Home / Tag Archives: hosh-shayari

Tag Archives: hosh-shayari

Ghar Se Soch Ke Nikla Hun Ki Mar Jaana Hai..

Ghar se soch ke nikla hun ki mar jaana hai,
ab koi raah dikha de ki kidhar jaana hai.

Jism se saath nibhaane ki mat ummeed rakho,
iss musaafir ko toh raaste mein thehar jaana hai.

Maut lamhe ki sadaa zindegi umron ki pukaar,
main yahi soch ke zinda hun ki mar jaana hai.

Nasha aisa tha ki mai-khane ko duniya samjha,
hosh aaya toh khyaal aaya ki ghar jaana hai.

Mere jazbe ki badi qadar hai logon mein magar,
mere jazbe ko mere saath hi mar jaana hai. !!

Rahat Indori

Ghar Se Soch Ke Nikla Hun Ki Mar Jaana Hai..
5 (100%) 1 vote

Uthi Nigaah Toh Apne Hi Ru-ba-ru Hum The..

Uthi nigaah toh apne hi ru-ba-ru hum the,
zameen aaina-khana thi chaar soo hum the.

Dinon ke baad achaanak tumhara dhyan aaya,
khuda ka shukr ki uss waqt ba-vazu hum the.

Woh aaina toh nahin tha par aaine sa tha,
woh hum nahin the magar yaar hu-ba-hu hum the.

Zameen pe ladte hue aasmaan ke narge mein,
kabhi kabhi koi dushman kabhu kabhu hum the.

Humara zikr bhi ab jurm ho gaya hai wahan,
dinon ki baat hai mehfil ki aabroo hum the.

Khyaal tha ki ye pathraav rok dein chal kar,
jo hosh aaya toh dekha lahoo lahoo hum the. !!

Rahat Indori

Uthi Nigaah Toh Apne Hi Ru-ba-ru Hum The..
5 (100%) 2 votes

Hoti Hai Tere Naam Se Wehshat Kabhi Kabhi..

Hoti hai tere naam se wehshat kabhi kabhi,
barham hui hai yun bhi tabiyat kabhi kabhi.

Aye dil kise naseeb ye taufeeq-e-iztiraab,
milti hai zindagi mein ye raahat kabhi kabhi.

Tere karam se hai aye alam-e-husn-aafreen,
dil ban gaya hai dost ki khalwat kabhi kabhi.

Josh-e-junoon mein dard ki tughyaniyon ke saath,
ashkon mein dhal gayi teri soorat kabhi kabhi.

Tere qareeb reh ke bhi dil mutmain na tha,
guzri hai mujh pe ye bhi qayaamat kabhi kabhi.

Kuchh apna hosh tha na tumhara khyal tha,
yun bhi guzar gayi shab-e-furqat kabhi kabhi.

Aye dost hum ne tark-e-mohabbat ke bawajood,
mehsoos ki hai teri zaroorat kabhi kabhi. !!

Nasir Kazmi

Hoti Hai Tere Naam Se Wehshat Kabhi Kabhi..
5 (100%) 1 vote

Uss Ka Naksha Ek Betarteeb Afsaane Ka Tha..

Uss ka naksha ek betarteeb afsaane ka tha,
ye tamasha tha ya koi khwaab deewane ka tha.

Saare kirdaaron mein be-rishta taalluqq tha koi,
un ki behoshi mein ghum sa hosh aa jaane ka tha.

Ishq kya hum ne kiya aawaargi ke ehad mein,
ek jatan bechainiyon se dil ko bahlaane ka tha.

Khwaahishen hain ghar se baahar door jaane ki bahut,
shauq lekin dil mein waapas laut kar aane ka tha.

Le gaya dil ko jo iss mehfil ki shab main aye ‘munir
uss haseen ka bazm mein andaaz sharmaane ka tha. !!

Munir Niazi

Uss Ka Naksha Ek Betarteeb Afsaane Ka Tha..
5 (100%) 2 votes

Ye Kaisa Nasha Hai Main Kis Ajab Khumaar Mein Hun..

Ye kaisa nasha hai main kis ajab khumaar mein hun,
tu aa ke jaa bhi chuka hai main intezaar mein hun.

Makaan hai qabr jise log khud banaate hain,
main apne ghar mein hun ya main kisi mazaar mein hun.

Dar-e-faseel khula ya pahaad sar se hata,
main ab giri hui galiyon ke marg-zaar mein hun.

Bas itna hosh hai mujh ko ki ajnabi hain sab,
ruka hua hun safar mein kisi dayaar mein hun.

Main hun bhi aur nahin bhi ajeeb baat hai ye,
ye kaisa jabr hai main jis ke ikhtiyaar mein hun.

Munir’ dekh shajar chaand aur deewaaren,
hawaa khizan ki hai sar par shab-e-bahaar mein hun. !!

Munir Niazi

Ye Kaisa Nasha Hai Main Kis Ajab Khumaar Mein Hun..
5 (100%) 2 votes

Aankhon Mein Bas Ke Dil Mein Samaa Kar Chale Gaye..

Aankhon mein bas ke dil mein samaa kar chale gaye,
khwaabida zindagi thi jagaa kar chale gaye.

Husn-e-azal ki shaan dikha kar chale gaye,
ek waaqiya sa yaad dila kar chale gaye.

Chehre tak aasteen woh laa kar chale gaye,
kya raaz tha ki jis ko chhupa kar chale gaye.

Rag rag mein iss tarah woh samaa kar chale gaye,
jaise mujh hi ko mujh se chura kar chale gaye.

Meri hayaat-e-ishq ko de kar junoon-e-shauq,
mujh ko tamaam hosh banaa kar chale gaye.

Samjhaa ke pastiyaan mere auj-e-kamaal ki,
apni bulandiyan woh dikha kar chale gaye.

Apne farogh-e-husn ki dikhlaa ke wus.aten
mere hudood-e-shauq badha kar chale gaye.

Har shai ko meri khaatir-e-nashaad ke liye,
aaina-e-jamaal bana kar chale gaye.

Aaye the dil ki pyaas bujhaane ke waaste,
ek aag si woh aur laga kar chale gaye.

Aaye the chashm-e-shauq ki hasrat nikaalne,
sar-ta-qadam nigaah bana kar chale gaye.

Ab kaarobaar-e-ishq se fursat mujhe kahan,
kaunain ka woh dard badhaa kar chale gaye.

Shukr-e-karam ke saath ye shikwa bhi ho qubool,
apna sa kyon na mujh ko bana kar chale gaye.

Lab tharthara ke rah gaye lekin woh aye ‘jigar
jaate hue nigaah milaa kar chale gaye. !!

Jigar Moradabadi

Aankhon Mein Bas Ke Dil Mein Samaa Kar Chale Gaye..
5 (100%) 2 votes

Aadmi Aadmi Se Milta Hai..

Aadmi aadmi se milta hai,
dil magar kam kisi se milta hai.

Bhool jata hun main sitam uss ke,
woh kuchh iss saadagi se milta hai.

Aaj kya baat hai ki phoolon ka,
rang teri hansi se milta hai.

Silsila fitna-e-qayaamat ka,
teri khush-qaamati se milta hai.

Mil ke bhi jo kabhi nahin milta,
toot kar dil ussi se milta hai.

Kaarobaar-e-jahan sanwarte hain,
hosh jab bekhudi se milta hai.

Rooh ko bhi mazaa mohabbat ka,
dil ki hum-saaegi se milta hai. !!

Jigar Moradabadi

Aadmi Aadmi Se Milta Hai..
5 (100%) 1 vote