Home / Tag Archives: Ishq-shayari

Tag Archives: Ishq-shayari

Bechain Bahut Phirna Ghabraaye Hue Rahna..

Bechain bahut phirna ghabraaye hue rahna,
ek aag si jazbon ki dahakaaye hue rahna.

Chhalkaaye hue chalana khushboo lab-e-laali ki,
ek baagh sa saath apne mehkaaye hue rahna.

Uss husn ka shewa hai jab ishq nazar aaye,
parde mein chale jana, sharmaaye hue rahna.

Ek shaam si kar rakhna kaajal ke karishme se,
ek chaand sa aankhon mein chamkaaye hue rahna.

Aadat hi bana li hai tum ne toh ‘munir apni
jis shehar mein bhi rahna uktaaye hue rahna. !!

Munir Niazi

Saaqi Par Ilzaam Na Aaye..

Saaqi par ilzaam na aaye,
chaahe tujh tak jaam na aaye.

Tere siwa jo ki ho mohabbat,
meri jawaani kaam na aaye.

Jin ke liye mar bhi gaye hum,
woh chal kar do gaam na aaye.

Ishq ka sauda itna garaan hai,
inhen hum se kaam na aaye.

Maikhaane mein sab hi toh aaye,
lekin ‘jigar ka naam na aaye. !!

Jigar Moradabadi

Ishq Ko Be-naqaab Hona Tha..

Ishq ko be-naqaab hona tha,
aap apna jawaab hona tha.

Mast-e-jaam-e-sharaab hona tha,
bekhud-e-iztiraab hona tha.

Teri aankhon ka kuchh qusoor nahin,
haan mujhi ko kharaab hona tha.

Aao mil jaao muskura ke gale,
ho chuka jo itaab hona tha.

Koocha-e-ishq mein nikal aaya,
jis ko khana-kharaab hona tha.

Mast-e-jaam-e-sharaab khaak hote,
garq-e-jaam-e-sharaab hona tha.

Dil ki jis par hain naqsh-e-ranga-rang
uss ko saada kitaab hona tha.

Hum ne nakaamiyon ko dhoond liya,
aakhirash kaamyaab hona tha.

Haaye woh lamha-e-sukoon ki jise,
mahshar-e-iztiraab hona tha.

Nigaah-e-yaar khud tadap uthti,
shart-e-awwal kharaab hona tha.

Kyon na hota sitam bhi bepaayan,
karam-e-behisaab hona tha.

Kyon nazar hairaton mein doob gayi,
mauj-e-sad-iztiraab hona tha.

Ho chuka roz-e-awwali hi ‘jigar
jis ko jitna kharaab hona tha. !!

Jigar Moradabadi

Ishq Ki Daastan Hai Pyare..

Ishq ki daastan hai pyare,
apni apni zubaan hai pyare.

Kal tak aye dard ye tapaak na tha,
aaj kyon meharbaan hai pyare.

Saaya-e-ishq se khuda hi bachaaye,
ek hi qahar maan hai pyare.

Iss ko kya keejiye jo lab na khulen,
yun toh munh mein zubaan hai pyare.

Ye taghaful bhi hai nigah-aamez,
iss mein bhi ek shaan hai pyare.

Jis ne aye dil diya hai apna ghum,
uss se tu badgumaan hai pyare.

Dil ka aalam nigaah kya jaane,
ye toh sirf ek zubaan hai pyare.

Mere ashkon mein ehtimaam na dekh,
aashiqi ki zubaan hai pyare.

Hum zamaane se inteqaam toh lein,
ek haseen darmiyaan hai pyare.

Ishq ki ek ek nadaani,
ilm-o-hikmat ki jaan hai pyare.

Tu nahin main hun main nahin tu hai,
ab kuchh aisa gumaan hai pyare.

Kehne suNne mein jo nahin aati,
woh bhi ek daastaan hai pyare.

Rakh qadam phoonk phoonk kar nadaan,
zarre zarre mein jaan hai pyare.

Kis ko dekhe se dil ko chot lagi,
kyon ye utri kamaan hai pyare.

Teri barham-khiraamiyon ki kasam,
dil bahut sakht jaan hai pyare.

Haan tere ehad mein ‘jigar ke siwa
har koi shaadmaan hai pyare. !!

