Home / Tag Archives: humsafar

Tag Archives: humsafar

Ye Chiragh Benazar Hai Ye Sitara Bezuban Hai – Bashir Badr

Bashir Badr Poetry

Ye chiraagh benazar hai ye sitaara bezubaan hai,
abhi tujh se milta julta koi dusra kahan hai.

Wahi shakhs jis pe apne dil-o-jaan nisaar kar dun,
woh agar khafa nahin hai toh zaroor badgumaan hai.

Kabhi paa ke tujh ko khona kabhi kho ke tujh ko paana,
ye janam janam ka rishta tere mere darmiyaan hai.

Mere saath chalne waale tujhe kya mila safar mein,
wahi dukh bhari zameen hai wahi ghum ka aasmaan hai.

Main issi gumaan mein barson mutmain raha hun,
tera jism betgaiyyur hai mera pyaar zaavidaan hai.

Unhi raaston ne jis par kabhi tum the saath mere,
mujhe rok rok poochha tera humsafar kahan hai. !!

Bashir Badr Poetry Collection

Subscribe us for Bashir badr & all urdu legend’s poetry, Ghazals, poems, nazms, shayaries.

Mohabbat Ki Rangeeniyaan Chhod Aaye..

Habib Jalib Poetry

Mohabbat ki rangeeniyaan chhod aaye,
tere shehar main ek jahaan chhod aaye.

Pahaadon ki woh mast-o-shadaab waadi,
jahan hum dil-e-naghma khawan chhod aaye.

Woh sabza woh dariya woh pedon ke saaye,
woh geeton bhari bastiyaan chhod aaye.

Haseen panghaton ka woh chaandi sa paani,
woh barkha ki rut woh saamaan chhod aaye.

Bahut se mile humsafar raste mein,
nahin yaad kis ko kahan chhod aaye.

Bahut door hum aa gaye uss gali se,
bahut door woh aastaan chhod aaye.

Bahut meharbaan thi woh gul-posh raahen,
magar hum unhen meharbaan chhod aaye.

Bhagolon ki soorat yahan phir rahe hain,
nasheman sar-e-gulistaan chhod aaye.

Ye aijaz hai husn-e-aawaargi ka,
jahan bhi gaye daastaan chhod aaye.

Chale aaye un rahguzaaron se ‘jalib
magar hum wahan qalb-o-jaan chhod aaye. !!

Click Here For Habib Jalib Poetry Collection

Bahut Hi Muddat Ke Baad Kal Jab..

Sad boy at window in night

Bahut hi muddat ke baad kal jab..
kitaab-e maazi ko maine khola…
Bahut se chehre nazar mein utare..
bahut se naamon pe dil paseeja…
Ek aisa safha bhi uss mein aaya..
likha hua tha jo aansuon se…
Ki jiska unwan “humsafar” tha..
jo safha sab se hi motabar tha…
Kuchh aur aansu phir uss pe tapke..
phir uss se aage main padh na paya…
Kitaab-e maazi ko bandh kar ke..
uski baaton mein kho gaya main…
Agar woh milta toh kaisa hota..?
inhi khyaalon mein so gaya main …!

Jab Milne Laga Uss Ki Mohabbat Mein Sukoon..

crying girl in love

Jab milne laga uss ki mohabbat mein sukoon,
Phir yun hua woh mera saath chhod gaya..

Abhi bahut baaki thi hasratein bechain dil mein,
Magar woh shakhs adhoori mulaqaat chhod gaya..

Fakhr toh hai ki woh tha mera humsafar kabhi,
Dukh ye hai ki beech raah mein woh mera haath chhod gaya..

Bin uss ke rehna ab ek azaab sa lagta hai,
Na jaane zindagi mein woh kaise jazbaat chhod gaya..

Woh shakhs toh chala gaya zindagi se,
Magar aankhon mein meri aansuon ki barsaat chhod gaya …!

Kahin Aah Ban Ke Labb Par Tera Naam Aa Na Jaye..

Kahin aah ban ke labb par tera naam aa na jaye,
tujhe bewafa kahun main, woh muqaam aa na jaye.

Jise sun ke toot jaye mera aarzoo bhara dil,
teri anjuman se mujh ko woh paiyaam aa na jaye.

Woh jo manzilon par laa kar kisi humsafar ko lootein,
unhi raahzano mein tera kahin naam aa na jaye.

Isi fikar mein hain ghalat yeh nizaam ke bande,
jo tamaam zindagi hai woh nizaam aa na jaye .!!

Tere Badan Se Jo Chhu Kar Idhar Bhi Aata Hai..

Tere badan se jo chhu kar idhar bhi aata hai,
misaal-e rang woh jhaunka nazar bhi aata hai.

Tamaam shab jahan jalta hai ek udaas diya,
hawa ki raah mein ek aisa ghar bhi aata hai.

Woh mujhe toot ke chaahega chhod jaayega,
mujhe khabar thi usey ye hunar bhi aata hai.

Ujaad bann mein utarta hai ek jugnu,
hawa ke saath koi humsafar bhi aata hai.

wafa ki kaun si manzil pe usne chhoda tha,
ki woh toh yaad humein bhool kar bhi aata hai.

Jahan lahoo ke samundar ki hadd theharti hai,
wahin jazeera-e-laal-o-gauhar* bhi aata hai.

Chale jo zikar farishton ki paarsaai* ka,
toh zer-e-behas* maqaam-e-bashar* bhi aata hai.

Abhi sinaan* ko sambhaale rahein aduu mere,
ki un safon* mein mera sar bhi aata hai.

Kabhi kabhi mujhe milne bulandiyon se,
shua-e-subh* ki soorat utar bhi aata hai.

Isiliye main kisi shab na so saka ‘Mohsin
woh mehtaab kabhi baam* par bhi aata hai. !!

*[Jazeera-e-laal-o-gauhar=an island of rubies and pearls,
Paarsaai=holiness, zer-e-behas=under discussion,
Maqaam-e-bashar=place of human, baam=tarace
Sinaan=sword, Safon=lines, Shua-e-subh=ray of morning]

Mohsin Naqvi