Home / Tag Archives: izhaar

Tag Archives: izhaar

Sabhi Jazbaat Khayalat Badal Jaate Hain..

Urdu Poetry

Sabhi jazbaat khyaalaat badal jaate hain,
yun mohabbat mein ye din raat badal jaate hain.

Pyaar toh un ko bhi hum se hai magar jaane kyon,
hum karen baat toh woh baat badal jaate hain.

Aarzoo toh hai ki izhaar-e-mohabbat kar dun,
lafz chunta hun toh lamhaat badal jaate hain.

Kitni nafrat thi kabhi pehle mohabbat se humein.
ho mohabbat toh khyaalaat badal jaate hain.

Ek sa waqt mohabbat mein kahan rehta hai,
gardish-e-waqt se haalaat badal jaate hain. !!

____________________________________

Read All Urdu Legend Poet’s Poetry

Likh Diya Apne Dar Pe Kisi Ne Iss Jagah Pyar Karna Mana Hai..

Likh diya apne dar pe kisi ne iss jagah pyar karna mana hai,
pyar agar ho bhi jaaye kisi ko iss ka izhaar karna mana hai.

Un ki mehfil mein jab koi aaye pehle nazaren woh apni jhukaaye,
woh sanam jo khuda ban gaye hain un ka deedar karna mana hai.

Jaag uthenge toh aahen bharenge husn waalon ko ruswa karenge,
so gaye hain jo furkat ke maare un ko bedaar karna mana hai.

Hum ne ki arz-e banda-parwar kyon sitam dha rahe ho hum par,
baat sun kar woh humari bole hum se taqraar karna mana hai.

Saamne jo khula hai jharokha kha na jaana ‘qateel uss ka dhokha,
ab bhi apne liye uss gali mein shuak-e-deedar karna mana hai. !!

Qateel Shifai

Kisne Sang-e Khaamoshi Pheinka Bhare Bazaar Par..

Kis ne sang-e khaamoshi pheinka bhare bazaar par,
Ek sukoot-e-marg* taari hai darr-o deewaar par.

Tune apne zulf ke saaye mein afsaane kahe,
Mujh ko zanjeeren mili hain jurrat-izhaar par.

Shaakh-e uriyaan par khila ek phool iss andaaz se,
Jis tarah taaza lahoo chamke nayi talwaar par.

Sangdil ahbaab ke daaman mein ruswaai ke phool,
Maine dekha hai naya manzar faraaz-e-daar* par.

Ab koi tohmat bhi wajah-e karb-e ruswaai nahi,
Zindagi ek umar se chup hai tere israar par.

Main sar-e maqtal hadees zindagi kehta raha,
Ungliyan uthti rahi ‘mohsin mere kirdaar par. !!

*[ Sukoot-e-marg=silence of death,
Faraaz-e-daar=elevated ]

Mohsin Naqvi

Khula Hai Jhooth Ka Bazaar Aao Sach Bolein..

Khula hai jhooth ka bazaar aao sach bolein,
na ho balaa se kharidaar aao sach bolein.

Sukoot* chhaya hai insaaniyat ki qabaron par,
yahi hai mauka-e izhaar aao sach bolein.

Humein gawaah banaya hai waqt ne apna,
ba-naam-e azmat-e kirdaar aao sach bolein.

Suna hai waqt ka haakim bada hi munsif hai,
pukaar kar sar-e bazaar aao sach bolein.

Tamaam shehar mein kya ek bhi nahi mansoor*,
kahenge kya rasan-o daar* aao sach bolein.

Bajaa ki khu-e wafa* ek bhi haseen mein nahi,
kahan ke hum bhi wafadaar aao sach bolein.

Jo wasf* hum mein nahi kyon karein kisi mein talaash,
agar zameer hai bedaar aao sach bolein.

Chhupaye se kahin chhupte hain daagh chehre ke,
nazar hai aaina-bardaar aao sach bolein.

Qateel’ jin pe sada pattharon ko pyar aaya,
kidhar gaye woh gunahgaar aao sach bolein. !!
*[ sukoot=silence |
mansoor=name of a Sufi saint who was hanged for saying “I am God”
khu-e wafa=habit of constancy | wasf=quality ]

Rah-e Mula isey izhaar Na Samjha Jaaye..

Uss ne mujhe phool pesh kiya aur keha, 

Rah-e mula isey izhaar na samjha jaaye.  !!

Hum Ko Toh Umar Lagi Yaar Tak Aate Aate..

Lafz toote lab-e izhaar tak aate aate,
Mar gaye hum tere mayaar tak aate aate.

Hum samajhte the ki kuchh waqt lagega shaayad,
Ek inkaar ko iqraar tak aate aate.

Haath rakhna pada seene pe humein bhi aakhir,
Dil kahan rehta hai dildaar tak aate aate.

Ek lamhe ki musaafat bhi badi hoti hai,
Hum ko toh umar lagi yaar tak aate aate. !!

Ishq Hai Toh Ishq Ka Izhaar Hona Chahiye..

Ishq hai toh ishq ka izhaar hona chahiye,
aap ko chehre se bhi beemar hona chahiye.

Aap dariya hain toh iss waqt hum khatre mein hain,
aap kashti hain toh hum ko paar hona chahiye.

Aire – gaire log bhi padhne lage hain inn dino,
aap ko aurat nahi akhbaar hona chahiye.

zindagi tu kab talak dar-dar phirayegi humein?
toota phoota hi sahi, ghar baar hona chahiye.

Apni yaadon se kaho ek din ki chhutti de mujhe,
ishq ke hissey mein bhi itwaar hona chahiye. !!

Munawwar Rana