Home / Tag Archives: manzil

Tag Archives: manzil

Main Hun Raat Ka Ek Baja Hai..

Nasir Kazmi Poetry

 Main hun raat ka ek baja hai,
 khaali rasta bol raha hai. 

 Aaj toh yun khaamosh hai duniya,
 jaise kuchh hone waala hai.

 Kaisi andheri raat hai dekho ,
 apne aap se dar lagta hai.

 Aaj toh shehar ki ravish ravish par ,
 patton ka mela sa laga hai.

 Aao ghaas pe sabhaa jamaayen,
 maikhana toh band pada hai.

 Phool toh saare jhadh gaye lekin,
 teri yaad ka zakhm haraa hai.

 Tune jitna pyar kiya tha,
 dukh bhi mujhe utna hi diya hai.

 Ye  bhi hai ek tarah ki mohabbat,
 main tujh se  tu mujh se juda hai.

 Ye teri manzil woh mera rasta,
 tera mera saath hi kya hai.

 Maine toh eroothna, k baat kehi thi,
 kya tu sach-much rooth gaya hai.

 Aisa gaahak kaun hai jis ne,
 sukh de kar dukh mol liya hai.

 Tera rasta takte takte,
 khet gagan ka sookh chala hai.

 Khidki khol ke dekh toh baahar,
 der se koi shakhs khada hai.

 Saari basti so gayi ‘nasir
 tu ab tak kyon jaag raha hai. !!

Nasir Kazmi Poetry Collection

Subscribe us for nasir kazmi shayari, ghazals, urdu poets, nazms, poems, shairy, hindi, english font.

 

Ye Raat Tumhari Hai Chamakte Raho Taaro..

Nasir Kazmi Poetry

Ye raat tumhaari hai chamakte raho taaro,
woh aayen na aayen magar ummeed na haaro.

Shayad kisi manzil se koi qaafila aaye,
aashufta-saro subh talak yunhi pukaaro.

Din bhar toh chale ab zara dum le ke chalenge,
aey humsafro aaj yehin raat guzaaro.

Ye aalam-e-wehshat hai toh kuchh ho hi rahega,
manzil na sahi sar kisi deewar se maaro.

Ojhal hue jaate hain nigaahon se do aalam,
tum aaj kahan ho ghum-e-furqat ke sahaaro.

Khoya hai usey jis ka badal koi nahin hai,
ye baat magar kaun sune laakh pukaaro. !!

– Click here for  Nasir Kazmi Poetry collection

Ye Shab Ye Khyaal O Khwab Tere..

Nasir Kazmi Poetry

Ye shab ye khyaal-o-khwaab tere,
kya phool khile hain munh-andhere.

Shole mein hai ek rang tera,
baaqi hain tamaam rang mere.

Aankhon mein chhupaaye phir reha hun,
yaadon ke bujhe hue sawere.

Dete hain suraagh fasl-e-gul ka,
shaakhon pe jale hue basere.

Manzil na mili toh qaafilon ne,
raste mein jama liye hain dere.

Jangal mein hui hai shaam hum ko,
basti se chale the munh-andhere.

Rudaad-e-safar na chhed ‘nasir’
phir ashk na tham sakenge mere. !!

– Click here for  Nasir Kazmi Poetry collection

Sakhtiyaan Karta Hun Dil Par Ghair Se Ghaafil Hun Main..

Allama Iqbal Poetry

Sakhtiyaan karta hun dil par ghair se ghaafil hun main,
haaye kya achchhi kahi zaalim hun main jaahil hun main.

Main jabhi tak tha ki teri jalwa-pairaai na thi,
jo numood-e-haq se mit jaata hai woh baatil hun main.

Ilm ke dariya se nikle ghota-zan gauhar-ba-dast,
waaye mahroomi khazaf chain lab saahil hun main.

Hai meri zillat hi kuchh meri sharaafat ki daleel,
jis ki ghaflat ko malak rote hain woh ghaafil hun main.

Bazm-e-hasti apni aaraaish pe toh naazaan na ho,
tu toh ek tasweer hai mehfil ki aur mehfil hun main.

Dhoondhta phirta hun aey ‘iqbal’ apne aap ko,
aap hi goya musaafir aap hi manzil hun main. !!

– Click here for Allama Iqbal Poetry collection

Pareshaan Ho Ke Meri Khaak Aakhir Dil Na Ban Jaaye..

Allama Iqbal Poetry

Pareshaan ho ke meri khaak aakhir dil na ban jaaye,
jo mushkil ab hai yaa rab phir wahi mushkil na ban jaaye.

Na kar dein mujh ko majboor-e-nawa firdaus mein hooren,
mera soz-e-daroon phir garmi-e-mehfil na ban jaaye.

Kabhi chhodi hui manzil bhi yaad aati hai raahi ko,
khatak si hai jo seene mein ghum-e-manzil na ban jaaye.

Banaaya ishq ne dariya-e-naa-paida-karaan mujh ko,
ye meri khud-nigah-daari mera saahil na ban jaaye.

Kahin iss aalam-e-be-rang-o-boo mein bhi talab meri,
wahi afsaana-e-dumbaala-e-mehmil na ban jaaye.

Urooj-e-aadam-e-khaaki se anjum sehme jaate hain,
ki ye toota hua taara mah-e-kaamil na ban jaaye. !!

– Click here for Allama Iqbal Poetry collection

Kaise Kahen Ki Yaad-e-Yaar Raat Ja Chuki Bahut..

Habib Jalib Poetry

Kaise kahen ki yaad-e-yaar raat jaa chuki bahut,
raat bhi apne saath saath aansoo baha chuki bahut.

Chaand bhi hai thaka thaka taare bhi hain bujhe bujhe,
tere milan ki aas phir deep jala chuki bahut.

Aane lagi hai ye sadaa door nahin hai shehar-e-gul,
duniya humari raah mein kaante bichha chuki bahut.

Khulne ko hai qafas ka dar paane ko hai sukoon nazar,
aey dil-e-nazar shaam-e-ghum hum ko rula chuki bahut.

Apni qayaadaton mein ab dhoondenge log manzilen,
raahzanon ki rahbari raah dikha chuki bahut. !!

– Click Here For Habib Jalib Poetry, Poems  Collection

Aayi Hai Kuchh Na Poochh Qayamat Kahan Kahan..

Firaq Gorakhpuri

Aayi hai kuchh na poochh qayaamat kahan kahan,
uff le gayi mujh ko mohabbat kahan kahan.

Betaabi-o-sukoon ki hui manzilen tamaam,
behlaayen tujh se chhut ke tabiyat kahan kahan.

Raah-e-talab mein chhod diya dil ka saath bhi,
phirte liye hue ye museebat kahan kahan.

Begaangi par uss ki zamaane se ehtiraaz,
dar-parda uss adaa ki shikaayat kahan kahan.

Farq aa gaya tha daur-e-hayaat-o-mamaat mein,
aayi hai aaj yaad woh soorat kahan kahan.

Hosh-o-junoon bhi ab toh bas ek baat hain ‘firaq
hoti hai uss nazar ki sharaarat kahan kahan. !!

– Click Here For Firaq Gorakhpuri Poetry Collection