Home / Tag Archives: mizaaj-shayari

Tag Archives: mizaaj-shayari

Dil Mein Ek Lehar Si Uthi Hai Abhi..

Dil mein ek lehar si uthi hai abhi,
koi taaza hawa chali hai abhi.

Shor barpa hai khana-e-dil mein,
koi deewar si giri hai abhi.

Kuchh toh naazuk mizaaj hain hum bhi,
aur ye chot bhi nayi hai abhi.

Bhari duniya mein jii nahin lagta,
jaane kis cheez ki kami hai abhi.

Tu shareek-e-sukhan nahin hai toh kya,
hum-sukhan teri khamoshi hai abhi.

Yaad ke be-nishaan jazeeron se,
teri aawaaz aa rahi hai abhi.

Shehar ke be-charaagh galiyon mein,
zindagi tujh ko dhoondti hai abhi.

So gaye log uss haweli ke,
ek khidki magar khuli hai abhi.

Tum toh yaaro abhi se uth baithe,
shehar mein raat jaagti hai abhi.

Waqt achchha bhi aayega ‘nasir
ghum na kar zindagi padi hai abhi. !!

Nasir Kazmi

Saans Lete Hue Bhi Darta Hun..

Saans lete hue bhi darta hun,
ye na samajhen ki aah karta hun.

Bahr-e hasti mein hun misaal-e habaab,
mit hi jata hun jab ubharta hun.

Itni aazaadi bhi ghanimat hai,
saans leta hun, baat karta hun.

Shekh saahab khuda se darte hon,
main toh angrezon hi se darta hun.

Aap kya poochhte hain mera mizaaj,
shukr allaah ka hai marta hun.

Ye bada aib mujh mein hai ‘akbar
dil mein jo aaye keh guzarta hun. !!

Akbar Allahabadi

Kise Khabar Thi Tujhe Iss Tarah Sajaaunga..

Kise khabar thi tujhe iss tarah sajaaunga,
zamaana dekhega aur main na dekh paaunga.

Hayaat-o maut firaaq-o wisaal sab yakjaan,
main ek raat mein kitne diye jalaaunga.

Pala – badha hun abhi tak inhi andheron mein,
main tez dhoop se kaise nazar milaaunga.

Mere mizaaj ki ye maadrana fitrat hai,
sawere saari azeeyat main bhool jaaunga.

Tum ek pedd se wabasta ho magar main toh,
hawaa ke saath bahut door door jaaunga.

Mera ye ehad hai main aaj shaam hone tak,
jahan se rizq likha hai wahin se laaunga. !!

Bashir Badr

Yun Hi Besabab Na Phira Karo, Koi Shaam Ghar Bhi Raha Karo..

Sad_sitting_thinking_girl_women_in_memories_evening_Bashir_badr_poetry_shayari

Yun hi besabab na phira karo, koi shaam ghar bhi raha karo
woh ghazal ki sacchi kitaab hai, usey chupke chupke padha karo.

Koi haath bhi na milaayega jo gale miloge tapaak se,
ye naye mizaaj ka shehar hai zara faasle se mila karo.

Abhi raah mein kayi mod hain, koi aayega koi jaayega
tumhen jis ne dil se bhula diya, usey bhoolne ki dua karo.

Mujhe ishtihaar si lagti hain ye mohabbaton ki kahaaniyan,
jo kaha nahin woh suna karo, jo suna nahin woh kaha karo.

Kabhi husn-e pardanashin bhi ho zara aashiqana libaas mein,
jo main ban sanwar ke kahin chalun, mere saath tum bhi chala karo.

Ye khizan ki zard si shaal mein, jo udaas pedd ke paas hai
ye tumhaare ghar ki bahaar hai, isey aansuon se hara karo. !!

Bashir Badr

Agarche Zor Hawaon Ne Daal Rakha Hai..

Agarche zor hawaon ne daal rakha hai,
magar charaagh ne lau ko sambhaal rakha hai.

