Home / Tag Archives: khaak

Tag Archives: khaak

Khwaab In Aankhon Se Ab Koi Chura Kar Le Jaye..

Bashir Badr Poetry

Khwaab in aankhon se ab koi chura kar le jaaye,
qabr ke sookhe hue phool utha kar le jaaye.

Muntazir phool mein khusboo ki tarah hun kab se,
koi jhauken ki tarah aaye udaa kar le jaaye.

Ye bhi paani hai magar aankhon ka aisa paani,
jo hatheli pe rachi mehandi udaa kar le jaaye .

Main mohabbat se mehakta hua khat hun mujh ko,
zindagi apni kitaabon mein daba kar le jaaye.

Khaak insaaf hai na-beena buton ke aage,
raat thaali mein chiraaghon ko saja kar le jaaye. !!

Bashir Badr Poetry Collection

Subscribe us for bashir badr shayari, urdu poets, shair, ghazals, poems.

Chaand Ke Charon Taraf Maili Ridayen Saath Hain..

Bashir Badr Poetry

Chaand ke chaaron taraf maili ridaayen saath hain,
khaak itni sar chadhi kis ki hawaayen saath hain.

Ek aurat se wafa karne ka ye tohfa mila,
jaane kitni auraton ki badduayen saath hain.

Ungliyan meri sitaaron tak pahunch sakti nahin,
mutthiyon mein jugnuon ki badduayen saath hain.

Din khila hai phool sa aur raat bheegi aankh si,
koi mausam ho yahan donon hawaayen saath hain.

Main hun ek kaaghaz ka tukda jaane kis ki khoj mein,
kyon mere peechhe zamane ki hawaayen saath hain. !!

Bashir Badr Poetry Collection

Subscribe us for bashir badr shayari, ghazals, urdu poetry, poems, nazms, shairy. 

Ab Toh Kuchh Aur Bhi Andhera Hai..

Hafeez Jalandhari Poetry

Ab toh kuchh aur bhi andhera hai,
ye meri raat ka sawera hai.

Rahzanon se toh bhaag nikla tha,
ab mujhe rahbaron ne ghera hai.

Aage aage chalo tabar waalo,
abhi jungle bahut ghanera hai.

Qaafila kis ki pairwi mein chale,
kaun sab se bada lootera hai.

Sar pe raahi ke sarbaraahi ne,
kya safaai ka haath phera hai.

Surma-aalood khushk aansuon ne,
noor-e-jaan khaak par bikhera hai.

Raakh raakh ustukhwaan safed safed,
yehi manzil yehi basera hai.

Aey meri jaan apne jee ke siwa,
kaun tera hai kaun mera hai.

So raho ab ‘hafeez’ ji tum bhi,
ye nayi zindagi ka dera hai. !!

Hafeez Jalandhari Poetry Collection

Subscribe us for hafeez jalandhari shayari, poetry, ghazals, poems, urdu poets, nazms, shair. 

Zakhm Yun Muskura Kar Khilte Hain..

Bashir Badr Poetry

Zakhm yun muskura kar khilte hain,
jaise woh dil ko chhoo kar gujre hain.

Dard ka chaand aansuon ke taare,
dil ke aangan mein aaj utre hain.

Raakh ke dher jaise sard makaan,
chaand un badliyon mein rehte hain.

Aaino ka koi qasoor nahin,
un mein apne hi photo hote hain.

Gaur se dekh khaak tanha nahin,
saath phoolon ke rang udte hain.

Un se raat ki khabar suno saahab,
badr’ ji raat raat ghume hain. !!

Bashir Badr Poetry Collection

Subscribe us for bashir badr shayari , urdu poetry , nazms , poetry, ghazals , poems , shair.

Ab Jo Ek Hasrat e Jawaani Hai..

Meer Taqi Meer Poetry

Ab jo ek hasrat-e-jawaani hai,
umar-e-rafta ki ye nishaani hai.

