Home / Tag Archives: Khamoshi Shayari

Tag Archives: Khamoshi Shayari

Siskiyaan Leti Hui Ghumgeen Hawaao Chup Raho..

Siskiyaan leti hui ghum-geen hawaao chup raho,
so rahe hain dard un ko mat jagaao chup raho.

Raat ka patthar na pighlega shuaaon ke baghair,
subah hone tak na bolo hum-nawaao chup raho.

Band hain sab maikadey saaqi bane hain muhtasib,
aye garajti goonjti kaali ghataao chup raho.

Tum ko hai maloom aakhir kaun sa mausam hai ye,
fasl-e-gul aane talak aye khush-nawaao chup raho.

Soch ki deewaar se lag kar hain ghum baithe hue,
dil mein bhi naghma na koi gungunaao chup raho.

Chhant gaye haalaat ke baadal toh dekha jaayega,
waqt se pehle andhere mein na jaao chup raho.

Dekh lena ghar se niklega na humsaaya koi,
aye mere yaaro mere dard-aashnaao chup raho.

Kyon shareek-e-ghum banaate ho kisi ko aye ‘qateel
apni sooli apne kaandhe par uthaao chup raho. !!

Qateel Shifai

Dil Mein Ek Lehar Si Uthi Hai Abhi..

Dil mein ek lehar si uthi hai abhi,
koi taaza hawa chali hai abhi.

Shor barpa hai khana-e-dil mein,
koi deewar si giri hai abhi.

Kuchh toh naazuk mizaaj hain hum bhi,
aur ye chot bhi nayi hai abhi.

Bhari duniya mein jii nahin lagta,
jaane kis cheez ki kami hai abhi.

Tu shareek-e-sukhan nahin hai toh kya,
hum-sukhan teri khamoshi hai abhi.

Yaad ke be-nishaan jazeeron se,
teri aawaaz aa rahi hai abhi.

Shehar ke be-charaagh galiyon mein,
zindagi tujh ko dhoondti hai abhi.

So gaye log uss haweli ke,
ek khidki magar khuli hai abhi.

Tum toh yaaro abhi se uth baithe,
shehar mein raat jaagti hai abhi.

Waqt achchha bhi aayega ‘nasir
ghum na kar zindagi padi hai abhi. !!

Nasir Kazmi

Din Dhala Raat Phir Aa Gayi So Raho So Raho..

Din dhala raat phir aa gayi so raho so raho,
manzilon chhaa gayi khamoshi so raho so raho.

Sara din tapte sooraj ki garmi mein jalte rahe,
thandi thandi hawa phir chali so raho so raho.

Garam sunsaan qarion ki dharti mehakne lagi,
khaak rashk-e-iram ban gayi so raho so raho.

Razm-gaah-e-jahaan ban gayi jaa-e-aman-o-amaan,
hai yehi waqt ki raagni so raho so raho.

Kaise sunsaan hain aasmaan chup khade hain makaan,
hai fazaa ajnabi ajnabi so raho so raho.

Thak gaye naaqa-o-sasrbsan tham gaye kaarwan,
ghantiyon ki sadaa so gayi so raho so raho.

Chaandni aur dhuen ke siwa door tak kuchh nahin,
so gayi shehar ki har gali so raho so raho.

Gardish-e-waqt ki loriyaan raat ki raat hain,
phir kahan ye hawa ye nami so raho so raho.

Saari basti ke log iss madhur layy mein kho gaye,
door bajne lagi baansuri so raho so raho.

Door shaakhon ke jhurmat mein jugnu bhi gum ho gaye,
chaand mein so gayi chaandni so raho so raho.

Ghar ke deewar-o-dar raah tak tak ke shal ho gaye,
ab na aayega shayad koi so raho so raho.

Sust raftaar taare bhi aankhen jhapakne lage,
ghum ke maaro ghadi do ghadi so raho so raho.

Munh andhere hi ‘nasir kise dhoondne chal diye,
door hai abhi subha-e-roshan so raho so raho. !!

Nasir Kazmi

Kitni Be-saakhta Khata Hun Main..

Kitni be-saakhta khata hun main,
aap ki raghbat-o-razaa hun main.

Maine jab saaz chhedna chaaha,
khaamoshi cheekh uthi sadaa hun main.

Hashr ki subah tak toh jaagunga,
raat ka aakhiri diya hun main.

Aap ne mujh ko khoob pehchaana,
waaqayi sakht bewafaa hun main.

Maine samjha tha main mohabbat hun,
maine samjha tha mudda hun main.

Kaash mujh ko koi bataaye ‘adam
kis pariwash ki baddua hun main. !!

Abdul Hamid Adam

Aarzuon Ke Soorkh Phoolon Se Dil Ki Basti Sajaa Rahe Hain Hum..

Aarzuon ke soorkh phoolon se,
dil ki basti sajaa rahe hain hum.

Aaj toh apni khaamoshi mein bhi,
teri aawaaz paa rahe hain hum.

Baat kya hai phir zamaane ko,
yaad reh reh ke aa rahe hain hum.

Jo kabhi laut kar nahin aate,
woh zamaane bula rahe hain hum.

Zindagi ab toh saadgi se mil,
baad sadiyon ke aa rahe hain hum.

Ab humen dekh bhi na paaoge,
itne nazdeek aa rahe hain hum.

Ghazalen ab tak sharaab piti thi,
neem ka rass pilaa rahe hain hum.

Dhoop nikli hai muddaton ke baad,
geele jazbe sukha rahe hain hum.

Fikar ki belibaas shaakhon par,
funn ki patti lagaa rahe hain hum.

Sardiyon mein lihaaf se chimte,
chaand taaron pe jaa rahe hain hum.

Zeesat ki ek barfi ladki ko,
noor-o naama padhaa rahe hain hum.

Uss ne poochha humare ghar ka pata,
kaafi house bula rahe hain hum.

Kandhe uchka ke baat karne mein,
munfarid hote ja rahe hain hum.

Chust kapdon mein jism jaag pade,
rooh-o dil ko sula rahe hain hum.

Koi shola hai koi jalti aag,
jal rahe hain jalaa rahe hain hum.

Tedhi tehzeeb tedhi fikar-o nazar,
tedhi ghazlen suna rahe hain hum. !!

Bashir Badr

Kisne Sang-e Khaamoshi Pheinka Bhare Bazaar Par..

Kis ne sang-e khaamoshi pheinka bhare bazaar par,
Ek sukoot-e-marg* taari hai darr-o deewaar par.

Tune apne zulf ke saaye mein afsaane kahe,
Mujh ko zanjeeren mili hain jurrat-izhaar par.

Shaakh-e uriyaan par khila ek phool iss andaaz se,
Jis tarah taaza lahoo chamke nayi talwaar par.

Sangdil ahbaab ke daaman mein ruswaai ke phool,
Maine dekha hai naya manzar faraaz-e-daar* par.

Ab koi tohmat bhi wajah-e karb-e ruswaai nahi,
Zindagi ek umar se chup hai tere israar par.

Main sar-e maqtal hadees zindagi kehta raha,
Ungliyan uthti rahi ‘mohsin mere kirdaar par. !!

*[ Sukoot-e-marg=silence of death,
Faraaz-e-daar=elevated ]

Mohsin Naqvi