Home / Tag Archives: nasha

Tag Archives: nasha

Awwal Awwal Ki Dosti Hai Abhi..

Romantic-Happily_cute_couple_painting_drawing_ahmad Faraz_poetry_shayari_boy with guitar_girl on boy's shoulder

Awwal awwal ki dosti hai abhi,
ek ghazal hai ki ho rahi hai abhi.

Main bhi shehar-e wafa mein nau-waarid,
woh bhi ruk ruk ke chal rahi hai abhi.

Main bhi aisa kahan ka zood-shanaas,
woh bhi lagta hai sochti hai abhi.

Dil ki wafadaari hai apni jagah,
phir bhi kuchh ehtiyaat si hai abhi.

Garche pehla sa ijtinaab nahin,
phir bhi kam kam supurdagi hai abhi.

Kaisa mausam hai kuchh nahin khulta,
boonda-baandi bhi dhoop bhi hai abhi.

Khud-kalaami mein kab ye nasha tha,
jis tarah roo-ba-ru koi hai abhi.

Qurbatein laakh khoobsurat hon,
dooriyon mein bhi dilkashi hai abhi.

Fasl-e gul mein bahaar pehla gulaab,
kisi ki zulfon mein taankti hai abhi.

Muddatein ho gayi ‘faraz magar,
woh jo deewaanagi ki thi hai abhi. !!

Ab Ke Tajdeed-e Wafa Ka Nahi Imkaan Janaan..

Ab ke tajdeed-e-wafa* ka nahi imkaan* janaa,
yaad kya tujh ko dilaayen tera paimaan janaa.

Yun hi mausam ki adaa dekh ke yaad aaya hai,
kis qadar jald badal jaate hain insaan janaa.

Zindagi teri ataa thi so tere naam ki hai,
hum ne jaise bhi basar ki tera ehsaan janaan.

Dil ye kehta hai ki shayad hai fasurda* tu bhi,
dil ki kya baat karein dil toh hai nadaan janaan.

Awwal awwal ki mohabbat ke nashe yaad toh kar,
be-piye bhi tera chehra tha gulishtaan janaan.

Aakhir aakhir toh ye aalam hai ki ab hosh nahi,
ragg-e meena sulag uthi ki ragg-e-jaan janaan.

Muddaton se yahi aalam na tawaqqo na umeed,
dil pukaare hi chala jata hai janaan janaan.

Hum bhi kya sada the hum ne bhi samajh rakha tha,
ghum-e-dauran se juda hai ghum-e-janaan janaan.

Ab ke kuchh aisi saji mehfil-e-yaraan janaan,
sar-ba-zaanu hai koi sar-ba-girebaan janaan.

Har koi apni hi aawaaz se kaanp uthta hai,
har koi apne hi saaye se hiraasaan janaan.

Jis ko dekho wahi zanzeer-ba-paa lagta hai,
shehar ka shehar hua daakhil-e-zindaan janaan.

Ab tera zikar bhi ghazal mein shayad hi aaye,
aur se aur hue dard ke unwaan janaan.

Hum ki roothi hui rutt ko bhi mana lete the,
hum ne dekha hi na tha mausam-e-hijraan janaa.

Hosh aaya toh sabhi khwaab the raiza raiza,
jaise udte hue auraaq-e-pareshaan* janaa. !!

*[ Tajdeed-e-wafa=Renewal Of Faith,
Imkaan=possibility , Fasurda=Disappointed
Auraaq-e-pareshaan=scattered pages ]

 

Ab Ke Hum Bichhde Toh Shayad Kabhi Khwaabon Mein Milein..

 

rose in book

Ab ke hum bichhde toh shayad kabhi khwaabon mein milein,
jis tarah sookhe hue phool kitaabon mein milein.

Dhoond ujde hue logon mein wafa ke moti,
ye khazaane tujhe mumkin hai kharaabon mein milein.

Ghum-e duniya bhi ghum-e yaar mein shaamil kar lo,
nasha badhta hai sharaabein jo sharaabon mein milein.

Tu khuda hai na mera ishq farishton jaisa,
dono insaan hain toh kyon itne hizaabon mein milein.

Aaj hum daar par khinche gaye jin baaton par,
kya ajab kal woh zamaane nisaabon mein milein.

Ab na woh main na woh tu hai na woh maazi hai ‘faraz
jaise do shakhs tamanna ke saraabon mein milein. !!

Wohi Raaton Ki Bedaari Hai Ab Tak..

Wohi raaton ki bedaari hai ab tak,
Tamanna ka safar jaari hai ab tak.

Khyal-e zabt aur tark-e talluq,
Yehi patthar bahut bhaari hai ab tak.

Akeli chandni raaton mein dil ko,
Sulag uthne ki beemaari hai ab tak.

Abhi pichhle dino jo hum pe guzri,
Usi rutt ka nasha taari hai ab tak.

Main hijrat kar toh lun chaman se ‘Mohsin
Par parindon se meri yaari hai ab tak.. !!

Achha Hua Ki Mera Nasha Bhi Utar Gaya..

Achha hua ki mera nasha bhi utar gaya,
teri kalaayi se woh kadaa bhi utar gaya.

Woh mutmayin bahut hai mera saath chhod kar,
main bhi hun khush ki qarz mera bhi utar gaya.

Rukhsat ka waqt hai yun hi chehra khila rahe,
main toot jaaunga jo zara bhi utar gaya.

Paani mein woh kashish hai ki allaah ki panaah!
rassi ka haath thaame ghadaa bhi utar gaya. !!

Munawwar Rana

Kya Toota Dil Bhi Joda Hai Kisi Ne.. ?

Kya Toota Dil Bhi Joda Hai Kisi Ne. ?

Dil-e umeed toda hai kisi ne,
sahara de kar chhoda hai kisi ne.

Na manzil hai na manzil ka nasha hai,
kahan par la kar chhoda hai kisi ne.

Main un sheeshaguron se puchhta hun,
kya toota dil bhi joda hai kisi ne. ?

Hai deewano ko zanjeeron se nisbat,
ye rishta bhi khoob joda hai kisi ne.

Mohabbat mein mujhe barbaad kar ke,
lahoo dil ka nichoda hai kisi ne. !!