Rashk-e-yusuf hai aah waqt-e-azeez,
umr ek baar-e-kaarwaani hai.

Girya har waqt ka nahin be-hech,
dil mein koi ghum-e-nihaani hai.

Hum qafas-zaad qaidi hain warna,
taa chaman ek par-fishaani hai.

Uss ki shamsheer tez hai humdum,
mar rahenge jo zindagaani hai.

Ghum-o-ranj-o-alam niko yaan se,
sab tumhaari hi mehrbaani hai.

Khaak thi maujzan jahaan mein aur,
hum ko dhokha ye tha ki pani hai.

Yaan hue ‘meer’ tum baraabar khaak,
waan wahi naaz-o-sargiraani hai. !!

– Click here for Meer Taqi Meer Poetry Collection

Fitrat Ne Na Bakhsha Mujhe Andesha-e-Chaalaak..

Allama Iqbal Poetry

Fitrat ne na bakhsha mujhe andesha-e-chaalaak,
rakhti hai magar taaqat-e-parwaaz meri khaak.

Woh khaak ki hai jis ka junoon saiqal-e-idraak,
woh khaak ki jibreel ki hai jis se qabaa chaak.

Woh khaak ki parwaa-e-nasheman nahin rakhti,
chunti nahin pehna-e-chaman se khaas-o-khaashaak.

Iss khaak ko allaah ne bakhshe hain woh aansoo,
karti hai chamak jin ki sitaaron ko araq-naak. !!

– Click here for Allama Iqbal Poetry collection

Pareshaan Ho Ke Meri Khaak Aakhir Dil Na Ban Jaaye..

Allama Iqbal Poetry

Pareshaan ho ke meri khaak aakhir dil na ban jaaye,
jo mushkil ab hai yaa rab phir wahi mushkil na ban jaaye.

Na kar dein mujh ko majboor-e-nawa firdaus mein hooren,
mera soz-e-daroon phir garmi-e-mehfil na ban jaaye.

Kabhi chhodi hui manzil bhi yaad aati hai raahi ko,
khatak si hai jo seene mein ghum-e-manzil na ban jaaye.

Banaaya ishq ne dariya-e-naa-paida-karaan mujh ko,
ye meri khud-nigah-daari mera saahil na ban jaaye.

Kahin iss aalam-e-be-rang-o-boo mein bhi talab meri,
wahi afsaana-e-dumbaala-e-mehmil na ban jaaye.

Urooj-e-aadam-e-khaaki se anjum sehme jaate hain,
ki ye toota hua taara mah-e-kaamil na ban jaaye. !!

– Click here for Allama Iqbal Poetry collection

Dil Se Teri Nigaah Jigar Tak Utar Gayi..

Mirza Ghalib Poetry

Dil se teri nigaah jigar tak utar gayi,
donon ko ek adaa mein razamand kar gayi.

Shaq ho gaya hai seena khusha lazzat-e-faraagh,
takleef-e-parda-daari-e-zakhm-e-jigar gayi.

Woh baada-e-shabaana ki sarmastiyaan kahan,
uthiye bas ab ki lazzat-e-khwaab-e-sehar gayi.

Udti phire hai khaak meri ku-e-yaar mein,
baare ab aey hawa hawas-e-baal-o-par gayi.

Dekho toh dil farebi-e-andaaz-e-naqsh-e-paa,
mauj-e-khiraam-e-yaar bhi kya gul katar gayi.

Har bul-hawas ne husn-parasti shi.aar ki,
ab aabroo-e-shewa-e-ahl-e-nazar gayi.

Nazzare ne bhi kaam kiya waan naqaab ka,
masti se har nigaah tere rukh par bikhar gayi.

Farda-o-di ka tafraqa yak baar mit gaya,
kal tum gaye ki hum pe qayaamat guzar gayi.

Maara zamaane ne ‘asadullaah khan’ tumhen,
woh walwale kahan woh jawaani kidhar gayi. !!

