Home / Tag Archives: jism-shayari

Tag Archives: jism-shayari

Shor Yunhi Na Parindon Ne Machaaya Hoga..

Shor yunhi na parindon ne machaaya hoga,
koi jungle ki taraf shehar se aaya hoga.

Ped ke kaatne walon ko ye maloom toh tha,
jism jal jaayenge jab sar pe na saaya hoga.

Baani-e-jashn-e-bahaaran ne ye socha bhi nahin,
kis ne kaanton ko lahoo apna pilaaya hoga.

Bijli ke taar pe baitha hua hansta panchhi,
sochta hai ki woh jungle toh paraaya hoga.

Apne jungle se jo ghabra ke ude the pyaase,
har saraab un ko samundar nazar aaya hoga. !!

Kaifi Azmi

Ghar Se Soch Ke Nikla Hun Ki Mar Jaana Hai..

Ghar se soch ke nikla hun ki mar jaana hai,
ab koi raah dikha de ki kidhar jaana hai.

Jism se saath nibhaane ki mat ummeed rakho,
iss musaafir ko toh raaste mein thehar jaana hai.

Maut lamhe ki sadaa zindegi umron ki pukaar,
main yahi soch ke zinda hun ki mar jaana hai.

Nasha aisa tha ki mai-khane ko duniya samjha,
hosh aaya toh khyaal aaya ki ghar jaana hai.

Mere jazbe ki badi qadar hai logon mein magar,
mere jazbe ko mere saath hi mar jaana hai. !!

Rahat Indori

Aur Hain Kitni Manzilen Baaqi..

Aur hain kitni manzilen baaqi,
jaan kitni hai jism mein baaqi.

Zinda logon ki bood-o-baash mein hain,
murda logon ki aadaten baaqi.

Uss se milna woh khwaab-e-hasti mein,
khwaab maadoom hasraten baaqi.

Beh gaye rang-o-noor ke chashme,
rah gayi un ki rangaten baaqi.

Jin ke hone se hum bhi hain aye dil,
shehar mein hain woh sooraten baaqi.

Woh toh aa ke ‘munir jaa bhi chuka,
ek mehak si hai baagh mein baaqi. !!

Munir Niazi

Ab Apni Anaa Se Mujhe Dar Lagne Laga Hai..

Ab apni anaa se mujhe dar lagne laga hai,
sehra mein na jaane kahin sar lagne laga hai.

Aage ka safar sirf meri rooh karegi,
ab jism bhi samaan-e safar karne laga hai.

Lagta hai ki dehleez par aa pahunchi qayaamat,
ek bhai ko ek bhai se dar lagne laga hai.

Waise toh koi cheez nahin badli hai lekin,
tum jab se gaye ho mujhe dar lagne laga hai.

Aye sehra-navardi mujhe aabadi se le chal,
kuchh roz se zindaan mujhe ghar lagne laga hai.

Unko nahin maloom ki ghar hote hain kaise,
bachchon ko toh footpath hi ghar lagne laga hai. !!

Munawwar Rana

Tujh Ko Socha Toh Pata Ho Gaya Ruswaai Ko..

Tujh ko socha toh pata ho gaya ruswaai ko,
maine mehfooz samajh rakha tha tanhaai ko.

Jism ki chaah lakeeron se ada karta hai,
khaaq samjhega musawwir teri angdaai ko.

Apni dariyaai pe itra na bahut aye dariya,
ek qatra hi bahut hai teri ruswaai ko.

Chaahe jitna bhi bigad jaaye zamaane ka chalan,
jhooth se haarte dekha nahin sacchaai ko.

Saath maujon ke sabhi ho jahan behne waale,
kaun samjhega samandar teri gehraai ko. !!

Wasim Barelvi