Home / Tag Archives: Husn-shayari

Tag Archives: Husn-shayari

Aankhon Mein Bas Ke Dil Mein Samaa Kar Chale Gaye..

Aankhon mein bas ke dil mein samaa kar chale gaye,
khwaabida zindagi thi jagaa kar chale gaye.

Husn-e-azal ki shaan dikha kar chale gaye,
ek waaqiya sa yaad dila kar chale gaye.

Chehre tak aasteen woh laa kar chale gaye,
kya raaz tha ki jis ko chhupa kar chale gaye.

Rag rag mein iss tarah woh samaa kar chale gaye,
jaise mujh hi ko mujh se chura kar chale gaye.

Meri hayaat-e-ishq ko de kar junoon-e-shauq,
mujh ko tamaam hosh banaa kar chale gaye.

Samjhaa ke pastiyaan mere auj-e-kamaal ki,
apni bulandiyan woh dikha kar chale gaye.

Apne farogh-e-husn ki dikhlaa ke wus.aten
mere hudood-e-shauq badha kar chale gaye.

Har shai ko meri khaatir-e-nashaad ke liye,
aaina-e-jamaal bana kar chale gaye.

Aaye the dil ki pyaas bujhaane ke waaste,
ek aag si woh aur laga kar chale gaye.

Aaye the chashm-e-shauq ki hasrat nikaalne,
sar-ta-qadam nigaah bana kar chale gaye.

Ab kaarobaar-e-ishq se fursat mujhe kahan,
kaunain ka woh dard badhaa kar chale gaye.

Shukr-e-karam ke saath ye shikwa bhi ho qubool,
apna sa kyon na mujh ko bana kar chale gaye.

Lab tharthara ke rah gaye lekin woh aye ‘jigar
jaate hue nigaah milaa kar chale gaye. !!

Jigar Moradabadi

Bas Iss Qadar Hai Khulaasa Meri Kahaani Ka..

Bas iss qadar hai khulaasa meri kahaani ka,
ki ban ke toot gaya ek habaab paani ka.

Mila hai saaqi toh raushan hua hai ye mujh par,
ki hazf tha koi tukda meri kahaani ka.

Mujhe bhi chehre pe raunaq dikhaayi deti hai,
ye mojaza hai tabeebon ki khush-bayaani ka.

Hai dil mein ek hi khwaahish woh doob jaane ki,
koi shabaab koi husn hai rawaani ka.

Libaas-e hashr mein kuchh ho toh aur kya hoga,
bujha sa ek chhanaaka teri jawaani ka.

Karam ke rang nihaayat ajeeb hote hain,
sitam bhi ek tareeqa hai meharbaani ka.

Adam’ bahaar ke mausam ne khudkushi kar li,
khula jo rang kisi jism-e argawaani ka. !!

Abdul Hamid Adam

Jahaan Mein Haal Mera Iss Qadar Zaboon Hua..

Jahaan mein haal mera iss qadar zaboon hua,
ki mujh ko dekh ke bismil ko bhi sukoon hua.

Ghareeb dil ne bahut aarzuen paida ki,
magar naseeb ka likha ki sab ka khoon hua.

Woh apne husn se waaqif main apni aql se sair,
unhone hosh sambhaala mujhe junoon hua.

Umeed-e-chashm-emurawwat kahan rahi baaqi,
zariya baaton ka jab sirf telephone hua.

Nigaah-e-garm christmas mein bhi rahi hum par,
humaare haq mein december bhi maah-e-june hua. !!

Akbar Allahabadi

Yun Hi Besabab Na Phira Karo, Koi Shaam Ghar Bhi Raha Karo..

Sad_sitting_thinking_girl_women_in_memories_evening_Bashir_badr_poetry_shayari

Yun hi besabab na phira karo, koi shaam ghar bhi raha karo
woh ghazal ki sacchi kitaab hai, usey chupke chupke padha karo.

Koi haath bhi na milaayega jo gale miloge tapaak se,
ye naye mizaaj ka shehar hai zara faasle se mila karo.

Abhi raah mein kayi mod hain, koi aayega koi jaayega
tumhen jis ne dil se bhula diya, usey bhoolne ki dua karo.

Mujhe ishtihaar si lagti hain ye mohabbaton ki kahaaniyan,
jo kaha nahin woh suna karo, jo suna nahin woh kaha karo.

Kabhi husn-e pardanashin bhi ho zara aashiqana libaas mein,
jo main ban sanwar ke kahin chalun, mere saath tum bhi chala karo.

Ye khizan ki zard si shaal mein, jo udaas pedd ke paas hai
ye tumhaare ghar ki bahaar hai, isey aansuon se hara karo. !!

Bashir Badr

Husn-e Baazaar Hua Kya Ki Khatm Hua..

Husn-e baazaar hua kya ki khatm hua
aaya palkon pe toh aansoo ka safar khatm hua.

Umar bhar tujh se bichhdne ki kasak hi na gayi,
kaun kehta hai ki muhabbat ka asar khatm hua.

Nayi kaaloni mein bacchon ki zidden le toh gayi,
baap dada ka banaya hua ghar khatm hua.

Jaa.. humesha ko mujhe chhod ke jaane waale,
tujh se har lamha bichhdne ka toh dar khatm hua. !!

Wasim Barelvi

Raat Ke Tukadon Pe Palna Chhod De..

Raat ke tukadon pe palna chhod de,
shama se kehna ki jalna chhod de.

Mushkilen toh har safar ka husn hain,
kaise koi raah chalna chhod de.

Tujh se umeed-e wafa bekaar hai,
kaise ek mausam badalna chhod de.

Main toh ye himmat dikha paya nahin,
tu hi mere saath chalna chhod de.

Kuchh toh kar aadaab-e mehfil ka lihaaz,
yaar ye pehloo badalna chhod de. !!

Wasim Barelvi

Ek Aangan Mein Do Aangan Ho Jaate Hain..

Ek aangan mein do aangan ho jaate hain,
Mat puchha kar kis kaaran ho jaate hain.

Husn ki daulat mat baanta kar logon mein,
Aise waise log mahaajan ho jaate hain.

Khush-haali mein sab hote hain ounchi zaat,
Bhookhe nange log harijan ho jaate hain.

Raam ki basti mein jab danga hota hai,
Hindu-Muslim sab raavan ho jaate hain. !!