Home / Tag Archives: khizaan-shayari

Tag Archives: khizaan-shayari

Kisi Roz Barish Mein Ghar Se Nikalna..

Kisi roz barish mein ghar se nikalna..
Khizaan mein gire toote patton pe chalna..
Tapakne lage jab darakhton se paani..
Tumhein yaad aayegi beeti kahani..
Ki jab hum kisi shaam tum se mile the..
Mohabbat ke raston pe hum tum chale the..
Teri neeli aankhon mein rang-e-wafa tha..
Kanwal jheel mein jaise khilne laga tha..
Woh sadiyon ke kisse woh baaten puraani..
Karen yaad kyon kar woh beeti kahani …!!

Ishq Mein Lajaawab Hain Hum Log..

Ishq mein lajawaab hain hum log,
maahtaab, aaftaab hain hum log.

Garche ahal-e-sharaab hain hum log,
ye na samjho kharaab hain hum log.

Shaam se aa gaye jo peene par,
subah tak aaftaab hain hum log.

Hum ko daava-e-ishqbaazi hai,
mustahiqq-e-azaab hain hum log.

Naaz karti hai khana-veerani,
aise khana-kharaab hain hum log.

Hum nahin jaante khizaan kya hai,
kushtagaan-e-shabaab hain hum log.

Tu humara jawaab hai tanha,
aur tera jawaab hain hum log.

Tu hai dariya-e-husn-o-mahboobi,
shakl-e-mauj-o-hubaab hain hum log.

Go saraapa hujaab hain phir bhi,
tere rukh ki naqaab hain hum log.

Khoob hum jaante hain apni qadr,
kitne na-kaamyaab hain hum log.

Hum se ghaflat na ho toh phir kya ho,
rah-rav-e-mulk-e-khwaab hain hum log.

Hum pe naazil hua saheefa-e-ishq,
saahibaan-e-kitaab hain hum log.

Har haqeeqat se jo guzar jaayen,
woh sadaaqat-ma.aab hain hum log.

Jab mili aankh hosh kho baithe,
kitne haazir-jawaab hain hum log.

Hum se puchho ‘jigar ki sarmasti,
mahram-e-aan-janaab hain hum log. !!

Jigar Moradabadi

Tujh Ko Dekha Hai Jo Dariya Ne Idhar Aate Hue..

Tujh ko dekha hai jo dariya ne idhar aate hue,
kuchh bhanwar doob gaye paani mein chakraate hue.

Hum ne toh raat ko daanton se pakad kar rakha,
chheena-jhappti mein uffuq khulta gaya jaate hue.

Main na hounga toh khizaan kaise kategi teri,
shokh pattey ne kaha saakh se murjhaate hue.

Hasratein apni bilakhti na yateemon ki tarah,
hum ko aawaaz hi de lete zara jaate hue.

Sii liye honth woh paakiza nigaahein sun kar,
maili ho jaati hai aawaaz bhi dohraate hue. !!