Home / Tag Archives: khat

Tag Archives: khat

Khwaab In Aankhon Se Ab Koi Chura Kar Le Jaye..

Bashir Badr Poetry

Khwaab in aankhon se ab koi chura kar le jaaye,
qabr ke sookhe hue phool utha kar le jaaye.

Muntazir phool mein khusboo ki tarah hun kab se,
koi jhauken ki tarah aaye udaa kar le jaaye.

Ye bhi paani hai magar aankhon ka aisa paani,
jo hatheli pe rachi mehandi udaa kar le jaaye .

Main mohabbat se mehakta hua khat hun mujh ko,
zindagi apni kitaabon mein daba kar le jaaye.

Khaak insaaf hai na-beena buton ke aage,
raat thaali mein chiraaghon ko saja kar le jaaye. !!

Bashir Badr Poetry Collection

Subscribe us for bashir badr shayari, urdu poets, shair, ghazals, poems.

Naam Usi Ka Sawere Shaam Likha..

Bashir Badr Poetry

Naam ussi ka sawere shaam likha,
sher likha ya khat, uss ko gumnaam likha.

Uss din pehla phool khila jab patjhad ne,
patti patti jod ke tera naam likha.

Uss bachche ki copy aksar padhta hun,
sooraj ke maathe par jis ne shaam likha.

Kaise donon waqt gale milte hain roz,
ye manzar maine dushman ke naam likha.

Saat zameenen ek sitaara naya naya,
sadiyon baad ghazal ne koi naam likha.

Meer’, kabeer’, bashir’, issi maqtab ke hain,
aa dil ke maqtab mein apna naam likhaa. !!

Bashir Badr Poetry Collection

Subscribe us for more bashir badr shayari, nazms, poems, ghazals, shairy, shair, urdu poets. 

Jahan Ped Par Chaar Daane Lage – Bashir Badr Ghazal

Bashir Badr Poetry

Jahan ped par chaar daane lage,
hazaaron taraf se nishaane lage.

Hui shaam yaadon ke ek gaaon mein,
parinde udaasi ke aane lage.

Ghadi do ghadi mujh ko palkon pe rakh,
yahan aate aate zamaane lage.

Kabhi bastiyaan dil ki yun bhi basi,
dukaanen khuli kaarakhaane lage.

Wahin zard patton ka kaalin hai,
gulon ke jahan shaamiyane lage.

Padhaai likhaai ka mausam kahan,
kitaabon mein khat aane jaane lage. !!

Bashir Badr Poetry Collection

Subscribe Us For More Bashir Badr Poetry,  Urdu Poetry , Ghazals, Nazms, Shayari & Poems

Kabhi Zameen Kabhi Aasmaan Samajh Mein Nahin Aata..

Poetry

Kabhi zameen kabhi aasmaan samajh mein nahin aata,
Iss dil ka thikana bhi samajh mein nahin aata.

Meri aankhein uski yaadon ke charaag toh nahin,
Kyon aaye bas woh hi nazar samajh mein nahin aata.

Chahe anchahe mein usey yaad kiya karta hun,
Ye latt hai ya aadat samajh mein nahin aata.

Kamabakht aashiqi ne jeena haraam kar diya,
Usey bhulun ya apni jaan dun samajh mein nahin aata.

Iss taraf mera ghar hai uss taraf uska ghar,
Idhar jaaun ya udhar samajh mein nahin aata.

Paagal sa ban ke reh gaya kuchh soch soch kar,
Pehle hasun ya roun samajh mein nahin aata.

Lifafa fatt chuka, majmoon bhi kaafi purana ho gaya,
Usey dun ya khat jala dun samajh mein nahin aata.

Uski wafa pe ab mujhe shaq hone laga hai,
Usey yaar kahun ya gaddaar samajh mein nahin aata.

Raqeebon ke saath baithe hain azeej-o mohatrim,
Kaise karun salaam samajh mein nahin aata.

Samjha le dil ko mastghan kuchh aur na samajh,
Phir khud samajh jaayega jo samajh mein nahin aata. !!

Almaari Se Khat Uske Puraane Nikal Aaye..

sad-man-boy-in-evening-dark-night-with-letters-book

Almaari se khat uske puraane nikal aaye,
phir se mere chehre pe ye daane nikal aaye.

Maa baith ke takti thi jahan se mera raasta,
mitti ko hataate hi khazaane nikal aaye.

Mumkin hai humein gaaon bhi pehchan na paaye,
bachpan mein hi hum ghar se kamaane nikal aaye.

Aye rett ke zarre tera ehsaan bahut hai,
aankhon ko bhigone ke bahaane nikal aaye .

Cheekhein bhi yahan gaur se sunta nahi koi,
kis shehar mein tum shair sunaane nikal aaye ? ..!!

Munawwar Rana