho,
hum hain aur uski yaadgaari hai. !!

Jab Bhi Hansne Ke Zamaane Aaye..

Jab bhi hansne ke zamaane aaye,
Zakham phir yaad puraane aaye.

Baarha unko manaaya toh humein,
Rooth jaane ke bahaane aaye.

Phir mujhe toot ke chaha uss ne,
Phir bichhadne ke zamaane aaye.

Muskura kar humein milnae waale,
Zindagi bhar ko rulaane aaye.

Kitni mehroom thi neendein unki,
Khwaab bhi jin ko jagaane aaye.

Teri chahat ne thehrne na diya,
Raah mein kitne thikaane aaye.

Tu nahi hai toh hawa ka jhaunka,
Ghar ki zanjeer hilaane aaye.

Dil bujha hai na jale hain khemey,
Aap kyon jashn manaane aaye.?

Raas aaya jinhe sehra ‘Mohsin
Unki qismat mein khazaane aaye. !!