– Click here for Mirza Ghalib Poetry collection

Aabroo Kya Khaak Uss Gali Mein Nahin..

Mirza Ghalib Poetry

Aabroo kya khaak uss gali mein nahin,
hai garebaan nang-e-pairaahan jo daaman mein nahin.

Zof se aey girya kuchh baaqi mere tan mein nahin,
rang ho kar udd gaya jo khoon ki daaman mein nahin.

Ho gaye hain jamaa ajzaa-e-nigaah-e-aaftaab,
zarre uss ke ghar ki deewaaron ke rauzan mein nahin.

Kya kahun taariki-e-zindaan-e-ghum andher hai,
pamba noor-e-subh se kam jis ke rauzan mein nahin.

Raunaq-e-hasti hai ishq-e-khana veeraan saaz se,
anjuman be-shamaa hai gar barq khirman mein nahin.

Zakhm silwaane se mujh par chaara-jui ka hai taan,
ghair samjha hai ki lazzat zakhm-e-sozan mein nahin.

Bas-ki hain hum ek bahaar-e-naaz ke maare hue,
jalwa-e-gul ke siwa gard apne madfan mein nahin.

Qatra qatra ek hayoola hai naye naasoor ka,
khoon bhi zauq-e-dard se faarigh mere tan mein nahin.

Le gayi saaqi ki nakhwat qulzum-aashaami meri,
mauj-e-mayy ki aaj rag meena ki gardan mein nahin.

Ho fishaar-e-zof mein kya naa-tawaani ki numood,
qad ke jhukne ki bhi gunjaaish mere tan mein nahin.

Thi watan mein shaan kya ‘ghalib’ ki ho ghurbat mein qadr,
be-takalluf hun woh musht-e-khas ki gulkhan mein nahin. !!

– Click here for Mirza Ghalib Poetry collection

Dard Se Mere Hai Tujh Ko Beqaraari Haaye Haaye..

Mirza Ghalib Poetry

Dard se mere hai tujh ko beqaraari haaye haaye,
kya hui zaalim teri ghafalat-shiaari haaye haaye.

Tere dil mein gar na tha aashob-e-ghum ka hausala,
tune phir kyon ki thi meri ghum-gusaari haaye haaye.

Kyon meri ghum-khwaargi ka thujh ko aaya tha khyaal,
dushmani apani thi meri dost-daari haaye haaye.

Umar bhar ka tune paimaan-e-wafa baandha toh kya,
umar ko bhi toh nahin hai paayedaari haaye haaye.

Zehar lagti hai mujhe aab-o-hawa-e-zindagi,
Yaani tujh se thi ise na-saazgaari haaye haaye.

Ghulfeshaani haaye naaz-e-jalwa ko kya ho gaya,
khaak par hoti hai teri laala-kaari haaye haaye.

Sharm-e-ruswaayi se jaa chhupna naqaab-e-khaak mein,
khatm hai ulfat ki tujh par parda-daari haaye haaye.

Khaak mein naamoos-e-paimaan-e-muhabbat mil gayi,
uth gayi duniya se raah-o-rasm-e-yaari haaye haaye.

Haath hi tegh-aazmaa ka kaam se jaata raha,
dil pe ek lagne na paaya zakhm-e-kaari haaye haaye.

Kis tarah kaate koi shab-haaye-taar-eh-barshigaal,
hai nazar khoo-karda-e-akhtar-shumaari haaye haaye.

Gosh mahjoor-e-payaam-o-chashm mahroom-e-jamaal,
ek dil tis par ye naa-ummeed-waari haaye haaye.

Ishq ne pakda na tha ‘ghalib’ abhi wehshat ka rang,
rah gaya tha dil mein jo kuchh zauq-e-khaari haaye haaye.

Gar museebat thi toh ghurbat mein utha lete ‘asad’
meri dehli hi mein honi thi ye khwaari haaye haaye. !!

– Click here for Mirza Ghalib Poetry collection