Home / Tag Archives: nagar-shayari

Tag Archives: nagar-shayari

Sun Bastiyon Ka Haal Jo Had Se Guzar Gayi..

Sun bastiyon ka haal jo had se guzar gayi,
un ummaton ka zikar jo raaston mein mar gayi.

Kar yaad un dinon ko ki aabaad thi yahan,
galiyan jo khaak-o khoon ki dahshat se bhar gayi.

Sarsar ki zadd mein aaye hue baam-o-dar ko dekh,
kaisi hawaayen kaisa nagar sard kar gayi.

Kya baab the yahan jo sadaa se nahin khule,
kaisi duaayen thi jo yahan beasar gayi.

Tanha ujaad burjon mein phirta hai toh ‘munir
woh zar-fishaaniyan tere rukh ki kidhar gayi. !!

Munir Niazi

Sun Bastiyon Ka Haal Jo Had Se Guzar Gayi..
5 (100%) 2 votes

Raat Itni Jaa Chuki Hai Aur Sona Hai Abhi..

Raat itni jaa chuki hai aur sona hai abhi,
iss nagar mein ek khushi ka khwaab bona hai abhi.

Kyon diya dil uss buut-e kamsin ko aise waqt mein,
dil si shayy jis ke liye bas ek khilona hai abhi.

Aisi yaadon mein ghire hain jin se kuchh haasil nahin,
aur kitna waqt un yaadon mein khona hai abhi.

Jo hua hona hi tha so ho gaya hai dosto,
daagh iss ehd-e sitam ka dil se dhona hai abhi.

Hum ne khilte dekhna hai phir khayabaan-e bahaar,
shehar ke ataraf ki mitti mein sona hai abhi.

Baith jaayen saaya-e-daamaan-e-ahmad mein ‘munir
aur phir sochen woh baaten jin ko hona hai abhi. !!

Munir Niazi

Raat Itni Jaa Chuki Hai Aur Sona Hai Abhi..
5 (100%) 2 votes

Makaan Mein Qaid-e-Sada Ki Dahshat..

Makaan mein qaid-e-sadaa ki dahshat,
makaan se baahar khalaa ki dahshat.

Hawa hai khauf-e-khuda se khaali,
hai iss nagar mein balaa ki dahshat.

Ghira hua hun main har taraf se,
hai aaine mein hawaa ki dahshat.

Zameen pe har simt had-e-aakhir,
falak pe la-intiha ki dahshat.

Shajar ke saaye mein maut dekho,
samar mein uss ke fanaa ki dahshat. !!

Munir Niazi

Makaan Mein Qaid-e-Sada Ki Dahshat..
5 (100%) 3 votes

Naam Behad The Magar Un Ka Nishaan Koi Na Tha..

Naam behad the magar un ka nishaan koi na tha,
bastiyan hi bastiyan thi paasbaan koi na tha.

Khurram-o-shaadaab chehre saabit-o-sayyar dil,
ek zameen aisi thi jis ka aasmaan koi na tha.

Kya balaa ki shaam thi subahon shabon ke darmiyan,
aur main un manzilon par tha jahan koi na tha.

Kookti thi baansuri chaaron dishaaon mein ‘munir
par nagar mein uss sadaa ka raazdaan koi na tha. !!

Munir Niazi

Naam Behad The Magar Un Ka Nishaan Koi Na Tha..
5 (100%) 3 votes