Home / Tag Archives: Musaafir Shayari

Tag Archives: Musaafir Shayari

Apni Marzi Se Kahan Apne Safar Ke Hum Hain..

Apni marzi se kahan apne safar ke hum hain,
rukh hawaaon ka jidhar ka hai udhar ke hum hain.

Pehle har cheez thi apni magar ab lagta hai,
apne hi ghar mein kisi doosre ghar ke hum hain.

Waqt ke saath hai mitti ka safar sadiyon se,
kis ko maloom kahan ke hain kidhar ke hum hain.

Chalte rehte hain ki chalna hai musaafir ka naseeb,
sochte rehte hain kis raahguzar ke hum hain.

Hum wahan hain jahan kuchh bhi nahin rasta na dayaar,
apne hi khoye hue shaam-o-shehar ke hum nahin.

Gintiyon mein hi gine jaate hain har daur mein hum,
har qalamkaar ki benaam khabar ke hum hain. !!

Nida Fazli

Ab Khushi Hai Na Koi Dard Rulaane Wala..

Ab khushi hai na koi dard rulaane wala,
hum ne apna liya har rang zamaane wala.

Ek be-chehra si ummeed hai chehra chehra,
jis taraf dekhiye aane ko hai aane wala.

Uss ko rukhsat toh kiya tha mujhe maloom na tha,
sara ghar le gaya ghar chhod ke jaane wala.

Door ke chaand ko dhoondo na kisi aanchal mein,
ye ujaala nahin aangan mein samaane wala.

Ek musaafir ke safar jaisi hai sab ki duniya,
koi jaldi mein koi der se jaane wala. !!

Nida Fazli

Ek Aazaar Hui Jaati Hai Shohrat Hum Ko..

Ek aazaar hui jaati hai shohrat hum ko,
khud se milne ki bhi milti nahin fursat hum ko.

Roshni ka ye musaafir hai raah-e-jaan ka nahin,
apne saaye se bhi hone lagi wehshat hum ko.

Aankh ab kis se tahayyur ka tamasha maange,
apne hone pe bhi hoti nahin hairat hum ko.

Ab ke ummeed ke shole se bhi aankhen na jali,
jaane kis mod pe le aayi mohabbat hum ko.

Kaun si rut hai zamaane humen kya maloom,
apne daaman mein liye phirti hai hasrat hum ko.

Zakhm ye wasl ke marham se bhi shayad na bhare,
hijr mein aisi mili ab ke masaafat hum ko.

Daagh-e-isyaan toh kisi taur na chhupte ‘amjad
dhaanp leti na agar chaadar-e-rahmat hum ko. !!

Amjad Islam Amjad

Apne Ghar Ki Khidki Se Main Aasmaan Ko Dekhunga..

Apne ghar ki khidki se main aasmaan ko dekhunga,
jis par tera naam likha hai uss taare ko dhoondunga.

Tum bhi har shab diya jala kar palkon ki dehleez par rakhna,
main bhi roz ek khwaab tumhare shehar ki jaanib bhejunga.

Aur hijr ke dariya mein tum padhna lehron ki tahreeren bhi,
paani ki har satr pe main kuchh dil ki baaten likhunga.

Jis tanha se ped ke neeche hum baarish mein bheege the,
tum bhi uss ko chhoo ke guzarna main bhi uss se liptunga.

Khwaab musaafir lamhon ke hain saath kahan tak jaayenge,
tum ne bilkul theek keha hai main bhi ab kuchh sochunga.

Baadal odh ke guzrunga main tere ghar ke aangan se,
qaus-e-qaza ke sab rangon mein tujh ko bheega dekhunga.

Be-mausam baarish ki soorat der talak aur door talak,
tere dayaar-e- husn pe main bhi kin-min kin-min barsunga.

Sharm se dohra ho jaayega kaan pada woh bunda bhi,
baad-e-saba ke lahje mein ek baat main aisi poochhunga.

Safha safha ek kitaab-e-husn si khulti jaayegi,
aur ussi ki layy mein phir main tum ko azbar kar lunga.

Waqt ke ek kankar ne jis ko akson mein taqseem kiya,
aab-e-rawan mein kaise ‘amjad’ ab woh chehra jodunga. !!

Amjad Islam Amjad

Ghar Se Soch Ke Nikla Hun Ki Mar Jaana Hai..

Ghar se soch ke nikla hun ki mar jaana hai,
ab koi raah dikha de ki kidhar jaana hai.

Jism se saath nibhaane ki mat ummeed rakho,
iss musaafir ko toh raaste mein thehar jaana hai.

Maut lamhe ki sadaa zindegi umron ki pukaar,
main yahi soch ke zinda hun ki mar jaana hai.

Nasha aisa tha ki mai-khane ko duniya samjha,
hosh aaya toh khyaal aaya ki ghar jaana hai.

Mere jazbe ki badi qadar hai logon mein magar,
mere jazbe ko mere saath hi mar jaana hai. !!

Rahat Indori

Haath Khaali Hain Tere Shehar Se Jaate Jaate..

Haath khaali hain tere shehar se jaate jaate,
jaan hoti toh meri jaan lutaate jaate.

Ab toh har haath ka patthar humen pehchaanta hai,
umar guzri hai tere shehar mein aate jaate.

Ab ke mayoos hua yaaron ko rukhsat kar ke,
jaa rahe the toh koi zakhm lagaate jaate.

Rengne ki bhi ijaazat nahin hum ko warna,
hum jidhar jaate naye phool khilaate jaate.

Main toh jalte hue sehraaon ka ek patthar tha,
tum toh dariya the meri pyaas bujhaate jaate.

Mujh ko rone ka saleeqa bhi nahin hai shayad,
log hanste hain mujhe dekh ke aate jaate.

Hum se pehle bhi musaafir kayi guzre honge,
kam se kam raah ke patthar toh hataate jaate. !!

Rahat Indori

Teri Aankhon Ke Dariya Ka Utarna Bhi Zaroori Tha..

Anil-kapoor-madhuri-dixit-couple-painting-poetry-shayari

Teri aankhon ke dariya ka utarna bhi zaroori tha,
mohabbat bhi zaroori thi, bichhadna bhi zaroori tha.

Zaroori tha ki hum dono tawaaf-e aarzoo karte,
magar phir aarzuon ka bikharna bhi zaroori tha.

Wahi hain sooraten apni wahi main hun, wahi tum ho
magar khoya hua hun main, magar tum bhi kahin gum ho.

Mohabbat mein daghaa ki thi so kaafir the, so kaafir hain
mili hain manzilen phir bhi musaafir the, musaafir hain.

Tere dil ke nikaale hum kahaan bhatke, kahaan pahunche
magar bhatke toh yaad aaya, bhatakna bhi zaroori tha. !!

 

Teri Aankhon Ke Dariya Ka Utarna Bhi Zaroori Tha – Sung by Rahat Fateh Ali Khan (new) from aivil vin on Vimeo.