Home / Tag Archives: jugnu

Tag Archives: jugnu

Khandani Rishton Mein Raqaabat Bahut Hai..

Bashir Badr Poetry

Khaandaani rishton mein aksar raqaabat hai bahut,
ghar se nikalo toh ye duniya khubsoorat hai bahut.

Apne kaalez mein bahut maghroor jo mash-hoor hai,
dil mera kehta hai uss ladki mein chaahat hai bahut.

Un ke chehre chaand taaron ki tarah roshan hue,
jin ghareebon ke yahan husn-e kifaayat hai bahut.

Hum se ho nahin sakti duniya ki duniyadaariyan,
ishq ki deewar ke saaye mein raahat hai bahut.

Dhoop ki chaadar mere sooraj se kehna bhej de,
ghurbaton ka daur hai jaadon ki shiddat hai bahut.

Un andheron mein jahan sehami hui thi ye zameen,
raat se tanha lada, jugnu mein himmat hai bahut. !!

Bashir Badr Poetry Collection

Subscribe us for Bashir Badr Shayari, Urdu Poetry, Poems, Nazms, Ghazals, Urdu Legend Poets.

Har Janam Mein Usi Ki Chahat The..

Bashir Badr Poetry

Har janam mein usi ki chaahat the,
hum kisi aur ki amaanat the.

Uss ki aankhon mein jhilmilaati hui,
hum ghazal ki koi alaamat the.

Teri chaadar mein tan samet liya,
hum kahan ke daraaz qaamat the.

Jaise jungle mein aag lag jaaye,
hum kabhi itne khoobsurat the.

Paas reh kar bhi door door rahe,
hum naye daur ki mohabbat the.

Is khushi mein mujhe khyaal aaya,
ghum ke din kitne khoobsurat the.

Din mein in jugnuon se kya lena,
ye diye raat ki zaroorat the. !!

Bashir Badr Poetry Collection

Subscribe us for bashir badr poems, urdu poetry, shayari, nazms, poetry, shair, ghazals, shairy.

Suna Hai Log Usey Aankh Bhar Ke Dekhte Hain..

Painting of beautiful women- ahmad faraz shayari- poetry picture- beautiful painting

Suna hai log usey aankh bhar ke dekhte hain,
so uss ke shehar mein kuchh din thehar ke dekhte hain.

Suna hai rabt hai uss ko kharaab haalon se,
so apne aap ko barbaad kar ke dekhte hain.

Suna hai dard ki gaahak hai chashm-e naaz uss ki,
so hum bhi uss ki gali se guzar ke dekhte hain.

Suna hai uss ko bhi hai sher-o shayari se shaghaf,
so hum bhi mojzey apne hunar ke dekhte hain.

Suna hai bole toh baaton se phool jhadte hain,
ye baat hai toh chalo baat kar ke dekhte hain.

Suna hai raat usey chaand takta rehta hai,
sitaare baam-e falak se utar ke dekhte hain.

Suna hai din ko usey titliyan staati hain,
suna hai raat ko jugnu thehar ke dekhte hain.

Suna hai hashr hain uss ki ghazaal si aankhein,
suna hai uss ko hiran dasht bhar ke dekhte hain.

Suna hai raat se badh kar hain kaakulen uss ki,
suna hai shaam ko saaye guzar ke dekhte hain.

Suna hai uss ki siyaah chashmagi qayamat hai,
so uss ko surma-farosh aah bhar ke dekhte hain.

Suna hai uss ke labbon se ghulaab jalte hain,
so hum bahaar pe ilzaam dhar ke dekhte hain.

Suna hai aaina timsaal hai jabeen uss ki,
jo saada dil hain usey ban sanwar ke dekhte hain.

Suna hai jab se hamaail hai uski gardan mein,
mizaaj aur hi laal-o gouhar ke dekhte hain.

Suna hai chashm-e tasawwur se dasht-e imkaan mein,
palang zaaviye uss ki kamar ke dekhte hain.

Suna hai uss ke badan ki taraash aisi hai,
ki phool apni qabaayen katar ke dekhte hain.

Woh sarv-qadd hai magar be-gul-e-muraad nahin,
ki uss shajar pe shagoofe samar ke dekhte hain.

Bas ek nigaah se lut,ta hai qaafila dil ka,
so raah-rawan-e-tamanna bhi dar ke dekhte hain.

Suna hai uss ke shabistaan se mutassil hai bahisht,
makeen udhar ke bhi jalwe idhar ke dekhte hain.

Ruke toh gardishein uska tawaaf karti hain,
chale toh uss ko zamaane thehar ke dekhte hain.

Kise naseeb ki be-pairhan usey dekhe,
kabhi kabhi dar-o deewar ghar ke dekhte hain.

Kahaniyan hi sahi sab mubalghe hi sahi,
agar woh khwaab hai tabeer kar ke dekhte hain.

