Home / Tag Archives: Khwaahish-shayari

Tag Archives: Khwaahish-shayari

Ajeeb Khwahish Hai Shehar Walon Se Chhup Chhupa Kar Kitaab Likhun..

alone_sad_girl_reading_book_noshi_gilani_shayari_poetry_ghazal

Ajeeb khwahish hai shehar walon se chhup chhupa kar kitaab likhun,
tumhare naam apni zindagi ki kitaab ka intisaab likhun.

Woh lamha kitna ajeeb tha jab humari aankhen gale mili thi,
main kis tarah ab muhabbaton ki shikastagi ke azaab likhun.

Tumhi ne mere ujaad raaston pe khwahishon ke diye jalaaye,
tumhi ne chaha tha khushk honthon se chaahaton ke gulaab likhun.

Kabhi woh din the ki neend aankhon ki sarhadon se pare pare thi,
magar main ab jab bhi sona chahun tumhari yaadon ke khwaab likhun.

Main tanha ladki diyaar-e shab mein jalaaun sach ke diye kahan tak,
siyaahkaron ki saltanat mein main kis tarah aaftaab likhun.

Qayadaton ke junoon mein jin ke qadam lahoo se range hue hain,
ye mere bas mein nahin hai logo ki unko izzat-maab likhun.

Yehi bahut hai ki inn labbon ko sada se mehroom kar ke rakh dun,
magar ye kaisi musalahat hai samundaron ko saraab likhun .!!

-> Noshi Gilani

Ye Kaisa Ehsaas Hai..?

Girl in love-Lost my love-girl going behindboy-lover-girl watching going boy-sad- nazam-poetry-shayari-poem

Ye kaisa ehsaas hai ?
ki uski na hote hue bhi uski hona chahti hun..
kyon woh shakhs meri rag-o jaan mein basta ja reha hai ?

Ye kaisa sehar hai us shakhs mein ?
ki bin dekhe ,
bin bole ,
bin soche ,
ek aise safar ki taraf nikal padtii hun..
jis ka raasta woh batata hai ..!

Kyon ???
aisa kyon hai ?
kya woh mere mann mandir ka dewta hai ?
jise poojne ka socha tha ?
jis ki ho ke rehne ka socha tha ?

Haan!
shayad ye wohi shakhs hai..
haan ye wohi dewta hai..
jo mera toh nahin lekin main toh uss ki hun..
kyon ki uss ke baad khone ke liye kuchh bhi nahin baaki..
toh usey khone se toh dara jayega na ?

Phir bhi main uss sakhs ko khone se kyon darti hun ?
na toh woh mera hai !
aur na uss ne mera hone ka dawa kiya hai !
toh phir kyon uss ke sehar mein uss ke pichhe bhaagti hun ?

Ek sawaal khud se karti hun toh jawaab milta hai.
haan shayad woh shakhs bhi mujhe chaahne laga hai !..
woh bhi apni khwahishat se ladta hua !
mera hi toh hona chaahta hai ..!

Aur agar woh mera hi hona chahta hai ,
toh jazbaat itne mand kyon?
kabhi toh khule dil se apnaane ka dawa kare !
kabhi toh mera ho jaane ka dawa kare !
kabhi toh mujhe chaahne ka dawa kare …!!

Zindagi Se Yehi Gila Hai Mujhe..

romantic_couple_painting_girl seeing in boy's eyes_happy couple_cute_lovers_ahmad faraz_poetry_shayari_artpic_drawing_sketch

Zindagi se yehi gila hai mujhe,
tu bahut der se mila hai mujhe.

Tu mohabbat se koi chaal toh chal,
haar jaane ka hausla hai mujhe.

Dil dhadakta nahin tapakta hai,
kal jo khwaahish thi aabla hai mujhe.

Humsafar chahiye hujoom nahin,
ek musaafir bhi qaafila hai mujhe.

Kohkan ho ki qais ho ki ‘faraz
sab mein ek shakhs hi mila hai mujhe. !!

Ab Shouk Se Ki Jaan Se Guzar Jana Chahiye..

lonely-boy-man-boy on boat- sad-boy- boy in memories- rude boy- ahmad faraz-poetry-shayari

Ab shouk se ki jaan se guzar jana chahiye,
bol aye hawa-e shehar kidhar jana chahiye.

Kab tak issi ko aakhiri manzil kahenge hum,
koo-e muraad se bhi udhar jana chahiye.

Woh waqt aa gaya hai ki saahil ko chhod kar,
gehre samundaron mein utar jana chahiye.

Ab rabtgaan ki baat nahin kaarwan ki hai,
jis simt bhi ho gard-e safar jana chahiye.

Kuchh toh suboot-e khoon-e tamanna kahin mile,
hai dil tahi toh aankh ko bhar jana chahiye.

Ya apni khwaahishon ko muqaddas na jaante,
ya khawahishon ke saath hi mar jana chahiye. !!

Jahan Tak Ho Saka Humne Tumhe Parda Karaya Hai..

Jahan tak ho saka humne tumhe parda karaya hai,
Magar aye aansuon! tumne bahut rushwa karaya hai.

Chamak yun hi nahin aati hai khuddari ke chehre par,
Anaa ko humne do do waqt ka faaqa karaya hai.

Badi muddat pe khayi hain khushi se gaaliyan humne,
Badi muddat pe usne aaj munh meetha karaya hai.

Bichhadna uski khwaahish thi na meri aarzoo lekin,
Zara si zidd ne iss aangan ka bantwara karaya hai.

Kahin pardesh ki rangeeniyon mein kho nahin jana,
Kisi ne ghar se chalte waqt ye waada karaya hai.

Khuda mehfooz rakhe mere bacchon ko siyaasat se,
Ye woh aurat hai jisne umar bhar pesha karaya hai. !!

Jab Kabhi Dhoop Ki Shiddat Ne Sataya Mujh Ko..

Sad man- walking man- sad man in evening-man in memories

Jab kabhi dhoop ki shiddat ne sataya mujh ko,
Yaad aaya bahut ek pedd ka saaya mujh ko.

Ab bhi roshan hai teri yaad se ghar ke kamre,
Roshani deta hai ab tak tera saaya mujh ko.

Meri khwaahish thi ki main roshani baantu sab ko,
Zindagi tune bahut jald bujhaya mujh ko.

Chahne walon ne koshish toh bahut ki lekin,
Kho gaya main toh koi dhoond na paya mujh ko.

Sakht hairat mein padi mout ye jumla sun kar,
Aa, adaa karna hai saanson ka kiraya mujh ko.

Shukriya tera adaa karta hun jaate jaate,
Zindagi tune bahut roz bachaya mujh ko. !!