Home / Tag Archives: Gulaab

Tag Archives: Gulaab

Udas Raat Hai Koi Toh Khwab De Jaao – Bashir Badr

Bashir Badr Poetry

Udaas raat hai koi toh khwaab de jaao,
mere gilaas mein thodi sharaab de jaao.

Bahut se aur bhi ghar hain khuda ki basti mein,
faqeer kab se khada hai jawaab de jaao.

Main zard patton pe shabnam saza ke laaya hun,
kisi ne mujh se keha tha hisaab de jaao.

Meri nazar mein rahe doobne ka manzar bhi,
guroob hota hua aaftaab de jaao.

Fir iss ke baad nazaare nazar ko tarsenge,
woh ja raha hai khizaan ke gulaab de jaao.

Hazaar safhon ka deewan kaun padhta hai,
bashir badr’ koi intekhaab de jaao. !!

Bashir Badr Poetry Collection

Subscribe us for Bashir badr & all urdu legend’s poetry, Ghazals, poems, nazms, shayaries.

Kabhi Kisi Ko Mukammal Jahaan Nahin Milta..

Kabhi kisi ko mukammal jahaan nahin milta,
kahin zameen toh kahin aasmaan nahin milta.

Tamaam shehar mein aisa nahin khuloos na ho,
jahan umeed ho iss ki wahan nahin milta.

Kahan charaagh jalaayen kahan gulaab rakhen,
chhaten toh milti hain lekin makaan nahin milta.

Ye kya azaab hai sab apne aap mein gum hain,
zubaan mili hai magar hum-zubaan nahin milta.

Charaagh jalte hain beenaai bujhne lagti hai,
khud apne ghar mein hi ghar ka nishaan nahin milta. !!

Nida Fazli

Kabhi Kabhi Toh Mere Pehraan Se Aati Hai..

Sad man with mirror

Kabhi kabhi toh mere pehraan se aati hai,
Wahi mehak jo tumhare badan se aati hai.

Humare dil se toh acchha aaina unka,
Ki toot’ta hai toh aawaaz chhann se aati hai.

Humara gaaon se rishta abhi nahin toota,
Abhi buzurgon ki khusboo watan se aati hai.

Kabhi weh khud hi ba nafse-nafees aata tha,
Ab uski yaad bhi kaafi jatan se aati hai.

Main uske jism pe kafoor mal ke aaya tha,
Magar gulaab ki khushboo uske kafan se aati hai. !!

Agarche Main Ek Chattan Sa Aadmi Raha Hun..

Mohsin Naqvi Poetry

Agarche main ek chattaan sa aadmi raha hun,
magar tere baad housla hai ki jee raha hun.

Woh raiza raiza mere badan mein utar raha hai,
main qatra qatra ussi ki aankhon ko pee raha hun.

Teri hatheli pe kis ne likha hai qatal mera,
mujhe toh lagta hai main tera dost bhi raha hun.

Khuli hain aankhein magar badan hai tamaam patthar,
koi bataaye main marr chuka hun ki jee raha hun.

Kahan milegi misaal meri sitamgari ki,
Ki main gulaabon ke zakham kaanto se sii raha hun.

Na puchh mujh se ki shehar walon ka haal kya tha,
ki main toh khud apne ghar mein bhi do ghadi raha hun.

Mila toh beete dinon ka sach uski aankh mein tha,
woh aashna jis se muddaton ajnabi raha hun.

Bhula de mujh ko ki bewafaai bajaa hai lekin,
ganwa na mujh ko ki main teri zindagi raha hun.

Woh ajnabi ban ke ab mile bhi toh kya hai ‘mohsin
ye naaz kam hai ki main bhi uska kabhi raha hun. !!

Mohabbat Kam Nahi Hogi..

poetry pic

Meri aankhein salamat hain,
Mera dil mere seene mein dhadakta hai,
Mujhe mehsoos hota hai..
Mohabbat kam nahi hogi.

Mohabbat ek wada hai..
Jo sachai ki undekhe kisi saat mein hota hai,
Kisi rahat mein hota hai.
Ye wada shayari ban ke mere jazbon mein dhulta hai.
Mujhe mehsoos hota hai..
Mohabbat kam nahi hogi.

Mohabbat ek mousam hai,
Ki jis mein khwaab ugte hain toh,
Khwabon ki hari shakhein..
Gulaabon ko bulaati hain,
Unhein khushboo banati hain.
Ye khushboo jab
Humaari khidkiyon mein dastakien de kar guzrti hain
Mujhe mehsoos hota hai..
Mohabbat kam nahi hogi…!!

Maine Dekha Tha Un Dino Mein Usey..

Maine dekha tha un dino mein usey..

Jab woh khilte gulaab jaisa tha
uski palkon se neend chhanti thi
uska lehja sharaab jaisa tha
uski zulfon se bheegti thi ghatta
uska rukh mahtaab jaisa tha
log padhte they khal-o khad uss ke
woh aadaab ki kitaab jaisa tha
bolta tha zubaan khushbu ki
log sunte they dhadkanon mein usey.

Maine dekha tha un dino mein usey..

saari aankhein thi aainey uske
saare chahron mein intekhaab tha woh
ye khwaab hai ki woh haqeeqat tha
ye haqeeqat hai ki koi khwaab tha woh
sab se ghul-mil kar ajnabi rehna
ek dariya’numa saraab tha wo
apni neendein usi ki nazar hui
maine paya tha ratjaggon mein usey.

Maine dekha tha un dino mein usey..

jab wo hans hans ke baat karta tha
dil ke kheme mein raat karta tha
rang padte they aanchalon mein usey.

Maine dekha tha un dino mein usey..

ye magar dair ki kahani hai
ye magar door ka fasana hai
us ke mere milaap mein hayil
ab toh sadiyon bhara zamana hai
ab toh ye ki haal apna bhi
dasht-e hijran ki shaam jaisa hai
kya khabar inn dino woh kaisa hai ?

Maine dekha tha un dino mein usey. !