Jigar Moradabadi

Ishq Mein Lajaawab Hain Hum Log..

Ishq mein lajawaab hain hum log,
maahtaab, aaftaab hain hum log.

Garche ahal-e-sharaab hain hum log,
ye na samjho kharaab hain hum log.

Shaam se aa gaye jo peene par,
subah tak aaftaab hain hum log.

Hum ko daava-e-ishqbaazi hai,
mustahiqq-e-azaab hain hum log.

Naaz karti hai khana-veerani,
aise khana-kharaab hain hum log.

Hum nahin jaante khizaan kya hai,
kushtagaan-e-shabaab hain hum log.

Tu humara jawaab hai tanha,
aur tera jawaab hain hum log.

Tu hai dariya-e-husn-o-mahboobi,
shakl-e-mauj-o-hubaab hain hum log.

Go saraapa hujaab hain phir bhi,
tere rukh ki naqaab hain hum log.

Khoob hum jaante hain apni qadr,
kitne na-kaamyaab hain hum log.

Hum se ghaflat na ho toh phir kya ho,
rah-rav-e-mulk-e-khwaab hain hum log.

Hum pe naazil hua saheefa-e-ishq,
saahibaan-e-kitaab hain hum log.

Har haqeeqat se jo guzar jaayen,
woh sadaaqat-ma.aab hain hum log.

Jab mili aankh hosh kho baithe,
kitne haazir-jawaab hain hum log.

Hum se puchho ‘jigar ki sarmasti,
mahram-e-aan-janaab hain hum log. !!

Jigar Moradabadi

Hum Ko Mita Sake Ye Zamaane Mein Dum Nahin..

Hum ko mita sake ye zamaane mein dum nahin,
hum se zamaana khud hai zamaane se hum nahin.

Be-faayda alam nahin bekaar ghum nahin,
taufeeq de khuda toh ye nemat bhi kam nahin.

Meri zubaan pe shikwa-e-ahl-e-sitam nahin,
mujh ko jagaa diya yahi ehsaan kam nahin.

Ya rab! hujoom-e-dard ko de aur wus.aten
daaman toh kya abhi meri aankhen bhi namm nahin.

Shikwa toh ek chhed hai lekin haqeeqatan,
tera sitam bhi teri inaayat se kam nahin.

Milta hai kyon maza sitam-e-rozgaar mein,
tera karam bhi khud jo shareek-e-sitam nahin.

Ab ishq uss muqaam pe hai justujoo-navard
saaya nahin jahaan koi naqs-e-kadam nahin.

Zaahid kuchh aur ho na ho maikhaane mein magar,
kya kam ye hai ki shikwa-e-dair-o-haram nahin.

Marg-e Jigar pe kyon teri aankhen hain ashk-rez
ek saaniha sahi magar itna aham nahin. !!

Jigar Moradabadi

Duniya Ke Sitam Yaad Na Apni Hi Wafa Yaad..

Duniya ke sitam yaad na apni hi wafa yaad,
ab mujh ko nahin kuchh bhi mohabbat ke siwa yaad.

Main shikwa ba-lab tha mujhe ye bhi na raha yaad,
shayad ki mere bhoolne waale ne kiya yaad.

Chheda tha jise pahle-pahal teri nazar se,
ab tak hai woh ek naghma-e-be-saaz-o-sadaa yaad.

Jab koi haseen hota hai sargarm-e-nawaazish,
uss waqt woh kuchh aur bhi aate hain siwa yaad.

Kya jaaniye kya ho gaya arbaab-e-junoon ko,
marne ki adaa yaad na jeene ki adaa yaad.

Muddat hui ek haadsa-e-ishq ko lekin,
ab tak hai tere dil ke dhadakne ki sadaa yaad.

Haan haan tujhe kya kaam mere shiddat-e-ghum se,
haan haan nahin mujh ko tere daaman ki hawaa yaad.

Main tark-e-raah-o-rasm-e-junoon kar hi chuka tha,
kyon aa gayi aise mein teri lagazish-e-paa yaad

Kya lutf ki main apana pata aap bataaun,
keeje koi bhooli hui khaas apni adaa yaad. !!

Jigar Moradabadi