Home / Tag Archives: nazar-shayari

Tag Archives: nazar-shayari

Chaahaten Mausami Parinde Hain Rut Badalte Hi Laut Jaate Hain..

Chaahaten mausami parinde hain rut badalte hi laut jaate hain,
ghonsle ban ke toot jaate hain daagh shaakhon pe chahchahaate hain.

Aane waale bayaaz mein apni jaane waalon ke naam likhte hain,
sab hi auron ke khaali kamron ko apni apni tarah sajaate hain.

Maut ek waahima hai nazron ka saath chhutTa kahan hai apno ka,
jo zameen par nazar nahin aate chaand taaron mein jagmagaate hain.

Ye musawwir ajeeb hote hain aap apne habeeb hote hain,
dusron ki shabaahaten le kar apni tasweer hi banaate hain.

Yun hi chalta hai karobaar-e-jahaan hai zaroori har ek cheez yahan,
jin darakhton mein phal nahin aate woh jalaane ke kaam aate hain. !!

Nida Fazli

Jhuki Jhuki Si Nazar Beqaraar Hai Ki Nahin..

Jhuki jhuki si nazar be-qaraar hai ki nahin,
daba daba sa sahi dil mein pyaar hai ki nahin.

Tu apne dil ki jawaan dhadkano ko gin ke bata,
meri tarah tera dil be-qaarar hai ki nahin.

Woh pal ki jis mein mohabbat jawaan hoti hai,
uss ek pal ka tujhe intezaar hai ki nahin.

Teri ummeed pe thukra raha hun duniya ko,
tujhe bhi apne pe ye aitbaar hai ki nahin. !!

Kaifi Azmi

Shor Yunhi Na Parindon Ne Machaaya Hoga..

Shor yunhi na parindon ne machaaya hoga,
koi jungle ki taraf shehar se aaya hoga.

Ped ke kaatne walon ko ye maloom toh tha,
jism jal jaayenge jab sar pe na saaya hoga.

Baani-e-jashn-e-bahaaran ne ye socha bhi nahin,
kis ne kaanton ko lahoo apna pilaaya hoga.

Bijli ke taar pe baitha hua hansta panchhi,
sochta hai ki woh jungle toh paraaya hoga.

Apne jungle se jo ghabra ke ude the pyaase,
har saraab un ko samundar nazar aaya hoga. !!

Kaifi Azmi

Tumhare Naam Par Maine Har Aafat Sar Pe Rakhi Thi..

Tumhare naam par maine har aafat sar pe rakhi thi,
nazar sholon pe rakhi thi zubaan patthar pe rakhi thi.

Humare khwaab toh shehron ki sadkon par bhatakte the,
tumhari yaad thi jo raat bhar bistar pe rakhi thi.

Main apna azm le kar manzilon ki samt nikla tha,
mashaqqat haath pe rakhi thi qismat ghar pe rakhi thi.

Inhi saanson ke chakkar ne humen woh din dikhaaye the,
humare paanv ki mitti humare sar pe rakhi thi.

Sehar tak tum jo aa jaate toh manzar dekh sakte the,
diye palkon pe rakhe the shikan bistar pe rakhi thi. !!

Rahat Indori

Hansi Chhupa Bhi Gaya Aur Nazar Mila Bhi Gaya..

Hansi chhupa bhi gaya aur nazar mila bhi gaya,
ye ek jhalak ka tamasha jigar jala bhi gaya.

Utha tu jaa bhi chuka tha ajeeb mehmaan tha,
sadaayen de ke mujhe neend se jaga bhi gaya.

Ghazab hua jo andhere mein jal uthi bijli,
badan kisi ka tilismaat kuchh dikha bhi gaya.

Na aaya koi lab-e-baam shaam dhalne lagi,
wufoor-e-shoq se aankhon mein khoon aa bhi gaya.

Hawa thi gehri ghata thi hina ki khushboo thi,
ye ek raat ka kissa lahoo rula bhi gaya.

Chalo ‘munir chalein ab yahan rahein bhi toh kyon,
woh sang-dil toh yahan se kahin chala bhi gaya .!!

Munir Niazi

Jab Bhi Ghar Ki Chhat Pe Jaayen Naaz Dikhaane Aa Jaate Hain..

