Home / Tag Archives: Lahoo-shayari

Tag Archives: Lahoo-shayari

Lahoo Na Ho Toh Qalam Tarjumaan Nahin Hota..

Lahoo na ho toh qalam tarjumaan nahin hota,
humare daur mein aansoo zubaan nahin hota.

Jahan rahega wahin roshani lutaayega,
kisi charaagh ka apna makaan nahin hota.

Ye kis maqaam pe laayi hai meri tanhaayi,
ki mujh se aaj koi badgumaan nahin hota.

Main uss ko bhool gaya hun ye kaun maanega,
kisi charaagh ke bas mein dhuaan nahin hota.

‘Waseem sadiyon ki aankhon se dekhiye mujh ko,
woh lafz hun jo kabhi daastaan nahin hota. !!

Wasim Barelvi

Tu Kabhi Dekh Toh Rote Hue Aa Kar Mujh Ko..

Tu kabhi dekh toh rote hue aa kar mujh ko,
rokna padta hai aankhon se samandar mujh ko.

Iss mein aawara-mizazi ka koi dakhl nahin,
dasht-o sehra mein firaata hai muqaddar mujh ko.

Ek tooti hui kashti ka musaafir hun main,
haan nigal jayega ek roz samundar mujh ko.

Iss se badh kar meri tauheen-e anaa kya hogi,
ab gadaagar bhi samjhte hain gadaagar mujh ko.

Zakhm chehre pe, lahoo aankhon mein,  seena chhalni,
zindagi ab toh odhaa de koi chaadar mujh ko.

Meri aankhon ko woh binaai ataa kar maula,
ek aansu bhi nazar aaye samundar mujh ko.

Koi iss baat ko maane ki na maane lekin,
chaand lagta hai tere maathe ka jhoomar mujh ko.

Dukh toh ye hai mera dushman hi nahin hai koi,
ye mere bhai hain kehte hain jo baabar mujh ko.

Mujh se aangan ka andhera bhi nahin mit paaya,
aur duniya hai ki kehti hai ‘Munawwar’  mujh ko. !!

Bas Ek Jhagde Ka Lamha Tha.. [ Khudkushi ]

Bas ek jhagde ka lamha tha..
dar-o deewaar par aise chhanaake se giri aawaaz,
jaise kaanch girta hai.
Har ek shayy mein gayi udti hui,
jalti hui kirchein..
Nazar mein, baat mein, lehje mein, soch aur saans ke andar..
lahoo hona tha ek rishte ka.. so woh ho gaya uss din!

Ussi aawaaz ke tukde uthaa ke farsh se uss shab,
kisi ne kaat li nabzen..
na ki aawaaz tak kuchh bhi,
ki koi jaag na jaaye. !!

Har Ek Aawaaz Ab Urdu Ko Fariyadi Batati Hai..

Har ek aawaaz ab urdu ko fariyadi batati hai,
Yeh pagali phir bhi ab tak khud ko shehzaadi batati hai.

Kayi baatein mohabbat sab ko buniyadi batati hai,
Jo pardaadi thi wahi ab daadi batati hai.

Jahan pichhle kayi barason se kaale naag rehte hain,
Wahan ek ghonsla chidiyon ka daadi batati hai.

Abhi tak yeh ilaaqa hai rawadari ke qabze mein,
Abhi firqaparasti kam hai aabaadi batati hai.

Yahan veeraniyon ki ek muddat se huqumat hai,
Yahan se nafartein guzri haun barbadi batati hain.

Lahoo kaise bahaya jaye yeh leader batate hain,
Lahoo ka zaayka kaisa hai yeh khaadi batati hai.

Gulaami ne abhi tak mulk ka peechha nahin chhoda,
Humein phir qaid hona hai ye aazaadi batati hai.

Gareebi kyon humare shehar se nahin jati,
Ameer-e shehar ke ghar ki shaadi batati hai.

Main unn aannkhon ke mayykhane mein thodi der baitha tha,
Mujhe duniya aaj bhi nashe ka aadi batati hai. !!

Thaki Maandi Hui Bechariyan Aaraam Karti Hain..

Mitali- Mitali painting- sad women- sad women painting

Thaki-maandi hui bechariyan aaraam karti hain,
Na chhedo zakhm ko beemariyan aaraam karti hain.

Sula kar apne bacchon ko yahi har maa samajhti hai,
Ki uski god mein kilkaariyan aaraam karti hain.

Kisi din aye samundar jhaank mere dil ke sehraa mein,
Na jaane kitni hi tehdaariyan aaraam karti hain.

Abhi tak dil mein roshan hain tumhari yaad ke jugnu,
Abhi iss raakh mein chingaariyan aaraam karti hain.

Kahan rangon ki aamezish ki zehmat aap karte hain,
Lahoo se kheliye pichkaariyan aaraam karti hain. !!

Jab Bhi Qasti Meri Sailaab Mein Aa Jati Hai..

 

Jab bhi qashti meri sailaab mein aa jati hai,
Maa dua kart hui khwaab mein aa jati hai.

Roz main apne lahoo se usey khat likhta hun,
Roz ungali meri tezaab mein aa jati hai.

Dil ki galiyon se teri yaad nikalti hi nahin,
Sohni phir issi punjaab mein aa jati hai.

Raat bhar jaagte rahne ka sila hai shayad,
Teri tasweer si mehtaab mein aa jati hai.

Ek kamre mein basar karta hai sara kunbaa,
Sari duniya dil-e betaab mein aa jati hai.

Zindagi tu bhi bhikharin ki rida odhey hue,
Koocha-e reshamon ke khwaab mein aa jati hai.

Dukh kisi ka ho chhalak uthti hain meri aankhein,
Saari mitti mere talaab mein aa jati hai. !!