Home / Tag Archives: Junoon Shayari

Tag Archives: Junoon Shayari

Suna Karo Meri Jaan Inn Se Un Se Afsaane..

Suna karo meri jaan inn se un se afsaane,
sab ajnabi hain yahan kaun kis ko pehchaane.

Yahan se jald guzar jaao qaafile waalo,
hain meri pyaas ke phoonke hue ye veeraane.

Meri junoon-e-parastish se tang aa gaye log,
suna hai band kiye jaa rahe hain buut-khaane.

Jahan se pichhle pehar koi tishna-kaam utha,
wahin pe tode hain yaaron ne aaj paimaane.

Bahaar aaye toh mera salaam keh dena,
mujhe toh aaj talab kar liya hai sehra ne.

Hua hai hukm ki ‘kaifi ko sangsaar karo,
maseeh baithe hain chhup ke kahaan khuda jaane. !!

Kaifi Azmi

Hoti Hai Tere Naam Se Wehshat Kabhi Kabhi..

Hoti hai tere naam se wehshat kabhi kabhi,
barham hui hai yun bhi tabiyat kabhi kabhi.

Aye dil kise naseeb ye taufeeq-e-iztiraab,
milti hai zindagi mein ye raahat kabhi kabhi.

Tere karam se hai aye alam-e-husn-aafreen,
dil ban gaya hai dost ki khalwat kabhi kabhi.

Josh-e-junoon mein dard ki tughyaniyon ke saath,
ashkon mein dhal gayi teri soorat kabhi kabhi.

Tere qareeb reh ke bhi dil mutmain na tha,
guzri hai mujh pe ye bhi qayaamat kabhi kabhi.

Kuchh apna hosh tha na tumhara khyal tha,
yun bhi guzar gayi shab-e-furqat kabhi kabhi.

Aye dost hum ne tark-e-mohabbat ke bawajood,
mehsoos ki hai teri zaroorat kabhi kabhi. !!

Nasir Kazmi

Daastaan-e-Ghum-e-Dil Un Ko Sunaayi Na Gayi..

Daastaan-e-ghum-e-dil un ko sunaayi na gayi,
baat bigadi thi kuchh aisi ki banaayi na gayi.

Sab ko hum bhool gaye josh-e-junoon mein lekin,
ek teri yaad thi aisi jo bhulaayi na gayi.

Ishq par kuchh na chala deeda-e-tar ka qaaboo,
uss ne jo aag laga di woh bujhaayi na gayi.

Pad gaya husn-e-rukh-e-yaar ka partav jis par,
khaak mein mil ke bhi iss dil ki safaayi na gayi.

Kya uthaayegi saba khaak meri uss dar se,
ye qayaamat toh khud un se bhi uthaayi na gayi. !!

Jigar Moradabadi

Aankhon Mein Bas Ke Dil Mein Samaa Kar Chale Gaye..

Aankhon mein bas ke dil mein samaa kar chale gaye,
khwaabida zindagi thi jagaa kar chale gaye.

Husn-e-azal ki shaan dikha kar chale gaye,
ek waaqiya sa yaad dila kar chale gaye.

Chehre tak aasteen woh laa kar chale gaye,
kya raaz tha ki jis ko chhupa kar chale gaye.

Rag rag mein iss tarah woh samaa kar chale gaye,
jaise mujh hi ko mujh se chura kar chale gaye.

Meri hayaat-e-ishq ko de kar junoon-e-shauq,
mujh ko tamaam hosh banaa kar chale gaye.

Samjhaa ke pastiyaan mere auj-e-kamaal ki,
apni bulandiyan woh dikha kar chale gaye.

Apne farogh-e-husn ki dikhlaa ke wus.aten
mere hudood-e-shauq badha kar chale gaye.

Har shai ko meri khaatir-e-nashaad ke liye,
aaina-e-jamaal bana kar chale gaye.

Aaye the dil ki pyaas bujhaane ke waaste,
ek aag si woh aur laga kar chale gaye.

Aaye the chashm-e-shauq ki hasrat nikaalne,
sar-ta-qadam nigaah bana kar chale gaye.

Ab kaarobaar-e-ishq se fursat mujhe kahan,
kaunain ka woh dard badhaa kar chale gaye.

Shukr-e-karam ke saath ye shikwa bhi ho qubool,
apna sa kyon na mujh ko bana kar chale gaye.

Lab tharthara ke rah gaye lekin woh aye ‘jigar
jaate hue nigaah milaa kar chale gaye. !!

Jigar Moradabadi

Khairaat Sirf Itni Mili Hai Hayaat Se..

Khairaat sirf itni mili hai hayaat se,
paani ki boond jaise ataa ho furaat se.

Shabnam issi junoon mein azal se hai seena-koob,
khurshid kis maqaam pe milta hai raat se.

Nagaah ishq waqt se aage nikal gaya,
andaaza kar rahi hai khirad waaqeyaat se.

Soo-e-adab na thahre toh dein koi mashwara,
hum mutmain nahin hain teri kaayenaat se.

Aasaan-pasandiyon se ijaazat talab karo,
rasta bhara hua hai ‘adam mushkilaat se. !!

Abdul Hamid Adam