Ab uss ke shehar mein thehrein ki kooch kar jayen,
Faraz aao sitaare safar ke dekhte hain. !!

Meri Chaahat Ka Sar-e Aam Charcha Toh Na Karo..

complaining girl

Meri chaahat ka sar-e aam toh charcha na karo,
Kam to pehle bhi nahin aur toh ruswa na karo.

Kabhi jugnu, kabhi taare, kabhi nargis keh kar
Tum meri aankhon ko iss tarah chheda na karo.

Bhaamp jaaye na kahin dil ki lagi ye duniya,
Yun shafaq ban ke mere chehre pe thehra na karo.

Baat chhoti si bhi afsaana bana deti hai,
Tum kitaabon pe mere naam ko likha na karo.

Hai ibaadat ki tarah naam tumhara bhi mujhe,
Tum saheefey ki tarah tum mujhe socha na karo.

Dil ko bechain sa karti hain tumhari aankhein,
Raat ko derr talak tum mujhe socha na karo.

Saamne sab ke kare kis tarah iqraar ‘Batool
Yun sar-e bazm toh iss se ye taqaaza na karo .!!

 

Zara Thehar Jaao..

Khade hain khwaab hatheli pe rakh kar,
Subah ki aas mein ye jugnu lamhe.
Tumhare dastakein gumm ho rahi hain,
Na aane ke bahaane dhundate ho..
Samajhna hai samajh jaao,
Jo jana hai chale jaao,
Magar ye dil kyon ab tak keh reha hai ?
Zara thehar jaao..
Zara thehar jaao..!

Ulajhte hain sulajhte hain,
Bikhar ke khush bhi rehte hain.
Dilon ki kashmakash mein aise bhi,
Kuchh mod milte hain..
Naye lafzon se likhi jayegi ab ye kahaani.
Muhabbat naam hai jis ka..
Usey sab jhooth kehte hain.
Samajhna hai samajh jaao..
Jo jana hai chale jaao..
Magar ye dil kyon ab tak keh raha hai
Zara thehar jaao..
Zara thehar jaao …!!

Tere Badan Se Jo Chhu Kar Idhar Bhi Aata Hai..

Tere badan se jo chhu kar idhar bhi aata hai,
misaal-e rang woh jhaunka nazar bhi aata hai.

Tamaam shab jahan jalta hai ek udaas diya,
hawa ki raah mein ek aisa ghar bhi aata hai.

Woh mujhe toot ke chaahega chhod jaayega,
mujhe khabar thi usey ye hunar bhi aata hai.

Ujaad bann mein utarta hai ek jugnu,
hawa ke saath koi humsafar bhi aata hai.

wafa ki kaun si manzil pe usne chhoda tha,
ki woh toh yaad humein bhool kar bhi aata hai.

Jahan lahoo ke samundar ki hadd theharti hai,
wahin jazeera-e-laal-o-gauhar* bhi aata hai.

Chale jo zikar farishton ki paarsaai* ka,
toh zer-e-behas* maqaam-e-bashar* bhi aata hai.

Abhi sinaan* ko sambhaale rahein aduu mere,
ki un safon* mein mera sar bhi aata hai.

Kabhi kabhi mujhe milne bulandiyon se,
shua-e-subh* ki soorat utar bhi aata hai.

Isiliye main kisi shab na so saka ‘Mohsin
woh mehtaab kabhi baam* par bhi aata hai. !!

*[Jazeera-e-laal-o-gauhar=an island of rubies and pearls,
Paarsaai=holiness, zer-e-behas=under discussion,
Maqaam-e-bashar=place of human, baam=tarace
Sinaan=sword, Safon=lines, Shua-e-subh=ray of morning]

Mohsin Naqvi

Ubharti Hui Siskiyon Ko Tum Bhool Jaao Toh Achha Hai..

sad-weeping girl at night, girl weeping in love

 

Andheri raaton ki tariqion mein,
ubharti hui siskiyon ko
tum bhool jaao..
toh achha hai.

Unn anjaan raaston mein,
jis mein tumhaare
aur uske
qadam mile they
unn raaston par
palat ke na jaao..
toh achha hai.

unn zard patton ko,
jin mein tamaam
zard yaaden ghul ke
sookh chuki thi
apne qadamon se
tum raund jaao..
toh achha hai.

kya hua gar,
baalon mein suffaid chaandi utar chuki hai,
gulaab saare murjha gaye hain,
Aankh se aansu
tapak rahe hain,
dil jo tumhara
tardap reha hai,
tum ab iss par itminaan ka haath rakho,
kuchh iss ko bhi tum
Qaraar de do,
jo chale gaye hain
nahi woh phir aane waale,
bas humaare paas hain faqat
yaadien chhod jaate.!
unn yaadon ke jugnuon ko,
kahin door waadi mein
daba do toh achha hai. !!