Home / Tag Archives: kaamyaabi-shayari

Tag Archives: kaamyaabi-shayari

Ishq Ko Be-naqaab Hona Tha..

Ishq ko be-naqaab hona tha,
aap apna jawaab hona tha.

Mast-e-jaam-e-sharaab hona tha,
bekhud-e-iztiraab hona tha.

Teri aankhon ka kuchh qusoor nahin,
haan mujhi ko kharaab hona tha.

Aao mil jaao muskura ke gale,
ho chuka jo itaab hona tha.

Koocha-e-ishq mein nikal aaya,
jis ko khana-kharaab hona tha.

Mast-e-jaam-e-sharaab khaak hote,
garq-e-jaam-e-sharaab hona tha.

Dil ki jis par hain naqsh-e-ranga-rang
uss ko saada kitaab hona tha.

Hum ne nakaamiyon ko dhoond liya,
aakhirash kaamyaab hona tha.

Haaye woh lamha-e-sukoon ki jise,
mahshar-e-iztiraab hona tha.

Nigaah-e-yaar khud tadap uthti,
shart-e-awwal kharaab hona tha.

Kyon na hota sitam bhi bepaayan,
karam-e-behisaab hona tha.

Kyon nazar hairaton mein doob gayi,
mauj-e-sad-iztiraab hona tha.

Ho chuka roz-e-awwali hi ‘jigar
jis ko jitna kharaab hona tha. !!

Jigar Moradabadi

Ishq Ko Be-naqaab Hona Tha..
5 (100%) 1 vote

Kahan Sawaab Kahan Kya Azaab Hota Hai..

Kahan sawaab kahan kya azaab hota hai,
mohabbaton mein kab itna hisaab hota hai.

Bichhad ke mujh se tum apni kashish na kho dena,
udaas rehne se chehra kharaab hota hai.

Usey pata hi nahin hai ki pyaar ki baazi,
jo haar jaaye wohi kaamyaab hota hai.

Jise main likhta hun aise ki khud hi padh paaun,
kibaa-e zeest mein aisa bhi baab hota hai.

Bahut bharosa na kar lena apni aankhon par,
dikhaayi deta hai jo kuchh woh khwaab hota hai. !!

Wasim Barelvi

Kahan Sawaab Kahan Kya Azaab Hota Hai..
3.5 (70%) 2 votes

Aaye Kuchh Abr Kuchh Sharaab Aaye..

Aaye kuchh abr kuchh sharaab aaye,
uss ke baad aaye jo azaab aaye.

Baam-e meena se mahtaab utre,
dasht-e saaqi mein aaftaab aaye.

Har ragg-e khoon mein phir charaagan ho,
saamne phir woh behisaab aaye.

Umar ke har waraq pe dil ki nazar,
teri mehr-o wafa ke baab aaye.

Kar raha tha ghum-e jahan ka hisaab,
aaj tum yaad behisaab aaye.

Na gayi tere ghum ki sardaari,
dil mein yun roz inqilaab aaye.

Jal uthe bazm-e ghair ke dar-o baam,
jab bhi hum khanumaan-kharaab aaye.

Iss tarah apni khamoshi goonji,
goya har samt se jawaab aaye.

Faiz’ thi raah sar-ba-sar manzil,
hum jahan pahunche kaamyaab aaye. !!

:  Faiz Ahmed Faiz

Aaye Kuchh Abr Kuchh Sharaab Aaye..
5 (100%) 3 votes