Mohabbaton mein toh milna hai ya ujad jana,
mizaaj-e ishq mein kab etidaal rakha hai.

Hawa mein nasha hi nasha fazaa mein rang hi rang,
ye kis ne pairhan apna uchhaal rakha hai.

Bhale dino ka bharosa hi kya rahen na rahen,
so maine rishta-e ghum ko bahaal rakha hai.

Hum aise sada-dilon ko woh dost ho ki khuda,
sabhi ne wada-e fardaa pe taal rakha hai.

Hisaab lutf-e hareefan kiya hai jab toh khula,
ki doston ne zyada khyaal rakha hai.

Bhari bahaar mein ek shaakh par khila hai gulaab,
ki jaise tune hatheli pe gaal rakha hai.

Faraz’ ishq ki duniya toh khoobsurat thi,
ye kisne fitna-e-hijr-o-visaal rakha hai. !!

Suna Hai Log Usey Aankh Bhar Ke Dekhte Hain..

Painting of beautiful women- ahmad faraz shayari- poetry picture- beautiful painting

Suna hai log usey aankh bhar ke dekhte hain,
so uss ke shehar mein kuchh din thehar ke dekhte hain.

Suna hai rabt hai uss ko kharaab haalon se,
so apne aap ko barbaad kar ke dekhte hain.

Suna hai dard ki gaahak hai chashm-e naaz uss ki,
so hum bhi uss ki gali se guzar ke dekhte hain.

Suna hai uss ko bhi hai sher-o shayari se shaghaf,
so hum bhi mojzey apne hunar ke dekhte hain.

Suna hai bole toh baaton se phool jhadte hain,
ye baat hai toh chalo baat kar ke dekhte hain.

Suna hai raat usey chaand takta rehta hai,
sitaare baam-e falak se utar ke dekhte hain.

Suna hai din ko usey titliyan staati hain,
suna hai raat ko jugnu thehar ke dekhte hain.

Suna hai hashr hain uss ki ghazaal si aankhein,
suna hai uss ko hiran dasht bhar ke dekhte hain.

Suna hai raat se badh kar hain kaakulen uss ki,
suna hai shaam ko saaye guzar ke dekhte hain.

Suna hai uss ki siyaah chashmagi qayamat hai,
so uss ko surma-farosh aah bhar ke dekhte hain.

Suna hai uss ke labbon se ghulaab jalte hain,
so hum bahaar pe ilzaam dhar ke dekhte hain.

Suna hai aaina timsaal hai jabeen uss ki,
jo saada dil hain usey ban sanwar ke dekhte hain.

Suna hai jab se hamaail hai uski gardan mein,
mizaaj aur hi laal-o gouhar ke dekhte hain.

Suna hai chashm-e tasawwur se dasht-e imkaan mein,
palang zaaviye uss ki kamar ke dekhte hain.

Suna hai uss ke badan ki taraash aisi hai,
ki phool apni qabaayen katar ke dekhte hain.

Woh sarv-qadd hai magar be-gul-e-muraad nahin,
ki uss shajar pe shagoofe samar ke dekhte hain.

Bas ek nigaah se lut,ta hai qaafila dil ka,
so raah-rawan-e-tamanna bhi dar ke dekhte hain.

Suna hai uss ke shabistaan se mutassil hai bahisht,
makeen udhar ke bhi jalwe idhar ke dekhte hain.

Ruke toh gardishein uska tawaaf karti hain,
chale toh uss ko zamaane thehar ke dekhte hain.

Kise naseeb ki be-pairhan usey dekhe,
kabhi kabhi dar-o deewar ghar ke dekhte hain.

Kahaniyan hi sahi sab mubalghe hi sahi,
agar woh khwaab hai tabeer kar ke dekhte hain.

Ab uss ke shehar mein thehrein ki kooch kar jayen,
Faraz aao sitaare safar ke dekhte hain. !!