Home / Tag Archives: Khoon

Tag Archives: Khoon

Kahan Kisi Ki Himayat Mein Mara Jaunga..

Urdu Poetry

 Kahan kisi ki himaayat mein maara jaaunga,
 main kam shanas murrwwat mein maara jaaunga.

 Main maara jaaunga pehle kisi fasaane mein,
 phir uss ke baad haqeeqat mein maara jaaunga.

 Main bargalaaya hua lad raha hun apne khilaaf,
 main apne shauq-e shahaadat mein maara jaaunga.

 Mujhe bataaya hua hai meri chhathi hiss ne,
 main apne ehd-e qilaafat mein maara jaaunga.

 Mera ye khoon mere dushmanon ke sar ho gaya,
 main apne doston ki hiraasat mein maara jaaunga.

 Yahan kamaan uthaana meri zaroorat hai,
 wagarna main bhi sharaafat mein maara jaaunga.

 Faraagh mere liye maut ki alaamat hai,
 main  apni pehli faraaghat mein maara jaaunga.

 Main chup raha ton mujhe maar dega mera zameer,
 gawaahi di toh adaalat mein maara jaaunga.

 Bas ek sulah ki soorat mein jaan bakhshi hai,
 kisi bhi doosri soorat mein maara jaaunga.

 Nahin marunga kisi jung mein ye soch liya hai,
 main ab ki baar mohabbat mein maara jaaunga. !!

Urdu Ghazals Collection

Subscribe us for urdu shayari, urdu poets, ghazals, nazms, poems, shair, shairy.  

Hai Bas-ki Har Ek Un Ke Ishaare Mein Nishaan Aur..

Mirza Ghalib Poetry

Hai bas-ki har ek un ke ishaare mein nishaan aur,
karte hain mohabbat toh guzarta hai gumaan aur.

Ya rab woh na samjhe hain na samjhenge meri baat,
de aur dil un ko jo naa de mujh ko zubaan aur.

Abru se hai kya uss nigaah-e-naaz ko paivand,
hai teer muqarrar magar iss ki hai kamaan aur.

Tum shehar mein ho toh humein kya ghum jab uthenge,
le aayenge baazaar se ja kar dil-o-jaan aur.

Har-chand subuk-dast hue but-shikani mein,
hum hain toh abhi raah mein hai sang-e-giraan aur.

Hai khoon-e-jigar josh mein dil khol ke rota,
hote kayi deeda-e-khun-naaba-fishaan aur.

Marta hun iss aawaaz pe har chand sar ud jaaye,
jallaad ko lekin woh kahe jaayen ki haan aur.

logon ko hai khurshid-e-jahan-taab ka dhoka,
har roz dikhaata hun main ek daagh-e-nihaan aur.

Leta na agar dil tumhen deta koi dum chain,
karta jo na marta koi din aah-o-fughaan aur.

Paate nahin jab raah to chadh jaate hain naale,
rukti hai meri taba toh hoti hai rawaan aur.

Hain aur bhi duniya mein sukhan-war bahut achchhe,
kehte hain ki ‘ghalib’ ka hai andaaz-e-bayaan aur. !!

– Click here for Mirza Ghalib Poetry collection

Aabroo Kya Khaak Uss Gali Mein Nahin..

Mirza Ghalib Poetry

Aabroo kya khaak uss gali mein nahin,
hai garebaan nang-e-pairaahan jo daaman mein nahin.

Zof se aey girya kuchh baaqi mere tan mein nahin,
rang ho kar udd gaya jo khoon ki daaman mein nahin.

Ho gaye hain jamaa ajzaa-e-nigaah-e-aaftaab,
zarre uss ke ghar ki deewaaron ke rauzan mein nahin.

Kya kahun taariki-e-zindaan-e-ghum andher hai,
pamba noor-e-subh se kam jis ke rauzan mein nahin.

Raunaq-e-hasti hai ishq-e-khana veeraan saaz se,
anjuman be-shamaa hai gar barq khirman mein nahin.

Zakhm silwaane se mujh par chaara-jui ka hai taan,
ghair samjha hai ki lazzat zakhm-e-sozan mein nahin.