Jab bhi ghar ki chhat pe jaayen naaz dikhaane aa jaate hain,
kaise kaise log humare jee ko jalaane aa jaate hain.

Din bhar jo sooraj ke dar se galiyon mein chhupe rahte hain,
shaam aate hi aankhon mein woh rang puraane aa jaate hain.

Jin logon ne un ki talab mein sehraaon ki dhool udaayi,
ab ye haseen un ki qabaron par phool chadhaane aa jaate hain.

Kaun sa woh jaadoo hai jis se ghum ki andheri sard guphaa mein,
laakh nisaai saans dilon ke rog mitaane aa jaate hain.

Ze ki reshmi rumaalon ko kis kis ki nazron se chhupaayen,
kaise hain woh log jinhen ye raaz chhupaane aa jaate hain.

Hum bhi ‘munir ab duniya-daari kar ke waqt guzaarenge,
hote hote jeene ke bhi laakh bahaane aa jaate hain. !!

Munir Niazi

Hai Shakl Teri Gulaab Jaisi..

Hai shakl teri gulaab jaisi,
nazar hai teri sharaab jaisi.

Hawaa sahar ki hai inn dinon mein,
badalte mausam ke khwaab jaisi.

Sadaa hai ek dooriyon mein ojhal,
meri sadaa ke jawaab jaisi.

Woh din tha dozakh ki aag jaisa,
woh raat gahre azaab jaisi.

Ye shehar lagta hai dasht jaisa,
chamak hai uss ki saraab jaisi.

Munir’ teri ghazal ajab hai,
kisi safar ki kitaab jaisi. !!

Munir Niazi

Bechain Bahut Phirna Ghabraaye Hue Rahna..

Bechain bahut phirna ghabraaye hue rahna,
ek aag si jazbon ki dahakaaye hue rahna.

Chhalkaaye hue chalana khushboo lab-e-laali ki,
ek baagh sa saath apne mehkaaye hue rahna.

Uss husn ka shewa hai jab ishq nazar aaye,
parde mein chale jana, sharmaaye hue rahna.

Ek shaam si kar rakhna kaajal ke karishme se,
ek chaand sa aankhon mein chamkaaye hue rahna.

Aadat hi bana li hai tum ne toh ‘munir apni
jis shehar mein bhi rahna uktaaye hue rahna. !!

Munir Niazi

Ishq Ko Be-naqaab Hona Tha..

Ishq ko be-naqaab hona tha,
aap apna jawaab hona tha.

Mast-e-jaam-e-sharaab hona tha,
bekhud-e-iztiraab hona tha.

Teri aankhon ka kuchh qusoor nahin,
haan mujhi ko kharaab hona tha.

Aao mil jaao muskura ke gale,
ho chuka jo itaab hona tha.

Koocha-e-ishq mein nikal aaya,
jis ko khana-kharaab hona tha.

Mast-e-jaam-e-sharaab khaak hote,
garq-e-jaam-e-sharaab hona tha.

Dil ki jis par hain naqsh-e-ranga-rang
uss ko saada kitaab hona tha.

Hum ne nakaamiyon ko dhoond liya,
aakhirash kaamyaab hona tha.

Haaye woh lamha-e-sukoon ki jise,
mahshar-e-iztiraab hona tha.

Nigaah-e-yaar khud tadap uthti,
shart-e-awwal kharaab hona tha.

Kyon na hota sitam bhi bepaayan,
karam-e-behisaab hona tha.

Kyon nazar hairaton mein doob gayi,
mauj-e-sad-iztiraab hona tha.

Ho chuka roz-e-awwali hi ‘jigar
jis ko jitna kharaab hona tha. !!

Jigar Moradabadi

Muddat Mein Woh Phir Taaza Mulaqaat Ka Aalam..

Muddat mein woh phir taza mulaqaat ka aalam,
khamosh adaaon mein woh jazbaat ka aalam.

Allah re woh shiddat-e jazbaat ka aalam,
kuchh keh ke woh bhooli hui har baat ka aalam.

Aariz se dhalakte hue shabnam ke woh qatre,
aankhon se jhalakta hua barsaat ka aalam.

Woh nazaron hi nazaron mein sawaalaat ki duniya,
woh ankhon hi ankhon mein jawaabaat ka aalam. !!

Jigar Moradabadi