Home / Tag Archives: Manzar Shayari

Tag Archives: Manzar Shayari

Raqs Karne Ka Mila Huqm Jo Dariyaaon Mein..

Raqs karne ka mila huqm jo dariyaaon mein,
hum ne khush ho ke bhanwar baandh liye paaon mein.

Un ko bhi hai kisi bheege hue manzar ki talaash,
boond tak bo na sake jo kabhi sehraaon mein.

Aye mere humsafaron tum abhi thake haare ho,
dhoop ki tum toh milaawat na karo chhaaon mein.

Jo bhi aataa hai bataata hai naya koi ilaaj,
bat na jaaye tera beemaar maseehaaon mein.

Hausla kis mein hai yusuf ki khareedaari ka,
ab toh mehangaai ke charche hain zulekhaaon mein.

Jis barahman ne keha hai ki ye saal achchha hai,
uss ko dafnaao mere haath ki rekhaaon mein.

Woh khuda hai kisi toote hue dil mein hoga,
masjidon mein usey dhoondho na kaleesaaon mein.

Hum ko aapas mein mohabbat nahin karne dete,
bas yehi aib hai iss shehar ke daanaaon mein.

Mujh se karte hain ‘qateel iss liye kuchh log hasad,
kyon mere sher hain maqbool haseenaaon mein. !!

Qateel Shifai

Mujhe Dubo Ke Bahut Sharmsaar Rahti Hai..

Mujhe dubo ke bahut sharmsaar rahti hai,
woh ek mauj jo dariya ke paar rahti hai.

Humare taaq bhi bezaar hain ujaalon se,
diye ki lau bhi hawa par sawaar rahti hai.

Phir uss ke baad wahi baasi manzaron ke juloos,
bahaar chand hi lamhe bahaar rahti hai.

Ussi se qarz chukaaye hain maine sadiyon ke,
ye zindagi jo humesha udhaar rahti hai.

Humari shehar ke daanishwaron se yaari hai,
issi liye toh qabaa taar taar rahti hai.

Mujhe khareedne walo qataar mein aao,
woh cheez hun jo pas-e-ishtihaar rahti hai. !!

Rahat Indori

Tumhare Naam Par Maine Har Aafat Sar Pe Rakhi Thi..

Tumhare naam par maine har aafat sar pe rakhi thi,
nazar sholon pe rakhi thi zubaan patthar pe rakhi thi.

Humare khwaab toh shehron ki sadkon par bhatakte the,
tumhari yaad thi jo raat bhar bistar pe rakhi thi.

Main apna azm le kar manzilon ki samt nikla tha,
mashaqqat haath pe rakhi thi qismat ghar pe rakhi thi.

Inhi saanson ke chakkar ne humen woh din dikhaaye the,
humare paanv ki mitti humare sar pe rakhi thi.

Sehar tak tum jo aa jaate toh manzar dekh sakte the,
diye palkon pe rakhe the shikan bistar pe rakhi thi. !!

Rahat Indori

Aaj Bahut Din Baad Suni Hai Barish Ki Aawaz..

Girl_and_boy_couple_in_rain_shahid_sonam_kapoor_in_mausam_rain_scene_poetry_shayari

Aaj bahut din baad suni hai barish ki aawaz
Aaj bahut din baad kisi manzar ne rasta roka hai
Rim jhim ka malboos pehan kar yaad kisi ki aayi hai
Aaj bahut din baad achanak aankh yun hi bhar aayi hai
Aankh aur manzar ki wusat mein chaaron jaanib barish hai
Aur barish mein door kahin ek ghar hai.

Jis mein ek ek eent par tere mere khwaab likhe hain
Aur iss ghar ko jaane wali kuchh galiyan hain
Jis mein hum donon ke saaye tanha tanha bheeg rahe hain
Darwaaze par Qufl* pada hai aur dareeche soone hain
Deewaron pe jami hui kaayi mein chhup kar
Mausam hum ko dekh rahe hain.

Kitne baadal hum donon ki aankh se ojhal
Baras baras kar guzar chuke hain
Ek kami si ek nami si
Chaaron jaanib phail rahi hai
Kayi zamaane ek hi pal mein
Baham mil kar bheeg rahe hain
Andar yaadein sookh rahi hain
Baahar manzar bheeg rahe hain …!!

*[Qufl= a lock, a bolt

Saaye GhaTte Jaate Hain..

Saaye ghaTte jaate hain,
jungle kaTte jaate hain.

Koi sakht wazeefa hai,
jo hum raTte jaate hain

Sooraj ke aasaar hain dekho,
baadal chhaTte jaate hain.

Aas paas ke saare manzar,
peechhe haTte jaate hain.

Dekho ‘munir bahaar mein gulshan,
rang se aTte jaate hain. !!

Munir Niazi

Ek Aalam-e-Hijraan Hi Ab Hum Ko Pasand Aaya..

Ek aalam-e-hijraan hi ab hum ko pasand aaya,
ye khaana-e-veeraan hi ab hum ko pasand aaya.

Benaam-o-nishaan rahna gurbat ke ilaaqe mein,
ye shehar bhi dilkash tha tab hum ko pasand aaya.

Tha laal hua manzar sooraj ke nikalne se,
woh waqt tha woh chehra jab hum ko pasand aaya.

Hai kat-e-taalluq se dil khush bhi bahut apna,
ek had hi bana lena kab hum ko pasand aaya.

Aana woh ‘munir uss ka bekhauf-o-khatar hum tak,
ye turfa tamaasha bhi shab hum ko pasand aaya. !!

Munir Niazi

Mujhe De Rahen Hain Tasalliyaan Woh Har Ek Taaza Payaam Se..

Mujhe de rahen hain tasalliyaan woh har ek taaza payaam se,
kabhi aa ke manzar-e-aam par, kabhi hat ke manzar-e-aam se.

Na gharaz kisi se na wasta, mujhe kaam apne hi kaam se
tere zikr se, teri fikr se, teri yaad se, tere naam se.

Mere saaqiya, mere saaqiya, tujhe marhaba, tujhe marhaba
tu pilaaye ja, tu pilaaye ja, issi chashm-e-jaam-ba-jaam se.

Teri subah-o-aish hai kya bala, tujhe aye falak jo ho hausla
kabhi kar le aa ke muqaabla ghum-e-hijr-e-yaar ki shaam se. !!

Jigar Moradabadi