Bas-ki hain hum ek bahaar-e-naaz ke maare hue,
jalwa-e-gul ke siwa gard apne madfan mein nahin.

Qatra qatra ek hayoola hai naye naasoor ka,
khoon bhi zauq-e-dard se faarigh mere tan mein nahin.

Le gayi saaqi ki nakhwat qulzum-aashaami meri,
mauj-e-mayy ki aaj rag meena ki gardan mein nahin.

Ho fishaar-e-zof mein kya naa-tawaani ki numood,
qad ke jhukne ki bhi gunjaaish mere tan mein nahin.

Thi watan mein shaan kya ‘ghalib’ ki ho ghurbat mein qadr,
be-takalluf hun woh musht-e-khas ki gulkhan mein nahin. !!

– Click here for Mirza Ghalib Poetry collection

Chaand Ke Saath Kayi Dard Puraane Nikle..

Chaand ke saath kayi dard puraane nikle,
kitne ghum the jo tere ghum ke bahaane nikle.

Fasl-e gul aayi phir ik baar asiraan-e-wafa,
apne hi khoon ke dariya mein nahaane nikle.

Hijr ki chot ajab sang-shikan hoti hai,
dil ki befaiz zameenon se khazaane nikle.

Umar guzri hai shab-e-taar mein aankhein malte,
kis ufaaq se mera khursheed na jaane nikle.

Ku-e-qaatil mein chale jaise shaheedon ka juloos,
khwaab yun bheegti aankhon ko sajaane nikle.

Dil ne ek eent se taameer kiya taj-mahal,
tune ek baat kahi laakh fasaane nikle.

Dasht-e tanhaai-e-hijraan mein khada sochta hun,
haaye kya log mera saath nibhaane nikle.

Maine ‘amjad’ usey bewaasta dekha hi nahin,
woh toh khushboo mein bhi aahat ke bahaane nikle. !!

Amjad Islam Amjad

Lab Pe Paabandi Toh Hai Ehsaas Par Pehra Toh Hai..

Lab pe paabandi toh hai ehsaas par pehra toh hai,
phir bhi ahl-e-dil ko ahwaal-e-bashar kehna toh hai.

Khoon-e-aada se na ho khoon-e-shaheedon hi se ho,
kuchh na kuchh iss daur mein rang-e-chaman nikhra toh hai.

Apni ghairat bech daalen apna maslak chhod den,
rahnumaaon mein bhi kuchh logon ka ye mansha toh hai.

Hai jinhen sab se zyada daava-e-hubbul-watan,
aaj un ki wajah se hubb-e-watan ruswa toh hai.

Bujh rahe hain ek ek kar ke aqeedon ke diye,
iss andhere ka bhi lekin saamna karna toh hai.

Jhooth kyon bolen farogh-e-maslahat ke naam par,
zindagi pyaari sahi lekin humen marna toh hai. !!

Sahir Ludhianvi

Mujhko Aap Apna Aap Dijiyega – Jaun Elia Ghazal

Mujhko aap apna aap dijiyega,
aur kuchh bhi na mujh se lijiyega.

Aap bemisl, bemisaal hun main,
mujh siwa aap kis pe rijhiyega.

Aap jo hain azal se hi benaam,
naam mera kabhi toh lijiyega.

Aap bas mujh mein hi toh hain, so aap
mera behad khyaal kijiyega.

Hai agar waaqai sharaab haraam,
aap hothon se mere pijiyega.

Intezaari hun apna main din raat,
ab mujhe aap bhej dijiyega.

Aap mujh ko bahut pasand aaye,
aap meri kameez sijiyega.

Dil ke rishte hain khoon, jhooth ki sach,
ye muamma kabhi na boojhiyega.

Hai mere jism-o jaan ka maazi kya ?
mujh se bas ye kabhi na poochiyega.

Mujh se meri kamaai ka sar-e shaam,
paai paai hisaab lijiyega.

Zindagi kya hai, ik hunar karna
so qareene se zehar pijiyega.

Main jo hun, ‘Jaun Eliya’ hun janaab,
iska behad lihaaz kijiyega. !!