Home / Tag Archives: Maikada Shayari

Tag Archives: Maikada Shayari

Namaabar Apna Hawaaon Ko Banaane Waale..

Namaabar apna hawaaon ko banaane waale,
ab na aayenge plat kar kabhi jaane waale.

Kya milega tujhe bikhre hue khwaabon ke siwa,
ret par chaand ki tasweer banaane waale.

Maikade band hue dhoond raha hun tujh ko,
tu kahan hai mujhe aankhon se pilaane waale.

Tu pighal jaaye koi mom ka putla toh nahin,
khud na jal jaaye tujhe haath lagaane waale.

Sab ne pehna tha bade shouq se kaaghaz ka libaas,
jis qadar log the baarish mein nahaane waale.

Mar gaye hum toh ye qatbe pe likha jaayega.
so gaye aap zamaane ko jagaane waale.

Dar-o-deewar pe hasrat si barasti hai ‘qateel
jaane kis desh gaye pyaar nibhaane waale. !!

Qateel Shifai

Laayi Phir Ek Laghzish-e-Mastana Tere Shehar Mein..

Laayi phir ek laghzish-e-mastana tere shehar mein,
phir banengi masjiden maikhana tere shehar mein.

Aaj phir tootengi tere ghar ki naazuk khidkiyan,
aaj phir dekha gaya deewana tere shehar mein.

Jurm hai teri gali se sar jhuka kar lautna,
kufr hai pathraav se ghabrana tere shehar mein.

Shaahnaame likhe hain khandaraat ki har eent par,
har jagah hai dafn ek afsaana tere shehar mein.

Kuchh kaneezen jo hareem-e-naaz mein hain baaryaad,
maangti hain jaan-o-dil nazraana tere shehar mein.

Nangi sadkon par bhatak kar dekh jab marti hai raat,
rengta hai har taraf veerana tere shehar mein. !!

Kaifi Azmi

Ghar Se Soch Ke Nikla Hun Ki Mar Jaana Hai..

Ghar se soch ke nikla hun ki mar jaana hai,
ab koi raah dikha de ki kidhar jaana hai.

Jism se saath nibhaane ki mat ummeed rakho,
iss musaafir ko toh raaste mein thehar jaana hai.

Maut lamhe ki sadaa zindegi umron ki pukaar,
main yahi soch ke zinda hun ki mar jaana hai.

Nasha aisa tha ki mai-khane ko duniya samjha,
hosh aaya toh khyaal aaya ki ghar jaana hai.

Mere jazbe ki badi qadar hai logon mein magar,
mere jazbe ko mere saath hi mar jaana hai. !!

Rahat Indori

Charaaghon Ko Uchhaala Ja Raha Hai..

Charaaghon ko uchhaala ja raha hai,
hawa par raub dala ja raha hai.

Na haar apni na apni jeet hogi,
magar sikka uchhaala ja raha hai.

Woh dekho maikade ke raaste mein,
koi allaah wala ja raha hai.

The pehle hi kayi saanp aasteen mein,
ab ek bichchhu bhi pala ja raha hai.

Mere jhoote gilaason ki chhakaa kar,
behakton ko sambhaala ja raha hai.

Humin buniyaad ka patthar hain lekin,
humein ghar se nikaala ja raha hai.

Janaaze par mere likh dena yaaro,
mohabbat karne wala jaa raha hai. !!

Rahat Indori

Saaqi Par Ilzaam Na Aaye..

Saaqi par ilzaam na aaye,
chaahe tujh tak jaam na aaye.

Tere siwa jo ki ho mohabbat,
meri jawaani kaam na aaye.

Jin ke liye mar bhi gaye hum,
woh chal kar do gaam na aaye.

Ishq ka sauda itna garaan hai,
inhen hum se kaam na aaye.

Maikhaane mein sab hi toh aaye,
lekin ‘jigar ka naam na aaye. !!

Jigar Moradabadi

Saaqi Ki Har Nigaah Pe Bal Kha Ke Pee Gaya..

Saaqi ki har nigaah pe bal kha ke pee gaya,
leharon se khelta hua lehra ke pee gaya.

Bekaifiyon ke kaif se ghabra ke pee gaya,
tauba ko tod taad ke tharra ke pee gaya.

Zahid ye meri shokhi-e-rindana dekhna,
rahmat ko baaton baaton mein behla ke pee gaya.

Sarmasti-e-azal mujhe jab yaad aa gayi,
duniya-e-aitbaar ko thukra ke pee gaya.

Aye rahmat-e-tamaam meri har khata muaaf,
main inteha-e-shauq mein ghabra ke pee gaya.

Peeta baghair izan ye kab thi meri majaal,
dar-parda chashm-e-yaar ki sheh pa ke pee gaya.

Uss jaan-e-maikada ki qasam baarha ‘Jigar
kul alam-e-bisaat pe main chhaa ke pee gaya. !!

Jigar Moradabadi

Maikada Tha Chaandni Thi Main Na Tha..

Maikada tha chaandni thi main na tha,
ek mujassam bekhudi thi main na tha.

Ishq jab dum todta tha tum na the,
maut jab sar dhun rahi thi main na tha.

Toor par chheda tha jis ne aap ko,
woh meri deewaangi thi main na tha.

Woh haseen baitha tha jab mere qareeb,
lazzat-e-hum-saayegi thi main na tha.

Maikade ke mod par rukti hui,
muddaton ki teeshnagi thi main na tha.

Main aur ghuncha-dahan ki aarzoo,
aarzoo ki saadgi thi main na tha.

Gesuon ke saaye mein aaraam-kash,
sar-barahna zindagi thi main na tha.

Dair-o-kaaba mein ‘adam hairat-farosh
do jahaan ki badzani thi main na tha. !!

Abdul Hamid Adam

Maikhana-e Hasti Mein Aksar Hum Apna Thikaana Bhool Gaye..

Maikhana-e hasti mein aksar hum apna thikaana bhool gaye,
ya hosh mein jaana bhool gaye ya hosh mein aana bhool gaye.

Asbaab toh ban jaate hain taqdeer ki zidd ko kya kahiye,
ek jaam lo pahuncha tha hum tak hum jaam uthana bhool gaye.

Aaye the bikhere zulfon ko ek roz humaare marqad par,
do ashk toh tapke aankhon se, do phool chadhaana bhool gaye.

Chaaha tha ki un ki aankhon se kuchh rang-e-bahaaran leeje,
taqreeb toh achchhi thi lekin do aankh milaana bhool gaye.

Maloom nahin aaine mein chupke se hansaa tha kaun ‘adam
hum jaam uthaana bhool gaye, woh saaz bajaana bhool gaye. !!

Abdul Hamid Adam

Mohabbat Mein Tumhe Aansoo Bahaana Nahin Aaya..

Mohabbat mein tumhe aansoo bahaana nahin aaya,
banaaras mein rahe aur paan khana nahin aaya.

Na jaane log kaise mom kar dete hain patthar ko,
humein toh aap ko bhi gudgudana nahin aaya.

Shikaari kuchh bhi ho itna sitam achchha nahin hota,
abhi toh chonch mein chidiya ke daana tak nahin aaya.

Ye kaise raaste se le ke tum mujh ko chale aaye,
kahan ka maikada, ek chaaikhana tak nahin aaya. !!

Munawwar Rana