Home / Tag Archives: hawaa-shayari

Tag Archives: hawaa-shayari

Dil-e Maayoos Mein Woh Shorishen Barpaa Nahin Hoti..

Dil-e maayoos mein woh shorishen barpaa nahin hoti,
umeedein iss qadar tooti ki ab paidaa nahin hoti.

Meri betaabiyaan bhi juzv hain ek meri hasti ki,
ye zaahir hai ki maujen khaarij az dariya nahin hoti.

Wahi pariyaan hain ab bhi raaja inder ke akhaade mein,
magar shahzaada-e gulfaam par shaida nahin hoti.

Yahan ki auraton ko ilm ki parwaah nahin be-shak,
magar ye shauharon se apne beparwaah nahin hoti.

Taalluq dil ka kya baaqi main rakhun bazm-e duniya se,
woh dilkash sooraten ab anjuman-aara nahin hoti.

Hua hun iss qadar afsurda rang-e-baagh-e-hasti se,
hawaayen fasl-e gul ki bhi nashaat-afzaa nahin hoti.

Qazaa ke saamne bekaar hote hain hawaas ‘akbar
khuli hoti hain go aankhen magar beena nahin hoti. !!

Akbar Allahabadi

Sar Se Chaadar Badan Se Qabaa Le Gayi..

Sar se chaadar badan se qabaa le gayi,
zindagi hum faqeeron se kya kya le gayi.

Meri mutthi mein sookhe hue phool hain,
khusbuon ko udaa kar hawaa le gayi.

Main samundar ke seene mein chattaan tha,
raat ek mauj aayi baha le gayi.

Hum jo kaaghaz the ashqon se bheege hue,
kyon chiraaghon ki lau tak hawaa le gayi.

Chaand ne raat mujh ko jaga kar keha,
ek ladki tumhara pata le gayi.

Meri shoharat siyaasat se mahfoos hai,
ye tawaayaf bhi ismat bacha le gayi. !!

Bashir Badr

Kise Khabar Thi Tujhe Iss Tarah Sajaaunga..

Kise khabar thi tujhe iss tarah sajaaunga,
zamaana dekhega aur main na dekh paaunga.

Hayaat-o maut firaaq-o wisaal sab yakjaan,
main ek raat mein kitne diye jalaaunga.

Pala – badha hun abhi tak inhi andheron mein,
main tez dhoop se kaise nazar milaaunga.

Mere mizaaj ki ye maadrana fitrat hai,
sawere saari azeeyat main bhool jaaunga.

Tum ek pedd se wabasta ho magar main toh,
hawaa ke saath bahut door door jaaunga.

Mera ye ehad hai main aaj shaam hone tak,
jahan se rizq likha hai wahin se laaunga. !!

Bashir Badr

Mere Baare Mein Hawaaon Se Woh Kab Puchhega..

Mere baare mein hawaaon se woh kab puchhega,
khaaq jab khaaq mein mil jaayegi tab puchhega.

Ghar basaane mein ye khatra hai ki ghar ka maalik,
raat mein der se aane ka sabab puchhega.

Apna ghum sab ko bataana hai tamaasha karna,
haal-e dil uss ko sunaayenge woh jab puchhega.

Jab bichhadna bhi ho toh hanste hue jana warna,
har koi rooth jaane ka sabab puchhega.

Hum ne lafzon ke jahan daam lage bech diya,
shair puchhega humen ab, na aadaab puchhega. !!

Bashir Badr

Kabhi Toh Aasmaan Se Chaand Utare Jaam Ho Jaye..

Sad_boy_man_in_evening_in_thoughts_memories_shayari_poetry

Kabhi toh aasmaan se chaand utare jaam ho jaye,
tumhare naam ki ek khoobsurat shaam ho jaye.

Humara dil sawere ka sunehra jaam ho jaye,
charaaghon ki tarah aankhen jalen jab shaam ho jaye.

Ajab halaat the yun dil ka sauda ho gaya aakhir,
mohabbat ki haweli jis tarah neelaam ho jaye.

Samandar ke safar mein iss tarah aawaaz do hum ko,
hawaayen tez hon aur kashtiyon mein shaam ho jaye.

Main khud bhi ehtiyaatan uss gali se kam guzarta hun,
koi masoom kyon mere liye badnaam ho jaye.

Mujhe maloom hai uss ka thikaana phir kahan hoga,
parinda aasmaan chhoone mein jab nakaam ho jaye.

Ujaale apni yaadon ke humare saath rahne do,
na jaane kis gali mein zindagi ki shaam ho jaye. !!

Bashir Badr

Meri Nazar Ke Saleeqe Mein Kya Nahin Aata..

Meri nazar ke saleeqe mein kya nahin aata,
bas ek teri hi taraf dekhna nahin aata.

Akele chalna toh mera naseeb tha ki mujhe,
kisi ke saath safar baantna nahin aata.

Udhar toh jaate hain raaste tamaam hone ko,
idhar se ho ke koi raasta nahin aata.

Jagaana aata hai uss ko kayi tareeqon se,
gharon pe dastaken dene khuda nahin aata.

Yahan pe tum hi nahin aas paas aur bhi hain,
par uss tarah se tumhe sochna nahin aata.

Pade raho yun hi sahme hue diyon ki tarah,
agar hawaaon ke par baandhna nahin aata. !!

Wasim Barelvi

Main Apne Khwaab Se Bichhda Nazar Nahin Aata..

Main apne khwaab se bichhda nazar nahin aata,
tu iss sadi mein akela nazar nahin aata.

Ajab dabaav hai in baahri hawaaon ka,
gharon ka bojh bhi uthta nazar nahin aata.

Main ek sada pe humesha ko ghar chhod aaya tha,
magar pukaarane wala nazar nahin aata.

Main teri raah se hatne ko hat gaya lekin,
mujhe toh koi bhi raasta nazar nahin aata.

Dhuaan bhara hai yahan sabhi ki aankhon mein,
kisi ko ghar mera jalta nazar nahi aata. !!

Wasim Barelvi