Home / Tag Archives: khat-shayari

Tag Archives: khat-shayari

Woh Khat Ke Purze Udaa Raha Tha..

Woh khat ke purze udaa raha tha,
hawaaon ka rukh dikha raha tha.

Bataaun kaise woh behta dariya,
jab aa raha tha toh ja raha tha.

Kuchh aur bhi ho gaya numaaya,
main apna likha mita raha tha.

Dhuaan dhuaan ho gayi thi aankhen,
charaagh ko jab bujha raha tha.

Munder se jhuk ke chaand kal bhi,
padosiyon ko jaga raha tha.

Ussi ka imaan badal gaya hai,
kabhi jo mera khuda raha tha.

Woh ek din ek ajnabi ko,
meri kahaani suna raha tha.

Woh umar kam kar raha tha meri,
main saal apne badhaa raha tha.

Khuda ki shayad razaa ho iss mein,
tumhara jo faisla raha tha. !!

Khushbu Jaise Log Mile Afsaane Mein..

Khushbu jaise log mile afsaane mein,
ek purana khat khola anjaane mein.

Shaam ke saaye baalishton se naape hain,
chaand ne kitni der laga di aane mein.

Raat guzrte shaayad thoda waqt lage,
dhoop undelo thodi si paimaane mein.

Jaane kis ka zikar hai iss afsaane mein,
dard maze leta hai jo dohraane mein.

Dil par dastak dene kaun aa nikla hai,
kis ki aahat sunta hun veerane mein.

Hum iss mod se uth kar agle mod chale,
un ko shayad umar lagegi aane mein. !!

Jo Usne Likhe The Khat Copiyon Mein Chhod Aaye..

Sad man- sad boy- man going on road- alone boy- alone man- betrayed man- man leaving home

Jo usne likhe the khat copiyon mein chhod aaye,

Hum aaj usko badi uljhano mein chhod aaye.

Agar hareefon mein hota toh bach bhi sakta tha,
Ghalat kiya jo usey doston mein chhod aaye.

Safar ka shouk bhi kitna ajeeb hota hai,
Woh chehra bheega hua aansuon mein chhod aaye.

Phir uske baad woh aankhen kabhi nahin royi,
Hum unko aisi ghalat-fehmiyon mein chhod aaye.

Mehaaj-e jung pe jana bahut zaroori tha,
Bilakhte bacche hum apne gharon mein chhod aaye.

Jab ek waaqiya bachpan ka hum ko yaad aaya,
Hum unn parindo ko phir ghaunslon mein chhod aaye. !!

Udaas Dil Ke Liye Mashghale Talaash Karun..

Naya hai shehar naye aasre talaash karun,
tu kho gaya hai kahan ab tujhe talaash karun.

Jo dasht mein bhi jalaate the fasl-e gul ke charaagh,
main shehar mein bhi wahi aable talaash karun.

Tu aks hai toh kabhi meri chashm-e tarr mein utar,
tere liye kahan main aainey talaash karun.

Tujhe hawaas ki aawaragi ka ilm kahan,
kabhi main tujh ko tere saamne talaash karun.

Ghazal kahun kabhi saada se khat likhun usko,
udaas dil ke liye mashghale talaash karun.

Mere Wazood se shayad mile suraag tera,
kabhi main khud ko tere waaste talaash karun.

Main chup rahun kabhi bewajah hans padu ‘Mohsin
usey ganwa ke ajab housle talaash karun. !!

Gum Sum Hua Aawaz Ka Dariya Tha Woh Ek Shakhs..

Gum sum hua aawaz ka dariya tha woh ek shakhs,
Patthar bhi nahi ab woh sitara tha jo ek shakhs.

Shayazed woh bhi koi harf-e wafa dhoondh raha tha,
Chehron ko bade gaur se padhta tha woh ek shakhs.

Sehra ki tarah dair se pyasa tha woh shayad,
Baadal ki tarah toot ke barsa tha woh ek shakhs.

Aye tezz hawa koi khabar uss ke junoon ki,
Tanha safar-e shouq pe nikla tha jo ek shakhs.

Ab aakhri sitaron mein kahin naam hai uss ka,
Ahbaab ki fehrist mein pehla tha jo ek shakhs.

Haathon mein chhupaye hue phirta hai kayi zakham,
Sheeshe ke khilono se behlta tha jo ek shakhs.

Mudd mudd ke isey dekhna chahein meri aankhein,
Kuchh door mujhe chhodne aaya tha jo ek shakhs.

Har zehan mein kuchh naqsh-e wafa chhod gya hai,
Kehne ko bhare shehar mein tanha tha jo ek shakhs.

Munkar hai wohi ab meri pehchaan ka Mohsin,
Aksar mujhe khat khoon se likhta tha jo ek shakhs..!!